අදානි සමාගම සම්බන්ධයෙන් ආණ්ඩුවේ ස්ථාවරයේ කිසිම වෙනසක් සිදුව නැතැයි කැබිනට් ප්‍රකාශක, ඇමැති, වෛද්‍ය නලින්ද ජයතිස්ස මහතා පැවසීය.
රජයේ ප්‍රවෘත්ති දෙපාර්තමේන්තුවේ ඊයේ (11) පැවති කැබිනට් තීරණ දැනුම්දීමේ මාධ්‍ය හමුවේදී ඇමැතිවරයා මේ බව සඳහන් කළේය. ජනාධිපතිවරයා ඉන්දියාවට යන්න කලින් එකක්, ගියාට පස්සේ තවත් එකක් නොකියූ බව හෙතෙම කීවේය. ඇමැතිවරයා වැඩිදුරටත් මෙසේ ද පැවසීය.
“අපේ ස්ථාවරය තමයි ආයෝජනයට විවෘතයි. අදානි සමාගමත් අපට ගැළපෙන ආයෝජන ගෙන එනවා නම් එය විවෘතව සාකච්ඡා කරන්න අපි සූදානම්. හැබැයි නිශ්චිත සුළං විදුලිබල ව්‍යාපෘතිය සම්බන්ධයෙන් එහි ගාස්තු ගැන රජයට අදහසක් තිබෙනවා. මෙහි ගාස්තු ඉහළයි. අපේ ඉල්ලීම එම ගාස්තු සංශෝධනය විය යුතුයි කියලා. ගාස්තු සංශෝධනය කරගෙන එනවා නම් ඒ ගැන සාකච්ඡා කරන්න පුළුවන්. ගාස්තු සංශෝධනය කරන්න ඔවුන් සූදානම් නැතිනම් ඔවුන්ට තීරණයක් ගන්න පුළුවන් එම ව්‍යාපෘතිය අතහරින්න. ඒකෙන් අදහස් වෙන්නේ නැහැ ආයෝජකයෝ සියල්ලම ලංකාවෙන් යනවා කියලා. කවර ආයෝජකයකු වුවත් ඒ බර අපට දරාගන්න බැරි නම් අවසානයේ ඒ බර අපට ජනතාවගේ කරමත පටවන්න සිදුවෙනවා නම් රජය ඒ සම්බන්ධයෙන් තීන්දුවක් ගන්නවා. ජනාධිපතිවරයා ඉන්දියාවේ ගමනේදීත් පැහැදිලිවම කිව්වේ මේ ව්‍යාපෘතිය සම්බන්ධයෙන් අපේ ස්ථාවරය. ඒ අනුව තමයි අදානි සමාගම යම් තීන්දුවකට එළැඹුණේ. ඒ අය තමන්ගේ ගාස්තු සංශෝධනය කරගෙන රටේ ජනතාවට සාධාරණ මුදලකට සහ ඉන්දියාවේදී ඒ අය කරන ආයෝජනයට සාපේක්ෂව සාධාරණ මුදලකට ලංකාවට අරගෙන එනවා නම් සාකච්ඡා කරන්න සූදානම්. එහෙම නැතිව අපි එක සමාගමක්, එක රටක් මත යැපෙන්න සූදානම් නැහැ. ඕනෑම දෙයක් සාකච්ඡාවට ගන්නේ ඒ මඟින් රටට සහ ජනතාවට වෙන වාසිය දිහා බලලා. වෙන කිසිම අභිලාෂයක් නැහැ. අපට තිබෙන්නේ ජනවරම අනුව කටයුතු කරන්න. මේ ව්‍යාපෘති කියන්නේ රටේ ජනතාවට ගෙවන්න වෙන ව්‍යාපෘති.
