මුහුදු පතුලේ කොරල්පර තුළ රැඳී ඇති මත්ස්‍ය දැල් ඇතුළු විවිධ දෑ මඟින් මුහුදු පතුලට සිදුව ඇති හානිය වළක්වා ගැනීමේ අරමුණින් එය පිරිසුදු කිරීමේ වැඩසටහනක් ක්ලීන් ශ්‍රී ලංකා වැඩසටහනට සමගාමීව සංවිධානය කර තිබුණි.
මෙම වැඩසටහන යටතේ සමස්ත ලංකා කිමිදුම්කරුවන්ගේ සංගමය සමඟ එක්ව සින්නපාඩුවේදී කිමිදුම්කරුවන් 50කට ආසන්න පිරිසක් යාත්‍රාවලින් මහසයුරට ගොස් එහි කිමිදී මුහුද යට කොරල් පර තුළ තැන්පත් වී ඇති මසුන් ඇල්ලීම සඳහා භාවිත කරන දැල් ඇතුළු දෑ ඉවත් කිරීමට කටයුතු කර තිබේ. මේ සඳහා ජාතික ජන බලවේගයේ පුත්තලම දිස්ත්‍රික් පාර්ලිමේන්තු මන්ත්‍රී අජිත් ගිහාන් හා පුත්තලම සංවිධායක නිමල් පතිරණ මහත්වරුන් ඇතුළු පිරිසක් එක්ව සිටියහ. පළමු අදියරේදී මෙම කිමිදුම්කරුවන් පැය තුනකට ආසන්න කාලයක් මුහුදු පතුලේ කොරල්පර තුළ රැඳී තිබූ මත්ස්‍ය දැල් ඇතුළු දෑ ඉවත් කර එය ගොඩබිමට රැගෙන ඒමට කටයුතු කළ අතර, එසේ රැගෙන ආ දෑ නිසි ක්‍රමවේදයන් යටතේ විනාශ කිරීමට කටයුතු කරන බව කිමිදුම්කරුවෝ පැවසූහ.
මෙහිදී අදහස් දැක්වූ මෙම මුහුදු පතුලේ කොරල්පර පිරිසුදු කිරීමට එක්වූ ජේ.ඒ. අශෝක සිල්වා මහතා මෙසේ පැවසීය.
“ඇත්තටම අපේ ධීවර ප්‍රජාව විසින් නොදැනුවත්ව හෝ දැනුවත්ව සිදු කරන කටයුතු නිසා මේ වන විට මුහුදු පතුල බරපතළ ලෙස හානියට ලක්ව තිබෙනවා. ඒ හේතුවෙන් කොරල්පරවලටත් හානි වීම වළක්වන්න බැහැ. කොරල්පර ආශ්‍රිතව මේ ආකාරයට මත්ස්‍ය දැල් ඇතුළු විවිධ අපද්‍රව්‍ය රැඳී තිබීම නිසා මත්ස්‍යයන් බෝවීම පවා අඩු වෙන්න හේතු වෙලා තියෙනවා. ඒ සමඟම එම ස්ථානවලට එන මසුන් හා අනෙකුත් ජලජ ජීවීන් දැල්වල පැටලී මියයෑමත් වැඩි වෙලා. ඒ නිසා අපි කණ්ඩායමක් ලෙස මෙම කටයුත්ත කරන්න ඉදිරිපත් වුණා.’
මෙම අවස්ථාවට එක්වූ ජාතික ජන බලවේගය පක්ෂයේ පාර්ලිමේන්තු මන්ත්‍රී අජිත් ගිහාන් මහතා මෙලෙස අදහස් දැක්වීය.
“ක්ලීන් ශ්‍රී ලංකා වැඩසටහනට සමගාමීව අපි විවිධ වැඩසටහන් ක්‍රියාත්මක කළා. නමුත් මෙය විශේෂ වැඩසටහනක්. මොකද අපේ දිවයින වටා මුහුදු තීරය පිරිසුදු කිරීමේ වැඩසටහනක් ආරම්භ කළ පළමු අවස්ථාව තමයි මේ. මෙය අලුත් අත්දැකීමක්. මුහුදේ වටිනාකම තියෙන්නේ ධීවරයාට පමණක් නෙවෙයි. එය අපි සියලු දෙනාටම වැදගත්. ඒ නිසාම ගොඩබිම පරිසර පද්ධතිය වගේම මුහුදත් අපි ආරක්ෂා කළ යුතුයි.’
