මීට මාස 6කට පමණ ඉහතදී කුරුණෑගල මරළුවාව ප්‍රදේශයේදී ව්‍යාපාරිකයකුට වෙඩි තබා ඝාතනය කිරීමේ සිද්ධියට සම්බන්ධ විය හැකි බවට සැක කරන පුද්ගලයකු පේරාදෙණිය පොලීසිය මඟින් අත්අඩංගුවට ගැනිණි.
හිටපු පොලිස් පරීක්ෂකවරයකු බව කියන මෙම සැකකරු, කුරුණෑගල, මාවතගම, කොටිකාපොළ ප්‍රදේශයේ වත්තක පදිංචිව සිට ඇත. සැකකරු තවත් කිහිප දෙනකු සමඟ එක්ව නීති විරෝධී ආකාරයට දඩයමේ යෑමේ සිද්ධියක් සම්බන්ධයෙන් පසුගියදා (9) දින පේරාදෙණිය පොලීසිය මඟින් අත්අඩංගුවට ගෙන තිබේ. එහිදී පොලීසිය සැකකාර හිටපු පොලිස් නිලධාරියාගෙන් කළ ප්‍රශ්න කිරීම්වලින් අනතුරුව සිදු කළ සෝදිසියකදී ඔහු වාසය කරන කොටිකාපොළ වත්තේ පිහිටි නිවෙසක සඟවා තිබූ පතරොම් තුවක්කු 4ක්, ඒවාට යොදන ජීව උණ්ඩ තොගයක්, රිවෝල්වරයක් හා ඊට යොදන ජීව උණ්ඩ කිහිපයක් ද බොරු කොණ්ඩයක්ද සොයාගෙන තිබේ. සැකකරු රැඳී සිටි එම නිවෙස සමඟ වත්ත ද වෙනත් පුද්ගලයකුට අයත් වන අතර, මොහු දිගු කාලයක සිට එම නිවෙසේ රැඳී සිටිමින් වත්ත පාලනය කර ඇති බව අනාවරණය විය. එම නිවෙසේ ස්ථාන කිහිපයකම සඟවා තිබියදී ගිනිඅවි සහ උණ්ඩ සොයාගෙන තිබිණි.
මීට වසර 20කට පමණ ඉහතදී ඉමහත් ආන්දෝලනයකට තුඩුදුන් කොටිකාපොළ ප්‍රදේශයේ එකම පවුලක සාමාජිකයන් තිදෙනකු ටී 56 ගිනිඅවියකින් වෙඩි තබා ඝාතනය කිරීමේ සිද්ධියට සම්බන්ධ ප්‍රධාන සැකකරු ලෙස මෙම සැකකාර හිටපු පොලිස් නිලධාරියා එම වකවානුවේදීම සැකපිට අත්අඩංගුවට ගෙන තිබුණි. ප්‍රමාණවත් සාක්ෂි නොමැති වීම හේතුවෙන් ඒ සම්බන්ධයෙන් පැවැති නඩු විභාගයේදී ඔහු චෝදනාවලින් නිදහස් කරනු ලැබීය. ඝාතනයට ලක්වූ තිදෙනා වයඹ පළාත් සභාවේ හිටපු එජාප මන්ත්‍රිනී කුමාරි ඒකනායකගේ පවුලේ සාමාජිකයෝ වූහ. සැකකරු සිටි නිවෙසේ තිබී හමුවූ බොරු කොණ්ඩය පිළිබඳව අවධානය යොමු කරමින් විමර්ශන මෙහෙයවූ මාවතගම පොලීසියේ සහ කුරුණෑගල කොට්ඨාස අපරාධ විමර්ශන අංශයේ නිලධාරීන්ට මරළුවාව ව්‍යාපාරිකයාගේ ඝාතනයට ද මෙම සැකකරුගේ කිසියම් සම්බන්ධයක් ඇතිදැයි සැක පහළ වී තිබේ. ඝාතනයට ලක්වූ ව්‍යාපාරිකයාට අයත් කුරුණෑගල පවත්වාගෙන ගිය ව්‍යාපාරික ස්ථානයක සේවය කළ බව කියන කාන්තාවක් මෙම සැකකරු සමඟ සමීප සබඳතාවයක් පවත්වාගෙන ගිය බවට තොරතුරු ද පොලිස් විමර්ශනවලදී අනාවරණය වී තිබේ. මෙම කාන්තාව ඝාතනයට ලක්වූ ව්‍යාපාරිකයා සමඟ ද අනියම් සම්බන්ධයක් පවත්වාගෙන ගොස් ඇති බවත්, ඇය මෙම සැකකරුගේ සොයුරිය වෙසෙන කොටිකාපොළ ප්‍රදේශයේම නිවෙසක වාසය කරන බවත් වැඩිදුරටත් අනාවරණය වී ඇත.
