දඹුල්ල මහ නගර සභාවට අයත් දඹුල්ල කණ්ඩලම හන්දිය ප්‍රදේශයේ පිහිටා ඇති ආදාහනාගාරයේ මෘත ශරීර ආදාහනය කිරීම සඳහා රැගෙන එද්දි විදුලිය විසන්ධි වූ අවස්ථාවන්හිදී මළ සිරුරු පැය ගණනාවක් එම ස්ථානයේ රඳවා තබාගෙන සිටීමට සිදුවීම නිසා ජනතාව දැඩි අපහසුතාවකට පත්ව ඇතැයි පවසති.
ඊට හේතුව විදුලි උත්පාදන යන්ත්‍රය වෙනත් රාජකාරි කටයුතු සඳහා ආදාහනාගාරයෙන් රැගෙන යෑම බව එහි සේවකයෝ පෙන්වා දෙති. කෙසේ වෙතත් ඉකුත් 10 වැනි දින පස්වරුවේ දඹුල්ල කුරුණෑගල හන්දිය ප්‍රදේශයේ පිරිසක් දඹුල්ල මහ නගර සභාවට අදාළ මුදල් ගෙවා ආදාහනය සඳහා පැය එකහමාරකට අධික කාලයක් ආදාහනාගාරය ඉදිරිපිට මළ සිරුර තබා සිටීමට සිදුවූ බවත් ලංකා විදුලිබල මණ්ඩලයේ නිලධාරීන්ට කතා කොට විදුලිය නැවතත් ලැබීමෙන් පසුව ආදාහන කටයුතු සිදුකර ගැනීමට හැකි වූ බවත් ඥාතීහු පෙන්වා දෙති. දිගින් දිගටම සිදුවන මෙම අපහසුතාව පිළිබඳව අදහස් දැක්වූ ප්‍රදේශවාසීන් කියා සිටියේ මෙය කනගාටුදායක සිද්ධියක් බවය. ආදාහනාගාරයේ මුදල් බැඳීම සඳහා යන අවස්ථාවන්හිදී ද මියගිය අයගේ ළඟම ඥාතියකුට පැමිණ මුදල් බැඳිය යුතු බවට දඹුල්ල මහ නගර සභාවෙන් පවසන බවත් මෙම අපහසුතා පිළිබඳව දැනුම් දීමට මහ නගර සභාවේ කිසිදු අයකු සම්බන්ධ වීමට හෝ සම්බන්ධ කර ගැනීමට පවා නොහැකි තත්ත්වයක් මතුව ඇති බවද ඥාතීහු පෙන්වා දෙති.
මේ පිළිබඳව බලධාරීන් කඩිනමින් අවධානය යොමු කරන ලෙසද ඔවුහු ඉල්ලා සිටිති. දඹුල්ල මහ නගර සභාවේ නාගරික කොමසාරිස් චතුරිකා නවරත්න මහත්මියගෙන් විමසීම සඳහා පසුගිය 10 වැනි දින පස්වරුවේ සිට 11 වැනි දින පෙරවරුව දක්වා උත්සාහ කළද ඇය සම්බන්ධ කර ගැනීමට නොහැකි වීම විශේෂත්වයකි. එමෙන්ම දඹුල්ල මහ නගර සභාවේ මහජන සෞඛ්‍ය පරීක්ෂක යොහාන් අබේවික්‍රම මහතාගෙන් විමසීමේදී කියා සිටියේ විදුලි උත්පාදන යන්ත්‍රය ආදාහනාගාරයේ සිට වෙනත් ප්‍රදේශයකට රැගෙන ගොස් ඇති බවට තමන්ව දැනුම්වත් කොට නැති බවය.
එමෙන්ම මළ සිරුරක් ආදාහනය කිරීම සඳහා රැගෙන තියෙන අවස්ථාවක මෙවැනි අපහසුතාවකට පත්ව ඇතැයි කිසිදු සේවකයකු තමන් දැනුම්වත් නොකිරීම නිසා තමන්ගේ කනගාටුව ප්‍රකාශ කරන බවද හෙතෙම සඳහන් කළේය.
කෙසේ වෙතත් සංවිධානාත්මකව කඩාකප්පල්කාරී කණ්ඩායම් විසින් මෙවැනි ක්‍රියා සිදු කරන්නේද යන්න බරපතළ සැකයක් ඇතැයි මහජන සෞඛ්‍ය පරීක්ෂකවරයා සඳහන් කළේය.
සීගිරිය විශේෂ
