මැදගම ප්‍රාදේශීය ලේකම් කොට්ඨාසයට අයත් තඹාන ගම්මානයට පිවිසෙන තඹාන දික්ඔය හරහා ඇති ගල්ගොල පාලමේ වැඩ අතරමඟ නතරවීම නිසා ප්‍රදේශවාසීන්ට දැඩි දුෂ්කරතාවයන්ට මුහුණපෑමට සිදුවී ඇත.
මාර්ග සංවර්ධන අධිකාරිය මඟින් 2021 මාර්තු 13 වැනිදා මෙම පාලමේ ඉදිකිරීම් ආරම්භ කර ඇති අතර, කොන්ක්‍රීට් දැමීමට අවශ්‍ය කොන්ක්‍රීට් බීම් සහ කම්බි පමණක් දමා ඇති කොන්ත්‍රාත්කරු ඉදිකිරීම් නතර කර තිබේ.
මෙම පාලම ඉදිකිරීමට පෙර තිබූ පාලමේ කොටස් කඩා ඉවත් කර ඇත. මෙම තත්ත්වය මත තඹාන, ඌරුමුත්තාව, ගංගොඩලන්ද, උඩබොක්ක, ලක්ගල, බකිනිගස්මඩ, මල්ගස්ලන්ද හා දිල්ලුගංගොඩ යන ගම්මානවල ගැමියන් මාර්ගය හරහා වාහන ගමන් කිරීමට නොහැකි වීමෙන් දැඩි අපහසුතාවයට පත්ව සිටිති. මෙම ගම්මානවල ජනතාව ගොවිතැන් කටයුතු කරගනිමින් දිවි සරිකර ගන්නා අතර ඔවුන්ගේ නිෂ්පාදන අලෙවිකර ගැනීම සඳහා මැදගම නගරයට රැගෙන යාම ගැටලුවක් වී ඇත.
මේ පිළිබඳව මාර්ග සංවර්ධන අධිකාරියේ මොනරාගල දිස්ත්‍රික් ඉංජිනේරු කාර්යාලයෙන් අප විමසූ විට එහි ප්‍රධාන ඉංජිනේරුවරිය පැවසුවේ,
එවැනි පාලමක් මාර්ග සංවර්ධන අධිකාරිය මඟින් ඉදිකිරීමට පියවර නොගත් බවයි. ප්‍රාදේශීය සභාවෙන් හෝ ඌව පළාත් සභාවෙන් ඒ පිළිබඳව විමසන ලෙසයි. එවකට මැදගම ප්‍රාදේශීය සභාවේ සභාපතිවරයා ලෙස කටයුතු කළ රංජිත් පියදිගම මහතාගෙන් කළ විමසුමකදී පැවසුවේ, ප්‍රාදේශීය සභාව මෙම පාලම ඉදිකිරීමට සම්බන්ධ වූයේ නැහැ. මාර්ග සංවර්ධන අධිකාරියේ පාලම් ව්‍යාපෘතිය මඟින් එය ඉදිකිරීමට කටයුතු කළා. මේ පිළිබඳව ගම්වාසීන් පැවසුවේ, ගමට පිවිසෙන මෙම පාලම කඩිනමින් ඉදිකර දෙන ලෙස වගකිව යුතු නිලධාරීන්ගෙන් ඉල්ලා සිටින බවයි.