ඝාතනයට ලක්වූ ව්‍යාපාරිකයා කුරුණෑගල වැවේ පවත්වාගෙන ගිය බෝට්ටු සේවයක් ඇතුළු ව්‍යාපාර කිහිපයකම හිමිකරුවෙකි. ඔහු කුලී පදනම මත කුරුණෑගල මරළුවාව ප්‍රදේශයේ පදිංචිව සිටි නිවෙසේ ඉහළ මාලයේ සොල්දරයේ තම බිරිය සමඟ රැඳී සිටියදී වෙඩි තබා ඝාතනය කර තිබිණි. එහිදී ඔහුගේ විවාහක බිරිය ද වෙඩි වැදීමෙන් බරපතළ තුවාල ලැබූ අතර, වෙඩි තැබීම සඳහා ටී 56 ගිනිඅවියක් යොදාගෙන තිබුණි. මේ සඳහා පුද්ගලයන් සිවු දෙනකු පමණ පැමිණෙන්නට ඇතැයි සැක කරන අතර, ඝාතකයන් පැමිණි ආකාරය හෝ පලාගිය ආකාරය පිළිබඳව කිසිදු තොරතුරක් මෙතෙක් අනාවරණය වී නැත. මේ හේතුවෙන් එම ඝාතනයේ සැකකරුවන් පිළිබඳව තොරතුරු සපයන්නන් හට මුදල් ත්‍යාගයක් පිරිනමන බවට ද පොලිස් මූලස්ථානය විසින් ප්‍රසිද්ධ කරනු ලැබීය. ඝාතනයට ලක්වූ ව්‍යාපාරිකයා සොරකමක් සම්බන්ධයෙන් කලක් රක්ෂිත බන්ධනාගාරගතව සිටි අයකු වන බැවින් ඔහුගේ ඝාතනයට පාතාලයේ කිසියම් සම්බන්ධයක් තිබේද යන සැකය ද විමර්ශනවලට යොමුව තිබුණි.
මීට අමතරව එම ව්‍යාපාරිකයා ඝාතනය සඳහා පැමිණි සැකකරුවන් පිරිසව ව්‍යාපාරිකයාගේ දරුවන් දෙදෙනා පැහැදිලිව දැක තිබූ අතර, එහිදී වෙඩි තැබීම සිදු කළ පුද්ගලයා දිගු කොණ්ඩයක් වවාගෙන සිටි අයකු බවට ඔවුන් පොලීසියට ලබාදී තිබූ ප්‍රකාශවල සඳහන්ව තිබී ඇත. ඒ අනුව එම ඝාතනයට පැමිණි එක් සැකකරුවකු බොරු කොණ්ඩයක් පැලැඳ සිටින්නට ඇතැයි සැක කරන අතර, අත්අඩංගුවට ගෙන සිටින සැකකරුගේ නිවසේ තිබී හමුවූ බොරු කොණ්ඩය ඊට සම්බන්ධයක් තිබේදැයි යන්න පිළිබඳව මේ වන විට වැඩිදුරටත් විමර්ශනය කරමින් පවතී. සැකකරු කලක් අපරාධ පරීක්ෂණ දෙපාර්තමේන්තුවේ සහ තවත් පොලිස් ස්ථාන කිහිපයකම සේවය කළ අයකු වන අතර, මඩකලපුව ප්‍රදේශයේ පොලිස් ස්ථානයක සේවය කරමින් සිටියදී කාන්තාවක් හා සම්බන්ධ සිද්ධියක් හේතුවෙන් සේවයෙන් නෙරපා හරින ලද අයකු බවද පැවසේ.
