පාර්ලිමේන්තුව තුළ පසුගිය කාලයේ නිලතල දැරූ පුද්ගලයන් මුදල් භාවිත කර ඇති ආකාරය පිළිබඳ සිදුකරනු ලබන විගණනයේ තීරණ අනුව නීතිමය ක්‍රියාමාර්ග ගැනීමට කටයුතු කරන ලෙස සභානායක අමාත්‍ය බිමල් රත්නායක මහතා ඊයේ (12) කථානායක වෛද්‍ය ජගත් වික්‍රමරත්න මහතාගෙන් ඉල්ලා සිටියේය.
හිටපු කථානායකවරුන්, හිටපු නියෝජ්‍ය කථානායකවරුන්, හිටපු කාරක සභා සභා සභාපතිවරුන් භාවිත කළ වාහන සහ ඒ සඳහා භාවිත කළ ඉන්ධන පිළිබඳ තොරතුරු පාර්ලිමේන්තුවේ මූල්‍ය අධ්‍යක්ෂවරයාගේ සහතිකය සහිතව පාර්ලිමේන්තුවට ඉදිරිපත් කරමින් සභානායක අමාත්‍ය බිමල් රත්නායක මහතා මේ බව සඳහන් කළේය.
මීට පෙර මේ සම්බන්ධයෙන් තමන් විසින් තොරතුරු ප්‍රමාණයක් ඉදිරිපත් කළ බව සඳහන් කළ සභානායකවරයා එම තොරතුරු සම්බන්ධයෙන් හිටපු කථානායක මහින්ද යාපා අබේවර්ධන මහතා විසින් නිවේදනයක් ද නිකුත් කර තිබූ බව සඳහන් කළේය. සභානායකවරයා ලෙස තමන් ඉදිරිපත් කරන සියලු තොරතුරු සත්‍ය හා නිවැරදි තොරතුරු බව ද ඔහු එහිදී පැවසීය.
2024 ජනවාරි මස සිට 2024 නොවැම්බර් 20 වැනිදා දක්වා හිටපු කථානායක මහින්ද යාපා අබේවර්ධන මහතා භාවිත කළ කථානායක නිල නිවෙසේ ජලය, විදුලිය හා දුරකතන ගාස්තු පිළිබඳ වාර්තාව 2023 වර්ෂයට හා 2024 වර්ෂයට අදාළව කථානායකවරයාගේ ආහාර සඳහා නිල ගිණුමේ වියදම් පිළිබඳ වාර්තාව යන ලේඛන ද සභානායක බිමල් රත්නායක මහතා විසින් පාර්ලිමේන්තුවට ඉදිරිපත් කළේය.
ජනතාවට තොරතුරු දැන ගැනීමට ඇති අයිතිය තහවුරු කළ යුතු අතරම උත්තරීතර යැයි සැලකෙන පාර්ලිමේන්තුව තුළ වියදම් කරන්නේ ද මහජන මුදල් බව ද සභානායකවරයා සිහිපත් කළේය.
එම අවස්ථාවේ වැඩිදුරටත් සභානායක අමාත්‍ය බිමල් රත්නායක මහතා මෙසේ ද පැවසීය.
