2025 මාර්තු 10 දින රැස් වූ අමාත්‍ය මණ්ඩලය විසින් ගනු ලැබූ තීරණ ප්‍රකාශයට පත් කිරීම සඳහා කැබිනට් මාධ්‍ය ප්‍රකාශක, සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස සහ රජයේ ප්‍රවෘත්ති දෙපාර්තමේන්තුවේ අධ්‍යක්ෂ ජනරාල් එච්.එස්.කේ.ජේ. බණ්ඩාර මහත්වරුන් රජයේ ප්‍රවෘත්ති දෙපාර්තමේන්තුවේදී ඊයේ (11) පැවති මාධ්‍ය හමුවට එක් වූයේ මෙලෙසිනි.
ගාල්ල උසාවි සංකීර්ණය අසලට නීතිඥ කාර්යාල සංකීර්ණයක්
ගාල්ල නව අධිකරණ සංකීර්ණයට යාබදව අත්කර ගත් ඉඩමේ නීතිඥ කාර්යාල සංකීර්ණයක් ඉදිකිරීමට අදාළව අධිකරණ සහ ජාතික ඒකාබද්ධතා අමාත්‍යාංශය සහ ගාල්ල නීතිඥ සංගමය අතර අවබෝධතා ගිවිසුමකට අත්සන් තැබීමට අධිකරණ සහ ජාතික ඒකාබද්ධතා නීතිඥ හර්ෂණ නානායක්කාර මහතා ඉදිරිපත් කළ යෝජනාව අමාත්‍ය මණ්ඩලය මඟින් අනුමත කර තිබේ.
මේ යෝජනාව පෙවරවාරී මස 3දා පැවැති ඇමැති මණ්ඩල රැස්වීමේදී සාකච්ඡා කළ අතර එය ක්‍රියාත්මක කිරීමට ඇති නීතිමය බාධා සහ අනෙකුත් කරුණු පිළිබඳව අධ්‍යයනය කර නිර්දේශ සැපයීමට අධිකරණ සහ ජාතික ඒකාබද්ධතා අමාත්‍යාංශයේ ලේකම්ගේ ප්‍රධානත්වයෙන්, මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය, ඉඩම් කොමසාරිස් ජනරාල් දෙපාර්තමේන්තුව ඇතුළු අනෙකුත් අදාළ ආයතනවල නියෝජිතයන්ගෙන් සමන්විත නිලධාරි කමිටුවක් පත් කරනු ලැබ තිබිණි. එම කමිටුවේ නිර්දේශ මත පදනම්ව මේ ගිවිසුම අත්සන් තැබීමට නියමිතය.
ISA වෙත වාර්ෂික දායකත්ව ගාස්තු ගෙවීම සහ CPF අත්සන්
ජාත්‍යන්තර සූර්ය බල සන්ධානය (ISA) වෙත වාර්ෂික දායකත්ව ගාස්තු ගෙවීම සහ ශ්‍රී ලංකාව සහ ජාත්‍යන්තර සූර්ය බල සන්ධානය අතර රටවල් පිළිබඳ හවුල්කාරිත්ව කාර්ය රාමුවට (CPF) අත්සන් තැබීමට ඇමැති මණ්ඩලයේ අනුමැතිය පළවේ. බලශක්ති ඇමැති ඉංජිනේරු කුමාර ජයකොඩි මහතා මේ යෝජනාව ඉදිරිපත් කර තිබේ. ඒ අනුව 2024/2025 මූල්‍ය වර්ෂයේ සිට අමෙරිකානු ඩොලර් 25000ක් වූ වාර්ෂික දායකත්ව මුදල් අඛණ්ඩව ගෙවීමටත් ශ්‍රී ලංකාවේ තාක්ෂණ යෙදවුම් සම්පත් මධ්‍යස්ථානයක් පිහිටුවීමටත් නියමිතය.
