වැලිගම පොලිස් වසමේ වැලිපිටිය මූණමල්පෙ ප්‍රදේශයේ ගොයම් මැෂිමක් පෙරළීමෙන් ඊට යටවී තරුණයෙක් ජීවිතක්ෂයට පත්ව තිබේ.
මෙසේ මියගොස් ඇත්තේ වැලිපිටිය, මූණමල්පෙ, ඒ.කේ. කැලුම් චාමර නමැත්තෙකි. තවමත් අවිවාහකව දිවි ගෙවන කැලුම් වැලිපිටිය ප්‍රදේශයේ කුඹුරක් කපන්නට ඉකුත් 8 වැනිදා උදෑසන පිටත්ව තිබූ අතර, කුඹුරට යන්ත්‍රය දැමීමේදී එය පෙරළී ඊටම යටවීමෙන් මෙසේ ජීවිතක්ෂයට පත්ව තිබිණි. වහාම ක්‍රියාත්මක වූ ප්‍රදේශවාසීන් තුවාලකරු මාතර මහ රෝහලට ගෙනයෑමට කටයුතු කළද රෝහලට ඇතුළත් කරන විටත් ඔහු මියගොස් තිබිණි.
පියා නොමැති පවුලේ බර කරට ගෙන කටයුතු කර ඇත්තේ 32 හැවිරිදි වියේ පසුවූ කැලුම් බවත්, ඔහුගේ බාල සොයුරා තෙලිජ්ජවිල මහා විද්‍යාලයේ 11 ශ්‍රේණියේ ඉගෙනුම ලබන අතර, ඔහු මෙවර අ.පො.ස (සා/පෙළ) විභාගයට මුහුණ දීමට සූදානමින් සිටින බවත් ප්‍රදේශවාසීහු සඳහන් කළහ. ඔවුන් වැඩිදුරටත් කියා සිටියේ, තරුණයා මියගොස් තිබුණේ, සොයුරාගේ උපන් දිනය යෙදී තිබූ දිනම වන අතර, ඔහු උපන්දින සැමරුම පස්වරුවේ ගන්නට සූදානමින් සිට ඇති බවයි. ඔහුගේ මව ඒ සඳහා බටර් කේක් කිලෝවක් ද රැගෙන නිවෙසට පැමිණි මොහොතේ මෙම අනතුර සම්බන්ධයෙන් දැනගන්නට ලැබී තිබිණි.
කැලුම්ගේ දේහය මිහිදන් කිරීමට පවුලේ සුසාන භූමිය තුළ ඉඩක් නොවුණු බැවින් ප්‍රදේශයේ ඉඩම් හිමියකු දේහය තැන්පත් කිරීමට ඉඩ ලබා දී තිබේ. ප්‍රදේශවාසීන්ගේ සහයෝගයෙන් අවසන් කටයුතු සිදු කිරීමට පියවර ගෙන තිබුණි.
