-ලක්ෂ ගණනක අත්යන්ත්‍ර දිරාපත් වෙලා
රඹේ – මාඑළිය මහ වැව පාරේ පිහිටි ලක්ෂ ගණනක් වටිනා රෙදි විවීම සඳහා යොදාගත් උපකරණ සහිත අත්යන්ත්‍ර පේෂකර්මාන්තශාලා ගොඩනැඟිල්ල වසර 20 ක පමණ කාලයක් තිස්සේ දිරාපත් වෙමින් හා කැලෑවට යටවෙමින් පවතින බව ප්‍රදේශවාසීහු පවසති.
එවකට අවට ගම්මානවල තරුණියන් 25ක් පමණ මෙහි සේවය කර සිය ජීවනෝපාය සොයාගත් බවත් පසුව එම පිරිසට රැකියාවක් නොමැතිව කුලී වැඩවල යෙදී ජීවත්වීමට සිදුවූ බවත් ගම්වාසීහු පවසති. ප්‍රදේශයේ රැකියා විරහිත තරුණියන්ට රැකියා අවස්ථා සලසාදිය හැකි මෙම ආයතනය වැසී යාම විශාල පාඩුවක් බවද පැවසූ ගම්වාසීහු මෙම කර්මාන්තශාලාව නැවත ආරම්භ කිරීම හෝ ගොඩනැඟිල්ල වෙනත් කටයුත්තකට යොදා ගැනීම සිදුකළ යුතුයැයි කියා සිටිති.
මෙම අත්යන්ත්‍ර කර්මාන්තශාලාව සක්‍රියව පැවති කාලය පිළිබඳව හොඳ මතකයක් තිබෙන මාඑළිය එම්.එස්. පෙරේරා මහතා මෙසේ පැවසීය. “මේ අත්යන්ත්‍ර පේෂ කර්මාන්තශාලාවේ මීට වසර 20කට පෙර තරුණියෝ 25ක් විතර සේවය කළා. ඒ අය පවුල් ජීවත් කෙරුවේ මේකේ වැඩ කරලයි. ඒ කර්මාන්තය නැති වුණාට පස්සේ ඔවුන් කුලී වැඩට ගියා. ඒ කාලේ මේ ස්ථානය ජනාකීර්ණයි. දැන් පාළුවට ගහිල්ලා. ගොඩනැඟිල්ල දිරාපත් වෙලා යනවා. ඇතුළේ තිබෙන යන්ත්‍ර දිරාපත් වෙලා.
එස්.පී. ගුණවතී මහත්මිය මෙසේ පැවසුවාය. “අපේ ගමේ සහ අවට ගම්වල ගෑනු දරුවෝ 20-25ක් විතර මෙතැන රස්සාව කළා. වහලා සෑහෙන කාලයක් වෙනවා. අපේ ගෙදරට අල්ලපු වැටේ තමයි ගොඩනැඟිල්ල තියෙන්නේ. වටේටම කැලෙන් වැහිලා. ඇතුළේ යන්ත්‍ර දිරලා. ඉස්සර මේකේ රස්සාව කරපු ගෑනු ළමයි මේක බලලා අනේ නැන්දේ අපි රස්සාව කරපු තැනට වෙලා තියෙන දේ කියලා හූල්ල හූල්ලා යනවා.
ඉබ්බාගමුව විශේෂ – චන්ද්‍රතිලක රත්නායක
