නල්ලතන්නිය නගරයේ හා නල්ලතන්නිය – ශ්‍රී පාද මාර්ගයේ සැරිසරන රිළා රංචු හේතුවෙන් එම මාර්ගයෙන් ශ්‍රී පාදස්ථානය බලා ගමන් කරන දේශීය හා විදේශීය සංචාරකයන් මෙන්ම නිවාඩු නිකේතන හිමියෝ ද දැඩි අපහසුතාවයට පත්ව සිටිති.
මෙම රිළවුන් රංචු වශයෙන් ගැවසෙන අතර, එක් රංචුවකට රිළවු 20-30ක පමණ ප්‍රමාණයක් සිටිති. නගරයේ හෝටල්වලට ඇතුළුවන රිළවුන් ඇතැම් අවස්ථාවල වන්දනාකරුවන් අනුභව කරමින් සිටින මේසවලට කිසිදු බියකින් තොරව කඩා පැන එහි තබා ඇති ආහාර පාන රැගෙන පලා යන බව එම හෝටල් හිමියෝ පෙන්වා දෙති. රිළවුන් පළවා හැරීමට උත්සාහ කරද්දී සපා කෑමට කඩා පනින බවත් මෙය මහත් ගැටලුවක් බවට පත්ව ඇති බවත් ඔවුහු කියා සිටිති.
නිවාඩු නිකේතනවල සංචාරකයන් ලැගුම්ගෙන සිටින කාමරවලට කඩාවදින මෙම රිළවුන් ආහාර පාන, ඇඳුම් පැලඳුම් හා ඔවුන්ගේ වටිනා ජංගම දුරකතන පවා රැගෙන කැලයට පලා යන බව නල්ලතන්නියේ සංචාරක හෝටල් හිමියෝ පවසති. ඉන් විදේශීය සංචාරකයන් දැඩි බියකට පත්වන බවත්, රිළවුන් ඇතැම් අවස්ථාවල ඇඟට කඩා පනින නිසා සංචාරකයන්ගේ හා හෝටල් සේවක සේවිකාවන්ගේ ආරක්ෂාවට ද තර්ජනයක් වී ඇති බවත් නිවාඩු නිකේතන හිමියෝ පවසති. ඔවුන් වැඩිදුරටත් පවසන්නේ, මේ වන විට සංචාරකයන් ශ්‍රී පාදය බලා විශාල වශයෙන් පැමිණෙමින් සිටින නිසා වනජීවී දෙපාර්තමේන්තුවේ මැදිහත්වීමෙන් මෙම රිළවුන් පළවා හැරීමට හෝ වෙනත් ප්‍රදේශයකට ගෙන ගොස් දැමීමට කටයුතු කරන ලෙස ඉල්ලා සිටින බවයි.
