පාකිස්තානයේ බලුකිස්තාන ප්‍රාන්තයේදී පාකිස්තාන ආරක්ෂක අංශයේ සාමාජිකයන් ඇතුළු මගීන් 500කට ආසන්න පිරිසක් සමඟ බලුකිස්තාන බෙදුම්වාදී කැරැලිකරුවන් පැහැරගත් දුම්රිය මුදා ගැනීම සඳහා පාකිස්තාන හමුදාව දැවැන්ත මෙහෙයුමක් ආරම්භ කර ඇතැයි වාර්තා වේ. ඊයේ උදෑසන වන විට දරුණු වෙඩි හුවමාරුවකින් පසු කැරලිකරුවන් ප්‍රාණ ඇපයට ගෙන සිටි මගීහු 190 දෙනෙක් මුදා ගැනීමට පාකිස්තාන හමුදාව සමත්වී ඇති අතර, බලුකිස්තාන කැරැලිකරුවන් 30 දෙනකු ඝාතනයට ලක්වී ඇතැයි එරට ඩෝන් පුවත් සේවය වාර්තා කළේය. මුදා ගත් පිරිස අතර කාන්තාවන් සහ දරුවන් විශාල පිරිසක් සිටි බවත්, තුවාල ලබා සිටි 37 දෙනකු රෝහල්ගත කළ බවත් ආරක්ෂක අංශ ප්‍රකාශ කර තිබේ.
දුම්රියේ සිර වී සිටින සෙසු මගීහු මුදා ගැනීමේ මෙහෙයුම් අඛණ්ඩව සිදුවන අතර, පාකිස්තාන ගුවන් හමුදා හෙලිකොප්ටර් යානා කිහිපයක් ද මෙහෙයුමට එක්වී සිටින බව වාර්තා වේ. පැහැරගැනීමට ලක්වන විට දුම්රියේ සිටි මගීන් සංඛ්‍යාව නිශ්චිතව අනාවරණය වී නැතැයි විදෙස් මාධ්‍ය සඳහන් කරයි. දුම්රියේ රියැදුරු සහ සහායක ඇතුළු ආරක්ෂක අංශයේ පුද්ගලයන් 30 දෙනකු පමණ ඝාතනයට ලක්වී ඇති බවට තොරතුරු ලැබී ඇතැයි පාකිස්තාන මාධ්‍ය සඳහන් කරයි. පැය 48ක් ඇතුළත බලුකිස්තාන දේශපාලන සිරකරුවන් නිදහස් නොකරන්නේ නම් ප්‍රාණ ඇපකරුවන් ඝාතනය කරන බවට දුම්රිය පැහැර ගැනීමේ වගකීම භාර ගත් බලුකිස්තාන විමුක්ති හමුදාව නිවේදනය කර ඇතැයි ද වාර්තා වේ.
බලුකිස්තාන ප්‍රාන්තයේ ක්වේටා නුවර සිට කයිබර් පක්ටුන්ක්වා ප්‍රාන්තයේ පේෂාවර් නුවර දක්වා ධාවනය වූ ජෆාර් එක්ස්ප්‍රස් නමැති මැදිරි 9කින් සමන්විත එම මගී දුම්රිය ක්වේටා නුවරට කිලෝමීටර් 157ක් දුරින් පිහිටි බෝලන් දිස්ත්‍රික්කයේ උමං මාර්ගයක් ආසන්නයේදී ඊයේ පැහැර ගැනීමට ලක්වූ අතර, එම ශීඝ්‍රගාමී දුම්රිය නවත්වා ගැනීම සඳහා කැරැලිකරුවන් බෝම්බ ප්‍රහාරයක් එල්ල කර තිබූ බව ද වාර්තා වේ. පැහැර ගැනීමෙන් පසු දුම්රියට ගොඩ වී ඇති බෙදුම්වාදින් දුම්රියෙන් නොබසින ලෙස මගීන්ට තර්ජනය කර ඇති අතර, මගීන් පලායෑම වැළැක්වීමට මරාගෙන මැරෙන බෝම්බකරුවන් යොදවා තිබූ බව ද වාර්තා වේ.
බලුකිස්තානයේදී දුම්රියක් පැහැර ගැනීමට ලක් වූයේ පළමුවරට බවත්, බලුකිස්තානය බලා ධාවනය වන සියලුම දුම්රිය සේවාවන් තාවකාලිකව අත්හිටුවීමට පාකිස්තාන දුම්රිය දෙපාර්තමේන්තුව පියවර ගත් බවත් එරට මාධ්‍ය වැඩිදුරටත් වාර්තා කරයි.
