දකුණු ආසියානු පාපන්දු සම්මේලනය සංවිධාන කරන සාෆ් ශූරතාවලියේ සත්කාරකත්වය ශ්‍රී ලංකාවට හිමිවීමෙන් අමෙරිකානු ඩොලර් මිලියන 10ක (ශ්‍රී ලංකා රුපියල් කෝටි 3000ක) විදේශ විනිමයක් ශ්‍රී ලංකාවට ගෙන්වා ගැනීම ශ්‍රී ලංකා පාපන්දු සම්මේලනයේ සැලසුම වේ.
ඉන්දියාව, පාකිස්තානය, බංග්ලාදේශය, භූතානය, මාලදිවයින, නේපාලය හා සත්කාරක ශ්‍රී ලංකාව සහභාගිවන ‘දකුණු ආසියාවේ පාපන්දු මංගල්‍යය’ ලබන ජූනි මාසයේදී පැවැත්වීමට කටයුතු යොදා ඇත.
මේ පාපන්දු ශූරතාවලියට සහභාගිවන කණ්ඩායම් හතේ පිරිසට අමතරව විදේශිකයන් 5000ක් පමණ ශ්‍රී ලංකාවට පැමිණෙන හෙයින් සංචාරක කර්මාන්තයට හා ක්‍රීඩා ආර්ථීකයට ශක්තියක් ලැ‍‍බෙන බව ශ්‍රී ලංකා පාපන්දු සම්මේලනයේ සභාපති ජස්වර් උමර් මහතා ‘දිනමිණ’ට පැවසීය. තරගාවලිය සංවිධාන කිරීමට අමෙරිකානු ඩොලර් ලක්ෂ 6ක මුදලක් (ශ්‍රී ලංකා රුපියල් කෝටි 18ක්) දකුණු ආසියානු පාපන්දු සම්මේලනය ලබා දේ.
මේ සාෆ් ශූරතාවලියට සමගාමිව ලබන මස 4 වැනිදා කොළඹ තරු පහේ හෝටලයකදී රටවල් හතේ පාපන්දු ප්‍රධානීන්ගේ සහභාගිත්වයෙන් සාෆ් කොංග්‍රස් විධායක සභාව පැවැත්වෙන අතර, ඒ සඳහා ආසියානු පාපන්දු සභාපති බහරේනයේ සල්මාන් බින් මහතා ප්‍රධාන ආරාධිතයා ලෙස සහභාගි වේ. එදින කණ්ඩායම් හත කාණ්ඩ දෙකකට බෙදා තරගාවලි සැලැස්ම ප්‍රසිද්ධියට පත් කෙරේ.
1995 වසරේ කොළඹදී පැවති තරගාවලියේදී ශ්‍රී ලංකාව සාෆ් පාපන්දු ශූරතාව දිනා ගත් අතර, එය මේ දක්වා ශ්‍රී ලංකාව දිනූ එකම සාෆ් පාපන්දු ශූරතාව ද වේ. ඒ අනුව ශ්‍රී ලංකාවට වසර 30කට පසු ශූරතාව යළි දිනා ගැනීමට අවස්ථාවක් උදා වී ඇති බව ශ්‍රී ලංකා පාපන්දු සභාපතිවරයාගේ විශ්වාසය වේ.
“මේක දකුණු ආසියාවේ ලෝක කුසලානයයි. මේ කීර්තිමත් තරගාවලිය සඳහා කලාපයේ ඉහළම පාපන්දු ක්‍රීඩා කරන ජාතීන් පිළිගැනීමට ශ්‍රී ලංකාවට අවස්ථාවක් ලැබෙනවා. පාපන්දු ක්‍රීඩාවේ ප්‍රබෝධය වගේම රටට විශාල ආදායමක් ගලා එනවා” යැයි උමර් මහතා සඳහන් කළේය.
සාෆ් ශූරතාවලිය වෙනුවෙන් පැමිණෙන ක්‍රීඩකයන් සහ පුහුණු කාර්ය මණ්ඩලය, විදේශීය අමුත්තන් හා දකුණු ආසියාව පුරා සංචාරය කරන පාපන්දු ලෝලීන්, ජාත්‍යන්තර ක්‍රීඩකයන් සහ පුහුණු කාර්ය මණ්ඩලය, ජාත්‍යන්තර ක්‍රීඩා මාධ්‍යවේදීන් හා තරගාවලියට ආයෝජනය කරන වාණිජ හවුල්කරුවන් සහ අනුග්‍රාහකයින් ඍජුවම සම්බන්ධ වේ. මේ හරහා සංචාරක ව්‍යාපාරය, ප්‍රවාහනය සහ වෙ‍ෙළඳාම වැනි ප්‍රධාන අංශ නංවාලීමටත්, නව රැකියා අවස්ථා නිර්මාණය කිරීමටත්, විදේශ විනිමය ආදායමක් උපයා ගැනීමටත් හැකියාව උදා වන බව ශ්‍රී ලංකා පාපන්දු සභාපතිවරයා පැවසීය.
ප්‍රින්ස් ගුණසේකර
