කොළඹ, මහනුවර, ගාල්ල, කඩුවෙල මහා නගර සභාවවලට සහ හෝමාගම ප්‍රාදේශීය සභාව ඇතුළුව දිවයිනේ බහුතර පළාත් පාලන ආයතන සඳහා එක්සත් ජනරජ පෙරමුණ ‘පැන්සල’ ලකුණින් තරග කරන බව එම පක්ෂය පවසයි.
පාඨලී චම්පික රණවක මහතාගේ නායකත්වයෙන් ‘පැන්සල’ ලකුණින්, එක්සත් ජනරජ පෙරමුණ මෙවර පළාත් පාලන මැතිවරණයට තරග කිරීමට මේ වන විටත් බලයලත් නිලධාරීන් පත්කර අවශ්‍ය කටයුතු සිදු කරමින් තිබෙන බව සඳහන් කරයි.
‘පැන්සල’ ලකුණින් ඉදිරිපත් වන පළාත් පාලන ආයතන සඳහා මේ මස 19 වැනිදා දිවයින පුරා නාමයෝජනා භාරදීමට අවශ්‍ය කටයුතු මේ වන විට සැලසුම් කර ඇති බවද එක්සත් ජනරජ පෙරමුණ පවසයි.
‘පැන්සල’ ලකුණින් තරග කිරීම සඳහා තරුණ හා විශේෂයෙන්ම බහුතර කාන්තාවන් නාමයෝජනා අපේක්ෂාවෙන් අයදුම්පත් යොමු කර ඇති අතර, නාමයෝජනා ලබාගැනීම සඳහා අයදුම්පත් යොමු කර තිබු අපේක්ෂකයින් සම්මුඛ පරීක්ෂණයකින් ඔවුන්ගේ අධ්‍යාපන සුදුසුකම්, වෘත්තීය සුදුසුකම් හා සමාජ දේශපාලන අත්දැකීම් පිළිබඳ අවධානය යොමු කර තෝරාගෙන ජ්‍යෙෂ්ඨ අත්දැකීම් සහිත පළපුරුදු පිරිසක් මෙන්ම අලුත් තරුණ හා කාන්තා පිරිසක් ද මෙවර මැතිවරණයේදී පැන්සලෙන් තරග කිරීමට ඉදිරිපත් කර තිබෙන බව එම පක්ෂය සඳහන් කරයි.
මැතිවරණ දිනය ප්‍රකාශ කළ පසු ‘පැන්සල’ ලකුණෙන් පාලනය වන පළාත් පාලන ආයතන තුළ ක්‍රියාත්මක කිරීමට අපේක්ෂිත ප්‍රතිපත්තිමය කරුණු ඇතුළත් සවිස්තරාත්මක සිවු අවුරුදු වැඩපිළිවෙළක් එළිදැක්වීමට නියමිත අතර මෙම වැඩපිළිවෙළ මඟින් ග්‍රාමීය සංවර්ධනය, ආදර්ශමත් හා නවීන පළාත් පාලන ආයතන ගොඩනැඟීම සඳහා අවධානය යොමු කර තිබෙන බවද එක්සත් ජනරජ පෙරමුණ පවසයි.
