බෝග වගාවන්ට හානි කරන වන සතුන් පිළිබඳ මෙම 15දා පවත්වන සංගණනය වෙනුවෙන් බත්තරමුල්ල, කෘෂිකර්ම අමාත්‍යාංශ පරිශ්‍රය තුළ මෙහෙයුම් මැදිරියක් ඊයේ (11) දින සිට ස්ථාපිත කර ඇත.
මෙම වනසත්ත්ව සංගණනය වඩාත් නිවැරදිව සහ කාර්යක්ෂමව සිදු කිරීමේ අරමුණින් මෙහෙයුම් මැදිරිය ස්ථාපිත කර තිබේ. සත්ත්ව සංගණනයේදී යම් ගැටලුවක් පැනනැගුණහොත් ඒ පිළිබඳ විමසීමක් සිදු කිරීමට මෙම 15දා දක්වා එම මෙහෙයුම් මැදිරිය ක්‍රියාත්මක වෙමින් පවතියි. මෙම සංගණණයේදී වන යම්කිසි ගැටලුවක් වෙතොත් මහජනතාවට මෙහෙයුම් මැදිරියේ දුරකතන අංක 011- 2034336 අමතා විමසීමක් කළ හැකිය.
මෙම 15 වැනි දින පෙරවරු 8.00 සිට 8.05 දක්වා කාලය තුළ දීපව්‍යාප්තව මෙම සංගණනය පැවැත්වීමට නියමිත අතර ඊට අදාළ පත්‍රිකා බෙදාහැරීමේ කටයුතු ද මේ වනවිට සිදුවෙමින් පවතියි. වගාවට හානි සිදු කරන වනසතුන් ප්‍රමාණය සළකුණු කිරීම සඳහා ලබා දෙන පත්‍රිකාව තමන් වෙත ලැබී නොමැතිනම්, ඒ පිළිබඳ කලබල නොවී, 15 වැනි දින වෙන් කර ඇති අදාළ කාලය තුළ පැමිණෙන සතුන් පිළිබඳ යම් සටහනක් තබා ගන්නා ලෙස කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශය දැනුම් දෙයි.
වනසතුන්ගෙන් වගාවට සිදුවන හානි වළක්වා ගනිමින් ඒ සඳහා විසඳුම් සෙවීමේ මූලික පියවරක් වශයෙන් පසුගියදා කෘෂිකර්ම, පශු සම්පත්, ඉඩම් සහ වාරිමාර්ග ඇමැති කේ.ඩී. ලාල්කාන්ත මහතාගේ උපදෙස් පරිදි වන සත්ත්ව හානි අවම කිරීමට අදාළ විශේෂ කමිටුවක් පත්කරන ලදි. එම විශේෂ කමිටුවේ උපදෙස් පරිදි වගාවට වැඩි වශයෙන් හානි කරන වඳුරා, රිළවා, මොනරා සහ දඞුලේනා යන සත්ත්වයන් කොපමණ ප්‍රමාණයක් සිටීදැයි ගණනය කිරීම සඳහා වන සත්ත්ව සංගණනයක් සිදු කිරීමට යෝජනා විය. ප්‍රජා සහභාගිත්වයෙන් සිදු කරනු ලබන මෙම සංගණනයට අදාළ කාලය තුළ සහයෝගය පළ කරන ලෙස කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශය සමස්ත ජනතාවගෙන් ඉල්ලීමක් කරයි.