“එම තොරතුරු ව්‍යාජ බවට හිටපු කථානායකවරයා, මා විසින් එම තොරතුරු වගකීම් විරහිත ලෙස ප්‍රකාශ කර ඇති බව හැඟෙන පරිදි තොරතුරු ඉදිරිපත් කර තිබුණා. කෙසේ නමුත් කථානායකතුමනි, මම එදින මේ පාර්ලිමේන්තුවට ඉදිරිපත් කළේ නිවැරදි තොරතුරු. එම තොරතුරු ඉදිරිපත් කරන අවස්ථාවේදීත් මම සඳහන් කළා, අවශ්‍ය නම් ඕනෑම අයකුට ඔබතුමාගේ අනුමැතිය මත අවශ්‍ය තොරතුරු ලබාගත හැකි බවට. ඉහතින් මා විසින් ඉදිරිපත් කළ තොරතුරු පිළිබඳ වැඩිදුර කරුණු ඉදිරිපත් කිරීමක් මම සිදු කරනවා. ඒ වගේම වැඩිදුරටත් එම කරුණු තහවුරු කිරීමට විගණනයක් මඟින් හෝ මූල්‍ය නිලධාරීන් විසින් සහතික කරන ලද තොරතුරු ලබා දෙන ලෙස ඔබතුමාගේ කාර්යාලයේ නිලධාරීන්ගෙන් ඉල්ලීමක් කළා. ඒ අනුව එම තොරතුරු ලබාදීමට කටයුතු කිරීම සම්බන්ධයෙන් මම ස්තූතිවන්ත වෙනවා. ඒ වගේම රාජ්‍ය අංශයේ සියලු කාර්යාලවල මෙන්ම පාර්ලිමේන්තුව තුළත් වියදම් කරන්නේ ජනතා මුදල්. ඒ නිසා උත්තරීතර පාර්ලිමේන්තුවේ පරිපාලනය සම්බන්ධයෙන් ද අපි ජනතාවට වගකිවයුතුයි. පාර්ලිමේන්තුවේ වියදම් ද විගණනයට ලක්කිරීමට ඔබතුමා ගෙන ඇති තීරණය සම්බන්ධයෙන් අපගේ ස්තූතිය පිරිනමනාවා. මෙය ස්ටාෆ් ඇනිවසරි කමිටි එක තුළත් අනුමත වී තිබෙනවා.
ජනතා නියෝජිතයන් ලෙස හැකි සෑම මට්ටමින්ම ජනතාවට තොරතුරු දැන ගැනීමට ඇති අයිතිය සම්බන්ධයෙන් අපට අත්හළ නොහැකි වගකීමක් තිබෙනවා. එබැවින් ඔබතුමාගේ කාර්යාලයෙන් මා ලබාගත් තොරතුරු පාර්ලිමේන්තුවේ මූල්‍ය අධ්‍යක්ෂතුමා විසින් සහතික කරන ලද පිටපත් හැන්සාඩ්ගත කරනවා.
2023 ජනවාරි සිට 2023 දෙසැම්බර් 31 වැනිදා දක්වා කථානායකවරයාගේ, නියෝජ්‍ය කථානායකවරයාගේ සහ නියෝජ්‍ය කාරක සභා සභාපතිවරයාගේ ඉන්ධන වියදම් පිළිබඳ වාර්තාව
2025 ජනවාරි 01 වැනිදා සිට 2025 ජනවාරි 31 වැනිදා දක්වා කථානායකවරයාගේ හා නියෝජ්‍ය කථානායකවරයාගේ, නියෝජ්‍ය කාරක සභා සභාපතිවරියගේ ඉන්ධන වියදම් වාර්තාව
2025 පෙබරවාරි 01 වැනිදා සිට පෙබරවාරි 25 වැනිදා දක්වා කථානායකවරයාගේ, නියෝජ්‍ය කථානායකවරයාගේ හා නියෝජ්‍ය කාරක සභා සභාපතිවරයාගේ ඉන්ධන වියදම් පිළිබඳ වාර්තාව
ඒ වගේම 2024 ජනවාරි මස සිට 2024 නොවැම්බර් 20 වැනිදා දක්වා හිටපු කථානායක මහින්ද යාපා අබේවර්ධන මහතා භාවිත කළ කථානායක නිල නිවෙසේ ජලය, විදුලිය හා දුරකතන ගාස්තු පිළිබඳ වාර්තාව ඉදිරිපත් කරනවා. ඒ වගේම 2023 වර්ෂයට හා 2024 වර්ෂයට අදාළව කථානායකවරයාගේ ආහාර සඳහා නිල ගිණුමේ වියදම් පිළිබඳ වාර්තාව යන ලේඛන මම ඉදිරිපත් කරනවා.
