ඉන්දියානු කහ, නීති විරෝධී ලෙස ආනයනය කර රට තුළ අලෙවි කිරීම හේතුවෙන් දේශීය කහ ගොවීන්ට සිය නිෂ්පාදන අලෙවි කර ගැනීමට නොහැකි වී දැඩි අසරණ තත්ත්වයකට පත්වී ඇතැයි ගම්පහ දිස්ත්‍රික් කහ වගාකරුවන්ගේ සංගමයේ සභාපති නාමල් අධිකාරි මහතා පවසයි.
ඉන්දියාවෙන් කහ ආනයනය රජය මඟින් පෙර සිටම තහනම් කර තිබියදී නීති විරෝධී ලෙස ඉන්දියාවේ සිට කහ ආනයනය කිරීමත් එම කහ, රට පුරා තොග සහ සිල්ලර වෙ‍ෙළඳසල්වල අලෙවි කිරීමත් හේතුවෙන් දේශීය කහ අලෙවි කරගත නොහැකි තත්ත්වයකට කහ ගොවීන් පත්වී සිටින බව ද ඒ මහතා පෙන්වා දෙයි.
මෙම ඉන්දියානු කහ, කොළඹ තොග වෙ‍ෙළඳසල් තුළ ද විශාල ලෙස අලෙවි වුවත් එම නීති විරෝධී කහ, අත්අඩංගුවට ගැනීමට පාරිභෝගික අධිකාරිය හෝ වගකිවයුතු කිසිදු ආයතනයක් මේ වනතුරු පියවර ගෙන නැති බව පවසන නාමල් අධිකාරි මහතා මෙම තත්ත්වය තුළ එම කහ අද වනවිට ගමේ පුංචිම කඩය තුළත් අලෙවි කරන තත්ත්වයකට පත් වී ඇතැයි ද කියා සිටියේය.
මේ වනවිට ගම්පහ දිස්ත්‍රික්කයේ වැඩිම කහ නිෂ්පාදනයක් සිදු කරනු ලබන මිනුවන්ගොඩ ප්‍රාදේශීය ලේකම් කොට්ඨාසයේ පාරම්පරික කහ ගොවීන්, සිය කහ අස්වැන්න අලෙවි කරගත නොහැකිව පීඩාවට පත්ව ඇති බව ද සභාපතිවරයා පැවසීය. වසරකට රටේ පරිභෝජනය සඳහා අවශ්‍ය කහ අස්වැන්න අද වනවිට ගම්පහ දිස්ත්‍රික්කය තුළින්ම නිෂ්පාදනය කර ඇති බව ද ඔහු පැවසීය.
පවතින මෙම තත්ත්වය මත ගොවීන්ගේ කහ අස්වැන්න අලෙවි කර ගැනීමට සහ එම වගාවන් සඳහා කරන ලද වියදම් උපයාගත නොහැකිව දැඩි ලෙස පීඩාවට පත් වී සිටින බව පවසන කහ වගාකරුවන් ඉන්දියානු කහ මෙරටට රැගෙන ඒම නවතා දමා, දේශීය කහ සඳහා රට තුළ හොඳ වෙ‍ෙළඳපොළක් සකසා දී, තම අස්වැන්න අලෙවි කර ගැනීමට පහසුකම් සලසා නොදුනහොත් තමන් කහ වගා කිරීමෙන් ඉවත් වන බව මෙම පාරම්පරික කහ වගාකරුවෝ කියා සිටිති.
