පසුගිය වර්ෂ කිහිපයක විගණකාධිපති වාර්තා සහ වත්මන් කාර්යසාධනය පිළිබඳ කරුණු සාකච්ඡා කිරීමට රජයේ ගිණුම් පිළිබඳ කාරක සභාව (කෝපා) වෙත කැඳවා තිබූ මෝටර් රථ දෙපාර්තමේන්තුවේ නිලධාරීන් කිසිදු සූදානමකින් තොරව ඒ සඳහා පැමිණ තිබීම හේතුවෙන් සභාව අතරමඟ නවතා ආපසු හරවා යැවීමට කාරක සභාව පියවර ගෙන තිබේ.
සූදානමකින් තොරව කරුණු දැක්වීමට පැමිණීම පිළිබඳ මෝටර් රථ ප්‍රවාහන දෙපාර්තමේන්තුවේ නිලධාරීන්ට කෝපා කමිටුවේ සාමාජිකයන් විසින් දැඩි අප්‍රසාදය පළ කරමින් ඉදිරි දිනයකදී නැවත පැමිණීමට දැනුම් දෙන බවත් එදිනට හොඳින් සූදානම් වී පැමිණෙන ලෙසත් දන්වා සභාව අතරමඟ නවතා දැමීමට කටයුතු කර ඇත.
මෝටර් රථ ප්‍රවාහන දෙපාර්තමේන්තුවේ 2020, 2021, 2022 හා 2023 වර්ෂවල විගණකාධිපති වාර්තා සහ වර්තමාන කාර්යසාධනය පිළිබඳ සාකච්ඡා කිරීමට රජයේ ගිණුම් පිළිබඳ කාරක සභාව (COPA) පාර්ලිමේන්තු මන්ත්‍රී අරවින්ද සෙනරත් මහතාගේ සභාපතිත්වයෙන් පසුගියදා (10) පාර්ලිමේන්තුවේදී රැස්වූ අවස්ථාවේදී මේ සිද්ධිය සිදුව ඇත.
මෙහිදී රජයේ ගිණුම් පිළිබඳ කාරක සභාව මඟින් පසුගිය රැස්වීම්වලදී ලබාදුන් නියෝග ඉටුකිරීම සම්බන්ධයෙන් විමසීම් සිදු කර ඇත. විශේෂයෙන්ම රේගු පරිගණක පද්ධතිය සමඟ සම්බන්ධ වීමට ප්‍රථම, සිදුවූ අනීතික වාහන ලියාපදිංචි කිරීම සම්බන්ධයෙන් විගණකාධිපතිවරයා ඉදිරිපත් කළ කරුණු 25ක් පිළිබඳ සිදු කළ පරීක්ෂණ හා එම කටයුතුවලට වගකිවයුතු නිලධාරීන්ට විරුද්ධව ගත් විනය ක්‍රියාමාර්ග ඇතුළු වර්තමාන තත්ත්වය සඳහන් කරමින් කාරක සභාවට වාර්තාවක් ලබා දිය යුතුව තිබූ බවත් එය දී නොමැති බවත් විගණකාධිපතිවරයා පෙන්වා දුන්නේය. මෙහිදී නිලධාරීන් වාර්තාවක් දී ඇති බව පැවසුවත් විගණකාධිපතිවරයා එය තමාට ලැබී නැති බව ප්‍රකාශ කළේය.
මෙම රැස්වීම සඳහා කාරක සභා සාමාජික නියෝජ්‍ය අමාත්‍යවරුන් වන මේජර් ජෙනරාල් (විශ්‍රාමික) අරුණ ජයසේකර, සුගත් තිලකරත්න, කාරක සභා සාමාජික මන්ත්‍රීවරුන් වන චන්දන සූරියආරච්චි, නීතිඥ සාගරිකා අතාවුද, ඔෂානි උමංගා, සුසන්ත කුමාර නවරත්න, (වෛද්‍ය) ජනක සේනාරත්න, දිනිඳු සමන් සහ ලාල් ප්‍රේමනාත් යන මහත්ම මහත්මීන් ඇතුළු රාජ්‍ය නිලධාරීහු පිරිසක් සහභාගි වී සිටියහ.
ස්වර්ණා විජේකෝන්, සන්ධ්‍යා කරුණාරත්න
