විදත් විකාශන සමුළුවක් ශ්‍රී ලංකාවේදී

විදත් විකාශකයන්ගේ සංගමය සහ ජනමාධ්‍ය අමාත්‍යාංශය එක්ව විද්‍යුත් විකාශන සමුළුවක් (Broadcasting Symposium) ශ්‍රී ලංකාවේ දී පැවැත්වීමට සැලසුම්කර තිබේ.

ඒ පිළිබඳ සාකච්ඡාවක් සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතාගේ ප්‍රධානත්වයෙන් සහ විද්‍යුත් විකාශකයන්ගේ සංගමයේ නියෝජිතයන්ගේ සහභාගීත්වයෙන් පසුගිය දා රජයේ ප්‍රවෘත්ති දෙපාර්තමේන්තුවේ ශ්‍රවණාගාරයේ දී පැවැත්විණි.

මෙම විද්‍යුත් විකාශන සමුළුව ක්ෂේත්‍රයේ වෘත්තිකයින්ට, මාධ්‍ය විද්වතුන්ට, මාධ්‍ය ක්ෂේත්‍රයේ අභියෝග, වගකීම් සහ අනාගත අපේක්ෂාවන් ආමන්ත්‍රණය කිරීම සඳහා වේදිකාවක් වනු ඇති බවත්, සාදාචාරාත්මක මාධ්‍ය කලාවේ ගුණාත්මකභාවය සහ විනෝදාස්වාදය යන අංශ දෙක සඳහා හොඳම භාවිතයන් ප්‍රවර්ධනය කරනු ඇති බව ද සෞඛ්‍ය හා ජනමාධ්‍ය අමාත්‍යවරයා පෙන්වා දුන්නේය.

එහිදී ඉදිරි වසර 05 දී විකාශන කර්මාන්තයේ අනාගතය, පවතින ගැටලු නිරාකරණය, ප්‍රකාශන අයිතීන් පිළිබඳව සාකච්ඡා කිරීමට ද නියමිතය.

තවද යෝජිත විද්‍යුත් විකාශන සමුළුව සැසි 4කින් සමන්විත එක්දින වැඩමුළුවක් ලෙස පැවැත්වීමටත්, සමුළුවේ සැසි මාතෘකා තේමා 4කින් සමන්විතව පැවැත්වීමට තීරණය විය. එමෙන්ම, 2025 වසරේ ජුනි මස මෙම සමුළුව පැවැත්වීමට සුදුසු බවට ද මෙහිදී තීරණය කරනු ලැබීය.

සැසි මාතෘකා අවසානාත්මකව ලෙස සාකච්ඡා කිරීමෙන් පසු අනු කමිටු පත් කිරීමටත්, විකාශන සමුළුව පැවැත්වීමේ දී ඉටුකළ යුතු කාර්යයන් යටතේ ප්‍රචාරණ කටයුතු, මූල්‍ය සම්පත් දායකයන් හා උපකාරක සේවා වැනි එක් එක් කාර්යයන් සඳහා අනුකමිටු පත්කිරීමට ද මෙහිදී කටයුතු කෙරිණි.

සමුළුව සඳහා සහභාගි වීමට නොහැකි, විකාශන සමුළුව සඳහා ඇල්මක් දක්වන පාර්ශ්ව සඳහා මාර්ගගත ක්‍රමවේදයන් ඔස්සේ ඊට සම්බන්ධ වීමට අවස්ථාව ලබාදීමේ වැදගත්කම, විදුලි සංදේශ නියාමන සභාවේ මූල්‍ය සහයෝගය මෙම කාර්යය සඳහා ලබාගැනීමේ හැකියාව සොයා බැලීම මෙන්ම විකාශන සමුළුව පැවැත්වීමෙන් අනතුරුව මාධ්‍ය ක්ෂේත්‍රයේ මාධ්‍යවේදීන් සඳහා පමණක් වැඩමුළුවක් පැවැත්වීම සම්බන්ධව ද මෙහි දී යෝජනා ඉදිරිපත් විය.

සෞඛ්‍ය හා ජනමාධ්‍ය අමාත්‍යවරයාගේ උපදේශකත්වය යටතේ මීට අදාළ ඉදිරි කටයුතු සැලසුම් කිරීමට නියමිතය.

මෙම සාකච්ඡාව සෞඛ්‍ය හා ජනමාධ්‍ය අමාත්‍යාංශයේ අතිරේක ලේකම් (සංවර්ධන, සැලසුම් හා තොරතුරු) එන්.ඒ.කේ.එල්. විඡේනායක, අධ්‍යක්ෂ (සංවර්ධන) ඩබ්.පී. සෙව්වන්දි, අධ්‍යක්ෂ (මාධ්‍ය) කේ.ජී. ජයන්ත, නීති නිලධාරී යුරේකා වේලාරත්න, සහකාර ප්‍රවෘත්ති අධ්‍යක්ෂ හර්ෂ බී. අබේකෝන්, විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් බන්දුල හේරත් යන අය එක්ව සිටියහ.

ශ්‍රී ලංකා විද්‍යුත් විකාශකයන්ගේ සංගමයේ සභාපති අසංග ජයසූරිය, එක්සත් ජාතීන්ගේ සංවර්ධන වැඩසටහන (UNDP) ආයතනයේ මාධ්‍ය විශ්ලේෂක චතුරංග හපුආරච්චි, Factum ආයතනයේ උපදේශක මන්දනා ඉමයිල්, කලාපීය උපදේශක (ආසියානු) ආචාර්ය රංග කලන්සූරිය, මාධ්‍ය විශ්ලේෂක හා උපදේශක නාලක ගුණවර්ධන මහත්ම මහත්මින් ඇතුළුව ශ්‍රී ලංකා විද්‍යුත් විකාශකයන්ගේ සංගමයේ සාමාජික මහත්වරු පිරිසක් එක්ව සිටියහ.