නොසැලකිලිමත් ලෙස වී වගා කර තිබුණු කුඹුරට සූර්ය පැනලයක් යොදා කාන්තාවකට විදුලි සර වැදී සාපරාධි සාවද්‍ය මනුෂ්‍ය ඝාතනයක් සිදු කරන ලද පුද්ගලයෙක් පෙරේදා (10) කෑගල්ල මහේස්ත්‍රාත් සශිකා මිතුන ආරච්චිගේ මහත්මිය ඉදිරියේදී වරද පිළිගත්තේය.
මෙලෙස වරද පිළිගෙන ඇත්තේ කෑගල්ල පොලිස් වසමේ දමුණුපොළ අටුගොඩ එගොඩවත්තේ පදිංචිව සිටින 67 හැවිරිදි වීරසූරිය ආරච්චිලාගේ ප්‍රේමරත්න නැමැති පුද්ගලයෙකි.
පෙරේදා (10) නඩුව කැඳවූ අවස්ථාවේ දී විත්තිකරු අධිකරණයේ වරද පිළි ගත්හ. පෙර වැරදි ඇද්දැයි සලකා බැලීමට විත්තිකරුගේ ඇඟිලි සලකුණු
මිය ගිය ඇතුගල්
පේඩිගේ ඇසිලින්
ලබා ගන්නා ලෙසත් මැයි 05 වැනිදා දඬුවම් නියම කරන බවත් මහේස්ත්‍රාත්වරිය විවෘත අධිකරණයට දැන්වීය.
වරද පිළිගෙන ඇති විත්තිකරු කෑගල්ල පොලිස් වසමේ දමුණුපොළ, අටුගොඩ ප්‍රදේශයේ පුද්ගලයෙකුට අයත්ව ඇති පුරන්ව තිබුණු කුඹුරු කනටි කිහිපයක පොල් වගා කර ඇති ගොඩ ඉඩමක කොටසක් භෝග වගා කිරීමට ඉල්ලාගෙන තිබුණි. පසුව විත්තිකරු කුඹුරු කනටි කිහිපයේ වී වගා කර ගොඩ පොල් වගා කර ඇති ඉඩමේ අල බතල මඤ්ඤොක්කා වගා කර තිබේ. වී වගා කර තිබුණු කුඹුරු කනටි කිහිපය වල් ඌරන්ගෙන් ආරක්ෂා කර ගැනීමට විත්තිකරු බැටරියක් ආධාරයෙන් ක්‍රියාත්මක සූර්ය පැනලයකින් කුඹුර වටා කම්බි ඇද තිබුණි. කුඹුරට ඉහළින් පොල් වගා කර ඇති ඉඩමේ පොල් ගස්වල වියළි පොල් කුඹුරට වැටෙන බවත් පොලීසිය අධිකරණය හමුවේ පැවසීය. කුඹුරේ සිට මීටර් 50ක් පමණ ඈතින් තනිවම කටුමැටි පැලක ජීවත් වෙමින් සිටි 77 හැවිරිදි වයෝවෘද්ධ තිදරු මවක් වන ඇතුගල් පේඩිගේ ඇසිලින් නමැත්තිය 2024 අගෝස්තු මස 14 වැනිදා අලුයම කුඹුරට වැටෙන පොල් ඇහිදීමට ගිය අවස්ථාවේ දී විත්තිකරු විසින් වල් ඌරන්ට ඇද තිබුණු කම්බියක පැටලී උඩුබැලි අතට කුඹුරට වැටී තිබුණි. පසුව විදුලි සර වැදී වැටී මිය ගොස් තිබුණු වයෝවෘද්ධ කාන්තාවගේ පිරිමි දරුවෙකුගේ ලේලියක් වන රන්පටි දේවගේ වසන්ති කුමාරි නැමැත්තිය සිය නැන්දම්මා කුඹුරේ වැටී මිය ගොස් ඇති බව දන්වා කෑගල්ල මූලස්ථාන පොලීසියට පැමිණිල්ලක් ඉදිරිපත් කර තිබුණි.
පැමිණිල්ලට අනුව ගලිගමුව ප්‍රාදේශීය ලේකම් කොට්ඨාසයේ හදිසි මරණ පරීක්ෂක වී. ලලිතා නන්දනී මහත්මිය කෑගල්ල මූලස්ථාන පොලීසියේ ස්ථානාධිපති ප්‍රධාන පොලිස් පරීක්ෂක නාලක මාගෙදරගම මහතාගේ උපදෙස් පරිදි විවිධ පැමිණිලි අංශයේ උප පොලිස් පරීක්ෂක ප්‍රියන්ත වීරසිංහ හා කෑගල්ල කොට්ඨාස අපරාධ ස්ථාන පරීක්ෂණාගාරයේ පොලිස් පරීක්ෂක උපාලි ජයසේකර යන නිලධාරීන් සිද්ධිය වූ ස්ථානයට ගොස් මූලික විමර්ශන කටයුතු සිදු කර වැඩිදුරටත් පරීක්ෂණ කටයුතු සඳහා මෘත ශරීරය කෑගල්ල මහ රෝහලට රැගෙන ගොස් තිබුණි.
පසුව මෘත ශරීරය සම්බන්ධයෙන් කෑගල්ල මහ රෝහලේ සහකාර අධිකරණ වෛද්‍ය නිලධාරි වෛද්‍ය නෙරංජා උදය කුමාරි මහත්මිය පශ්චාත් මරණ පරීක්ෂණය සිදු කළාය. එහිදී මෙය විදුලි සර වැදීමකින් සිදු වූ හදිසි අනතුරු මරණයක් බවට වෛද්‍යවරිය තීන්දු කෙරිණ.
පසුව කුඹුරට බැටරියක් ආධාරයෙන් සූර්ය පැනලයකින් විදුලි කම්බි ඇද තිබුණු සැකකරු සූර්ය පැනලය බැටරිය ඇතුළු කොටස් අත්අඩංගුවට ගෙන අධිකරණයට ඉදිරිපත් කර තිබුණි. පසුව සැකකරු රක්ෂිත බන්ධනාගාරගත කෙරිණ.
දීර්ඝ නඩු විභාගයකින් අනතුරුව විත්තිකරු පෙරේදා (10) අධිකරණයේදී වරද පිළිගත්හ. මැයි 05 වැනිදා දඬුවම් නියම කරන බව මහේස්ත්‍රාත්වරිය අධිකරණය හමුවේ පැවසුවාය. පැමිණිල්ල වෙනුවෙන් කෑගල්ල මූලස්ථාන පොලිසියේ නඩු මෙහෙයුම් අංශයේ පොලිස් සැරයන් මනෝජ් චන්ද්‍රසේකර (9200) නිලධාරියා පෙනී සිටියහ.
