ලෝක වෙළෙඳපොළේ ශ්‍රී ලංකා ව්‍යවසායකයන්ගේ කොටස අත්පත් කර ගැනීමට අවශ්‍ය සහාය ලබා දීමට සැලසුම් කර ඇති බව ජනාධිපති අනුර කුමාර දිසානායක මහතා පැවසීය.
ජනාධිපතිවරයා එසේ ප්‍රකාශ කළේ කොළඹ ෂැංග්‍රිලා හෝටලයේ පෙරේදා (10) පැවති තරුණ ලාංකේය ව්‍යවසායක මණ්ඩලයේ 26 වන සමුළුවට එක්වෙමිනි.
තානාපතිවරුන් සහ ව්‍යවසායකයන් ඒකාබද්ධ කිරීමේ ක්‍රියාවලියක් යටතේ ලෝක වෙළෙඳපොළ තරණය කිරීමට ශක්තිමත් වැඩපිළිවෙළක් ආණ්ඩුව සතු බව ද ජනාධිපතිවරයා එහිදී පෙන්වා දුන්නේය. ජනතාවගේ සෑම රුපියලක්ම භාවිත කිරීමේදී දේව කාර්යයක් ලෙස සලකා කටයුතු කරන බවට තම රජය සහතික වන බව ද ජනාධිපතිවරයා මෙහිදී අවධාරණය කළේය.
ආයෝජකයන්ට කිසිම කොමිස් මුදලක් ලබාදීමෙන් තොරව ආයෝජනය කළ හැකි පරිසරයක් නිර්මාණය කර ඇති බව ද ජනාධිපතිවරයා පෙන්වා දුන්නේය.
එබැවින් වත්මන් රාජ්‍ය පාලනය අවසානයේදී විනාශකාරී දේශපාලනයක් නැවත ඇති නොවන බව ජනාධිපති අනුර කුමාර දිසානායක මහතා මෙහිදී තහවුරු කර සිටියේය.
තිරිංග යොදා සිර කර තිබෙන ආර්ථිකය වෙනුවට යම් තරමක නිදහස් චලනයක් ඇති ආර්ථිකයක් නිර්මාණය කිරීමට මෙවර අයවැයෙන් කටයුතු කර තිබෙන බව ජනාධිපති අනුර කුමාර දිසානායක මහතා ප්‍රකාශ කළේය.
ආර්ථිකයෙහි නිදහස් චලනයක් ඇතිකිරීමෙන් යම් සංවර්ධන වේගයක් අත්පත් කර ගත හැකි බව පෙන්වා දුන් ජනාධිපතිවරයා ඊට සරිලන පරිදි ආර්ථිකයට විශාල කම්පනයක් නොදැනෙන ලෙස මෙවර අයවැය සකස් කළ බවද කියා සිටියේය. ආර්ථිකය පිළිබඳ තීන්දු තීරණ ගැනීමේදී රුපියලට දරාගත නොහැකි තෙරපුමක් ඇති නොවන සේ කටයුතු කිරීමට වත්මන් රජය සංවේදී වූ බවත්, ජාත්‍යන්තර මූල්‍ය අරමුදලේ නිර්දේශවලට අනුකූලව ද යම් යම් තීන්දු ගැනීමට සිදු වූ බවත් ජනාධිපතිවරයා මෙහිදී සඳහන් කළේය.
ආර්ථිකය පිළිබඳ විශ්වාසය බිඳවැටුණු රාජ්‍යයක එම විශ්වාසය යළි ඇති කිරීමට වත්මන් රජය නිවැරදි තීන්දු තීරණ ගෙන ඇති බවත්, ඒ නිසා බංකොලොත් වූ රාජ්‍යය නිල වශයෙන් බංකොලොත්භාවයෙන් මුදාගැනීමට හැකි වූ බවත් ජනාධිපති අනුර කුමාර දිසානායක මහතා වැඩිදුරටත් අනාවරණය කළේය.
රජය ගෙන යන ආර්ථික වැඩපිළිවෙළ නිසා ජපන් රජයෙන් නවතා තිබූ ආර්ථිකමය වශයෙන් වැදගත් වන ව්‍යාපෘති 11ක සහ චීන රජයෙන් නවතා තිබූ ව්‍යාපෘති 76ක වැඩ නැවත ආරම්භ කිරීමට කටයුතු කර ඇත. සැලකිය යුතු ප්‍රමාණයකින් ආර්ථික ස්ථායීත්වයක් ආයෝජකයන් වෙත ලබා දීමට වත්මන් රජය මේ වන විටත් කටයුතු කර තිබේ. එබැවින්, මන්නාරමේ මෙගාවොට් 50ක සුළං විදුලි බලාගාරයක් ඉදිකිරීමටත්, පුනර්ජනනීය බල ශක්තිය වෙනුවෙන් මහා පරිමාණ ආයෝජන රැගෙන ඒමටත් වත්මන් රජයට හැකිව තිබේ.
එසේම, තරුණ ව්‍යවසායකයන්ට ශ්‍රී ලංකාවේ පමණක් නොව ජාත්‍යන්තර වෙළෙඳපොළටත් පියමං කිරීමට අවශ්‍ය ශක්තිය ලබාදීමට වත්මන් රජය සූදානම් බවද ජනාධිපතිවරයා කියා සිටියේය.
ලංකාවේ ප්‍රබලතම දේශපාලන ස්ථාවරත්වය සහිත පාලනය සිය රජය විසින් ගොඩනඟනු ලැබ තිබෙන බව ප්‍රකාශ කළ ජනාධිපතිවරයා, මෙතෙක් කල් බිහි වූ පාර්ලිමේන්තු තුළ මෙරට පුරවැසියා දුටුවේ වරෙක විපක්ෂය නියෝජනය කරන මන්ත්‍රීවරයා පසුව ආණ්ඩු පක්ෂය නියෝජනය කිරීමත්, වරෙක ආණ්ඩුව නියෝජනය කරන මන්ත්‍රීවරයා හිටි හැටියේ විපක්ෂය නියෝජනය කිරීමත් බවද පැවසීය. එවැනි තත්ත්වයක් වත්මන් පාර්ලිමේන්තුවේ නොමැති බව පෙන්වා දුන් ජනාධිපතිවරයා ආණ්ඩුව හා විපක්ෂය යනුවෙන් නිශ්චිත වෙන්වීමක් ඇති බව ද පෙන්වා දුන්නේය. එය දේශපාලන ස්ථාවරභාවය පෙන්වීමට හොඳම නිදසුනක් බවද ජනාධිපති අනුර කුමාර දිසානායක මහතා කියා සිටියේය. ආදර්ශවත් දේශපාලනයක් ශ්‍රී ලංකාවේ මේ වන විට ආරම්භ කර ඇති බව ද ජනාධිපති අනුර කුමාර දිසානායක මහතා මෙහිදී සිහිපත් කළේය.
රජයේ මැතිඇමැතිවරු, රාජ්‍ය තාන්ත්‍රිකයෝ සහ තරුණ ව්‍යවසායකයෝ පිරිසක් මේ අවස්ථාවට එක්ව සිටියහ.