මෙහිදී වැඩිදුරටත් අදහස් දැක්වූ ගම්පහ දිස්ත්‍රික් කහ වගාකරුවන්ගේ සංගමයේ සභාපති නාමල් අධිකාරි මහතා:
“දේශීය කහ ගොවියාට මේ විනාශය වෙලා තියෙන්නේ ඉන්දියාවෙන් කහ හොරෙන් ලංකාවට ගේන නිසයි. නීති විරෝධී ලෙස ඉන්දියාවෙන් කහ ගෙනල්ලා ලංකාවේ විකුණන වෙ‍ෙළඳුන් කියනවා ලංකාවේ කහ හොඳ නෑ, හොඳම කහ ඉන්දියාවේ කහ කියලා. නමුත් ඒක බොරුවක්. මුළු ලෝකයම දන්නවා ලෝකයේ හොඳම කහ තියෙන්නේ ශ්‍රී ලංකාවේ කියලා. නමුත් පුදුම තත්ත්වය කියන්නේ අපේ රටේ කහ හොඳයි කියලා අපේ රටේ කිසිම කෙනෙක් කියන්නේ නැහැ. අපි රජයෙන් ඉල්ලා සිටිනවා වහාම මෙම ඉන්දියානු කහ ජාවාරම නවත්වා අපේ රටේ කහ වගා කරන කහ ගොවියාව ශක්තිමත් කරන්න කියලා.”
පාරම්පරික මහා පරිමාණ කහ වගාකරුවකු වන සරත් චන්ද්‍රසිරි මහතා :-
“එදා ඉඳන් අපෙන් කහ මිලදී ගත්තු වෙළෙඳුන් මේ වෙනකොට අපේ කහ මිලදී ගැනීම ප්‍රතික්ෂේප කරලා තියෙනවා. ඒ වෙළෙඳුන් කියනවා අපේ කහවලට වැඩිය හොඳ ඉන්දියන් කහ ඕනෑ තරම් කොළඹ වෙ‍ෙළඳපොළේ මිලදී ගන්න තියෙනවා කියලා. අපේ රටේ කහ ලෝකයේ හොඳම කහ වුණාට අද වෙනකොට කවුරුවත් ඉල්ලන්නේ නැහැ. ඉස්සර විවිධ සමාගම් ඇවිත් අපෙන් කහ මිලදී ගත්තා දැන් ඒ සමාගම් ගන්නෙත් නැහැ.
මේ වෙනකොට අපි විශාල අස්වැන්නක් ලබාගෙන තියෙනවා. මේ වසරේ රටේ පරිභෝජනයට අවශ්‍ය කහ අස්වැන්න මේ වෙද්දී ලබාගෙන ඉවරයි. වෙනත් වසරවලට වඩා මේ වසරේ කහ අස්වැන්නේ විශාල වැඩිවීමකුත් තියෙනවා. නමුත් නීති විරෝධී ලෙස ඉන්දියාවෙන් රැගෙන එන කහ නිසා අපේ කහ ටික විකුණගන්න එක විශාල ගැටලුවක් වෙලා. ඒ නිසා රට තුළට නීති විරෝධී ලෙස ඉන්දියානු කහ රැගෙන ඒම සහ එම කහ රට තුළ ප්‍රසිද්ධියේම අලෙවි කිරීම පිළිබඳව රජයේ වගකිවයුතු අංශ ඉක්මනින්ම අවධානය යොමු කළ යුතු බව අප කියන්න කැමැතියි. මෙම ඉන්දියානු කහ නිසා අපේ කහ අලෙවි කරගන්න බැරිව, අපි වගාවන් සඳහා වියදම් කළ රුපියල් ලක්ෂ ගණනක් පාඩු විඳීමට අපට සිදුවී තිබෙනවා. ඒ නිසා දිගින් දිගටම ඉන්දියානු කහ, රට තුළ අලෙවි කරමින් අපගේ දේශීය කහ වගාවන්ට පහර එල්ල කරමින් සිදු කරන මෙම ජාවාරම පිළිබඳව වහාම ක්‍රියාත්මක වී කටයුතු කරන්න කියා රජයෙන් ඉල්ලා සිටිනවා. අපේ රටේ අපිම වගා කරන කහ සඳහා රට තුළ මෙන්ම ලෝක වෙ‍ෙළඳපොළ තුළත් අ‍ෙලවියට පහසුකම් හදලා දෙන්න කියලා අපි වගකිවයුතු බලධාරීන්ගෙන් ඉල්ලා සිටිනවා.”
