ලංකාවේ සිවුවැනි පොලිස් ස්ථානාධිපතිනිය ලෙසත්, සබරගමුව පළාතේ පොලිස් ස්ථානයක ප්‍රථම කාන්තා පොලිස් ස්ථානාධිපතිනිය ලෙසත් කාන්තා ප්‍රධාන පොලිස් පරීක්ෂක ඒ.ඒ. අප්සරා ක්‍රිෂාන්ති අබේසේකර මහත්මිය ඊයේ (11) පෙරවරුවේ සර්ව ආගමික වතාවත්වලින් අනතුරුව සුබ මොහොතින් කෑගල්ල පොලිස් කොට්ඨාසයට අයත් පිංදෙණිය පොලිස් ස්ථානයේ නව ස්ථානාධිපතිනිය ලෙස වැඩ භාර ගත්තාය. ජාත්‍යන්තර කාන්තා දිනය යෙදී තිබුණු ඉකුත් 08 වැනිදා වැඩබලන පොලිස්පති නීතිඥ ප්‍රියන්ත වීරසූරිය මහතා විසින් පිංදෙණිය පොලිසියේ ස්ථානාධිපති ලෙස කාන්තා ප්‍රධාන පොලිස් පරීක්ෂිකා ඒ.ඒ. අප්සරා ක්‍රිෂාන්ති අබේසේකර මහත්මිය පත් කර තිබුණි.
ඊයේ (11) පෙරවරුවේ පිංදෙණිය පොලිසියට පැමිණි ප්‍රධාන පොලිස් පරීක්ෂක අප්සරා ක්‍රිෂාන්ති අබේසේකර මහත්මිය අටාල පිංදෙණිය උඩුගම ශ්‍රී විශුද්ධාරාමාධිපති කෑගල්ල වෑවලදෙණිය සිරි මහින්දෝදය විද්‍යායතනයේ විශ්‍රාමික පරිවේණාධිපති ශාස්ත්‍රපති හාතාගොඩ ධම්මරතන, මාවනැල්ල දෙවනගල රජමහා විහාරාධිපති කාව්‍ය විශාරද මැදිරිගිරියේ පුඤ්ඤසාර ස්වාමීන් වහන්සේ ඇතුළු ගරුතර මහා සංඝරත්නයේ සෙත් පිරිත් දේශනා මධ්‍යයේ නව ස්ථානාධිපතිනිය ලෙස වැඩ භාර ගත්තාය. පසුව මාවනැල්ල දෙවනගල රජමහා විහාරාධිපති කාව්‍ය විශාරද මැදිරිගිරියේ පුඤ්ඤසාර ස්වාමීන් වහන්සේ නව පොලිස් ස්ථානාධිපතිනියට ආශීර්වාද පතා පිරිත් නූල් ගැට ගැසූහ.
මෙම අවස්ථාවට ප්‍රධාන පොලිස් පරීක්ෂිකා අප්සරා ක්‍රිෂාන්ති අබේසේකර මහත්මියගේ සැමියා වන කටුනායක ගුවන්තොටුපොළ පොලිසියේ ස්ථානාධිපති ප්‍රධාන පොලිස් පරීක්ෂක එල්මෝ මැල්කම් පේට් මහතා හා දරු දෙදෙනා කෑගල්ල කොට්ඨාස ළමා හා කාන්තා කාර්යාංශයේ ස්ථානාධිපති ප්‍රධාන පොලිස් පරීක්ෂක නිරෝෂා නිලධාරිනිය ඇතුළු පිරිසක් එක්ව සිටින අයුරු දක්නට ලැබුණි. 1996 අප්‍රේල් 16 වැනිදා ආධුනික කාන්තා උප පොලිස් පරීක්ෂකවරියක් ලෙස පොලිස් දෙපාර්තමේන්තුවට බැඳී ඇති අප්සරා ක්‍රිෂාන්ති අබේසේකර මහත්මිය 2010 වසරේදී පොලිස් පරීක්ෂක තනතුරටත් 2022 වසරේ ප්‍රධාන පොලිස් පරීක්ෂක තනතුරටත් උසස්වීම් ලබා ඇත.
යාපනය, වවුනියාව ප්‍රදේශවල සේවය කර ඇති අප්සරා 2001 වසරේ කැලණිය කොට්ඨාසයටත්, 2004 වසරේ කෑගල්ල කොට්ඨාසයටත් පසුව කෑගල්ල කොට්ඨාස ළමා හා කාන්තා කාර්යාංශයේ ස්ථානාධිපතිනිය ලෙසත් 2018 වසරේ ජනපතිට කියන්න විමර්ශන ඒකකයේ ස්ථානාධිපති ලෙස සේවය කර තිබේ. 2020 කෑගල්ල කොට්ඨාස අපරාධ විමර්ශන කාර්යාංශයට අනුයුක්තව දිවයිනේ දරුණු මිනීමැරුම්, මංකොල්ලකෑම් සම්බන්ධයෙන් අපරාධකරුවන් අත්අඩංගුවට ගෙන ඇති දක්ෂ නිලධාරිනියකි. කෑගල්ල හෙට්ටිමුල්ල බුළුරුප්ප කෙම්පිටිය වලව්වේ හිමිකරුගේ ඝාතකයන් ද දින කිහිපයකදී අත්අඩංගුවට ගත් නිලධාරිනියකි. පිංදෙණිය පොලීසිය ග්‍රාම සේවා වසම් 26ක් ආවරණය වන අතර එහි මුළු ජනගහනය 35,153කි.
