වසර 23කට පසුව හක්වටුනා ජලාශයේ ජලය යල කන්නය සඳහා වගා කෙරෙන කුඹුරු අක්කර 4068 කට නිකුත් කිරීමට පියවර ගෙන ඇත.
2002 වසරේ සිට මේ දක්වා ජලය නිකුත් කර ඇත්තේ යල කන්නය සඳහා කන්න මාරු ක්‍රමයට බව ගොවි සංවිධාන පවසයි.
හක්වටුනා ජලාශයේ ජල ධාරිතාවය අක්කර අඩි 19,727කි. නිකුත් කළ හැකි ජල ධාරිතාවය අක්කර අඩි 16,705කි. ජලාශයෙහි වම් ඉවුර සහ දකුණු ඉවුර ඔස්සේ කුඹුරු අක්කර 4068 කට පමණ ජලය සැපයීම සිදු කෙරේ. ජලාශය යටතේ ගොවි පවුල් 35,000ක් පමණ පෝෂණය වන අතර ගොවි සංවිධාන 14ක් යටතේ ජල කළමනාකරණය සිදු කෙරේ. ඒ අනුව මාර්තු 20 වැනිදා ජලය නිකුත් කෙරෙන අතර අප්‍රේල් 05 වැනිදාට ප්‍රථම වගා කටයුතු අවසන් කිරීමට සැලසුම් කරන ලෙස ගොවි සංවිධානවලට බතලගොඩ වාරිමාර්ග ඉංජිනේරු කාර්යාලය මඟින් දැනුම් දී ඇත.
“මේ කන්නය ගොවිජනතාවට සතුටුදායක කන්නයක්. මෙවර ජලාශය පිටාර මට්ටමේ තිබෙනවා. ඒ වසර 23කට පස්සෙයි. මේ නිසා ජලාශය යටතේ වගා කෙරෙන සියලුම කුඹුරු සඳහා ජලය ලබා දෙනවා. 2002 සිට ජලය ලබා දුන්නේ යල කන්නය සඳහා කන්න මාරු ක්‍රමයටයි. වම් ඉවුරට කුඹුරු සඳහා ජලය නිකුත් කරන විට දකුණු ඉවුරේ කුඹුරුවල ගොඩ භෝග වගා කරනවා. පසුගිය වසරේත් මේ වසර ආරම්භයේදීත් වැස්ස තිබුණා” හක්වටුනා මධ්‍ය ගොවි සංවිධානයේ හිටපු සභාපති ඒ.එම්. රෝහණ අතපත්තු මහතා එසේ පැවසීය. හක්වටුනාව මධ්‍ය ගොවි සංවිධානනේ වත්මන් සභාපති ආර්.එම්. නවරත්න බණ්ඩා ඇමතීමට දින කිහිපයක් තිස්සේ උත්සාහ කළද දුරකතනය ක්‍රියා විරහිත කර තිබුණි.
