මිද්දෙණිය වීරකැටිය මාර්ගයේ ගල්පොත්තයාය, ඕකන්දයායට හැරෙන හන්දිය අසලදී සිදු වූ ත්‍රිත්ව ඝාතනයේ ප්‍රධාන සැකකරු කටුවනදී අත්අඩංගුවට ගෙන ඇතැයි පොලිස් මාධ්‍ය කොට්ඨාසය කියයි.
අත්අඩංගුවට ගත් ප්‍රධාන සැකකරු 42 හැවිරිදි පුද්ගලයෙකි. එම ත්‍රිත්ව ඝාතනය සඳහා යොදාගත් යතුරුපැදිය මිද්දෙණිය දෙබොක්කාව ප්‍රදේශයේ අඩි 50ක් පමණ ගැඹුරැති වතුරින් පිරි ගල්කොරියක ගිල්වා තිබියදී සැකකරුගේ ප්‍රකාශ මත සොයාගෙන ඇත.
මෙම ත්‍රිත්ව ඝාතනයෙන් එකම පවුලේ පියකු පුතකු සහ දියණියක මරුමුවට පත් වූහ. එලෙස මරුමුවට පත් වූයේ මිද්දෙණිය ගල්පොත්තයාය වෙන්දේසි ඉඩම පදිංචිව සිටි ඩබ්ලිව්. ඒ. ප්‍රියන්ත නොහොත් කජ්ජා (40) ඔහුගේ දෙවැනි පුතු ඩබ්ලිව්.ඒ. අමිෂ් (9) හා බාල දියණිය වූ ඩබ්ලිව්.ඒ. ප්‍රමිතා (6) යන අයවලුන්ය.
මේ අතර, මෙම ත්‍රිත්ව ඝාතනයට අදාළ අත්‍යවශ්‍ය සැකකරුවකු පෙරේදා (12) රාත්‍රී ඩුබායි බලා පලා යෑමට කටුනායක ගුවන්තොටුපොළ වෙත පැමිණ සිටියදී, ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරින් විසින් අත්අඩංගුවට ගනු ලැබීය.
මොහු කටුවන, අඟුලන්දෙණිය ප්‍රදේශයේ පදිංචි, දොරේමුරේ බඩල්ගේ පසිඳු සංජන නැමති 23 හැවිරිදි තරුණයෙකි.
මොහු පෙරේදා (12) රාත්‍රී 08.15ට ඩුබායි බලා පිටත්ව ගිය එමිරේට්ස් ගුවන් සේවයේ ඊ.කේ.- 653 දරන ගුවන් යානයට පීවිසීම සඳහා කටුනායක ගුවන් තොටුපොළ වෙත පැමිණ තිබුණි. කටුනායක ගුවන්තොටුපොළ අපරාධ පරීක්ෂණ දෙපාර්තමේන්තු නිලධාරින් විසින් මොහු අත්අඩංගුවට ගැනීමෙන් පසු , මිද්දෙණිය පොලීසියේ විශේෂ නිලධාරින් පිරිසක් ගුවන්තොටුපොළ වෙත පැමිණ මෙම සැකකරු ඉදිරි විමර්ශන කටයුතු සඳහා රැගෙන ගියහ. ඝාතනයට ලක් වූ ප්‍රියන්ත නමැත්තාගේ වැඩිමහල් පුතු ඉකුත් මස 18 වැනි දින ආපණශාලාවකින් රාත්‍රී ආහාර ඉල්ලූ බැවින් දරුවන් තිදෙනා සමඟ යතුරුපැදියෙන් පැමිණ තිබූ කජ්ජා නමැත්තා වැඩිමහල් පුතු ආපණශාලාවේ නවතා අනෙක් දරුවන් දෙදෙනා සමඟ යෝගට් ගැනීම සඳහා තවත් වෙ‍ෙළඳසලක් වෙත යමින් සිටියදී ඕකන්දයායට හැරෙන හන්දිය අසලදී යතුරුපැදියකින් පැමිණි නාඳුනන පුද්ගලයන් දෙදෙනකු ටී 56 ගිනිඅවියකින් වෙඩි තබා මෙම අපරාධය සිදු කර තිබිණි.
එම අවස්ථාවේදී ප්‍රියන්ත නොහොත් කජ්ජා නමැත්තා එම ස්ථානයේම මිය ගියේය. බරපතළ තුවාල ලද 6 හැවිරිදි දියණිය රෝහල්ගත කිරීමෙන් අනතුරුව මියගිය අතර, දෙවැනි පුතු දිනකට පසු රෝහ‍ලේදී මිය ගියේය.
ඝාතනයට ලක් වූ ප්‍රියන්ත නොහොත් කජ්ජා නමැත්තා අපරාධ රැසකට සම්බන්ධ පුද්ගලයකු බවට අනාවරණය වී ඇත. මෙම අපරාධය සම්බන්ධයෙන් මේ දක්වා සැකකරුවන් අට දෙනකු අත්අඩංගුවට ගෙන ඇත.
ඒ අතර පොලිස් කොස්තාපල්වරුන් දෙදෙනෙක් සහ යුද හමුදාවෙන් පලා ගොස් පසුව නීත්‍යනුකූලව ඉන් ඉවත් වී සිටි හිටපු හමුදා සෙබළු දෙදෙනකුද වන බව පොලීසිය සඳහන් කරයි.
මිද්දෙණිය පොලීසියේ ස්ථානාධිපති ප්‍රධාන පොලිස් පරීක්ෂක රෝහාන් චන්ද්‍රසේකර මහතා හා තංගල්ල කොට්ඨාස අපරාධ විමර්ශන අංශය පරීක්ෂණ පවත්වයි.