කර්මාන්ත ප්‍රවර්ධන පනත සංශෝධනය
1990 අංක 46 දරන කර්මාන්ත ප්‍රවර්ධන පනත සංශෝධනය කිරීමට කැබිනට් අනුමැතිය හිමිව තිබේ. නීති කෙටුම්පත් සම්පාදක විසින් මේ වන විට එකී පනත සංශෝධනය කිරීමේ කටයුතු සිදු කරමින් පවතින අතර, පනත සංශෝධනය කිරීමේ කාර්යය සඳහා වත්මන් අමාත්‍ය මණ්ඩලයේ ප්‍රතිපත්තිමය එකඟතාව ලබා ගැනීමේ අවශ්‍යතාව නීති කෙටුම්පත් සම්පාදක විසින් පෙන්වා දී ඇත. ඒ අනුව, කර්මාන්ත සහ ව්‍යවසායකත්ව සංවර්ධන ඇමැති සුනිල් හඳුන්නෙත්ති මහතා විසින් එකී පනත් කෙටුම්පත සකස් කිරීමේ කාර්යය කඩිනමින් නිම කිරීම සඳහා අමාත්‍ය මණ්ඩලයේ ප්‍රතිපත්තිමය අනුමැතිය ලබා ගැනීමට ඉදිරිපත් කළ යෝජනාවට එකඟතාව පළ කෙරිණි.
තේ පාලන පනත සංශෝධනයට
1957 අංක 51 දරන තේ පාලන පනත සංශෝධනය කිරීමට වැවිලි සහ ප්‍රජා යටිතල පහසුකම් ඇමැති සමන්ත විද්‍යාරත්න මහතා කළ යෝජනාව කැබිනට් මණ්ඩලය අනුමත කර තිබේ.
මේ වන විට එම පනත සංශෝධනය කිරීමේ කටයුතු නීති කෙටුම්පත් සම්පාදක විසින් සිදු කරමින් පවතින අතර එම කටයුතු කඩිනම් කර නිම කිරීම සඳහා අමාත්‍ය මණ්ඩලයේ ප්‍රතිපත්තිමය අනුමැතිය ලැබී ඇත.
කෑගල්ල දිස්ත්‍රික් ලේකම්/දිසාපති විශේෂ ශ්‍රේණියේ නිලධාරි එච්.එම්.ජේ.එම්. හේරත්ට
කෑගල්ල පරිපාලන දිස්ත්‍රික්කයේ දිස්ත්‍රික් ලේකම් – දිසාපති ලෙස රාජ්‍ය පරිපාලන, පළාත් සභා සහ පළාත් පාලන අමාත්‍යාංශයේ අතිරේක ලේකම් තනතුරක සේවය කරන ශ්‍රී ලංකා පරිපාලන සේවයේ විශේෂ ශ්‍රේණියේ නිලධාරි එච්.එම්.ජේ.එම්. හේරත් මහතා පත් කිරීමට රාජ්‍ය පරිපාලන, පළාත් සභා සහ පළාත් පාලන ඇමැති ඒ.එච්.එම්.එච්. අබේරත්න මහතා ඉදිරිපත් කළ යෝජනාවට අනුමැතිය හිමිව ඇත. දිස්ත්‍රික් ලේකම් – දිසාපති ලෙස කටයුතු කළ ජේ.එම්.ආර්.පී. ජයසිංහ මහතා 2025‑02‑01 දින සිට උතුරු මැද පළාත් ප්‍රධාන ලේකම් තනතුරට පත් කර ඇති බැවින් වන පුරප්පාඩුවට හේරත් මහතා පත් කරනු ලැබ තිබේ.
කුරුණෑගල දිස්ත්‍රික් ලේකම්-දිසාපති තනතුර ඩී.එම්.කේ.සී.දිසානායක
කුරුණෑගල පරිපාලන දිස්ත්‍රික්කයේ දිස්ත්‍රික් ලේකම්/දිසාපති තනතුරට වයඹ පළාත් ප්‍රධාන අමාත්‍යාංශයේ ලේකම් වශයෙන් කටයුතු කරනු ලබන ශ්‍රී ලංකා පරිපාලන සේවයේ විශේෂ ශ්‍රේණියේ නිලධාරි ඩී.එම්.කේ.සී. දිසානායක මහතා පත් කිරීමට කැබිනට් අනුමැතිය හිමිව ඇත.
කුරුණෑගල පරිපාලන දිස්ත්‍රික්කයේ දිස්ත්‍රික් ලේකම් – දිසාපති වශයෙන් කටයුතු කළ ආර්.එම්.ආර්. රත්නායක මහතා 2025‑03‑03 දින රාජ්‍ය සේවයෙන් විශ්‍රාම ලබා ඇති බැවින් මේ පත් කිරීම සිදු කෙ‍ෙරන අතර මේ යෝජනාව රාජ්‍ය පරිපාලන, පළාත් සභා සහ පළාත් පාලන ඇමැති ඒ.එච්.එම්.එච්. අබේරත්න මහතා විසින් ඉදිරිපත් කර තිබේ.