හිටපු කථානායක මහින්ද යාපා අබේවර්ධන මහතා 2023 ජනවාරි සිට 2023 දෙසැම්බර් 31 වැනිදා දක්වා වාහන 08ක් භාවිත කර තිබෙනවා. ඒ සඳහා මිලියන 26ක ඉන්ධන (26,171,659.00) භාවිත කරලා තියෙනවා. එය පාර්ලිමේන්තුවේ මූල්‍ය අධ්‍යක්ෂතුමා සහතික කර තිබෙනවා.
2023 සම්පූර්ණ වර්ෂයේම නියෝජ්‍ය කථානායක අජිත් රාජපක්ෂ මහතා වාහන 06ක් භාවිත කරලා තිබෙනවා. මිලියන 14ක (14, 868,314.00) ඉන්ධන වියදම් ලබාගෙන තිබෙනවා.
09 වැනි පාර්ලිමේන්තුවේ නියෝජ්‍ය කාරක සභා සභාපති අංගජන් රාමනාදන් මහතා වාහන 04ක් (රුපියල් 7,877, 606.00) භාවිත කර ලක්ෂ 78ක ඉන්ධන භාවිත කරලා තිබෙනවා.
2024 වසරේදී හිටපු කථානායකතුමා වාහන 09ක් සහ මිලියන 33ක (33,403,922.00) ඉන්ධන භාවිත කරලා තියෙනවා.
හිටපු නියෝජ්‍ය කථානායකතුමා වාහන 06ක් සඳහා මිලියන 13ක (13, 546,406.00) ඉන්ධන භාවිත කරලා තියෙනවා.
2024 වර්ෂයේ පළමුවැනි මාස 09ට හිටපු නියෝජ්‍ය කාරක සභා සභාපතිතුමා වාහන 04ක් සමඟ මිලියන 7.2ක (7,224,620.00) ඉන්ධන භාවිත කරලා තියෙනවා. මේ සියල්ල පාර්ලිමේන්තුවේ මූල්‍ය අධ්‍යක්ෂතුමා සනාථ කරලා
තියෙනවා.
2024 මාස එකහමාරට නව කථානායකතුමා විසින් පාවිච්චි කරන ලද ඉන්ධන වියදම රුපියල් 123,362.00යි.
නියෝජ්‍ය කථානායකතුමාගේ ඉන්ධන වියදම එම කාලයට රුපියල් 45,000යි. නියෝජ්‍ය කාරක සභා සභාපතිනියගේ ඉන්ධන වියදම රුපියල් 18,000යි.
2025 ජනවාරි මාසයේ කථානායකතුමාගේ ඉන්ධන වියදම රුපියල් 218,000යි. නියෝජ්‍ය කථානායකතුමාගේ රු.23,000යි. නියෝජ්‍ය කාරක සභා සභාපතිනියගේ ඉන්ධන වියදම රු. 81,000යි. පෙබරවාරි 25 වැනිදා දක්වා කථානායකතුමාගේ ඉන්ධන වියදම රුපියල් 123,000යි. නියෝජ්‍ය කථානායකතුමාගේ රුපියල් 25,000යි.
වාර්තා ඉදිරිපත් කිරීම පමණක් නොවෙයි අපි ආදර්ශයෙනුත් ඔබතුමන්ලා ලබාදීලා තියෙන දේ අගය කරනවා. ඒ වගේම අපි ඉල්ලා සිටිනවා කථානායකතුමාගේ අභිමතය පරිදි විගණනයෙන් එන තීරණ මත අවශ්‍ය කරන නීතිමය ක්‍රියාමාර්ග ගන්න වුණත් පුළුවන් නම් ඒ පිළිබඳවත් කල්පනා කරන්න.
ස්වර්ණා විජේකෝන්, සන්ධ්‍යා කරුණාරත්න
