සේවා දායකත්වයේ දී ඇතිවන ගැටලු වළක්වා ගනිමින් සේවාවන් විධිමත්ව පවත්වා ගැනීමට ගිනි නිවීමේ සේවා සඳහා ජාතික සැලැස්මක් සකස් කිරීමට රජයේ අවධානය යොමුව ඇති බව පළාත් සභා සහ පළාත් පාලන නියෝජ්‍ය ඇමැති ප්‍රභා රුවන් සෙනරත් මහතා අවධාරණය කළේය.
ඒ මහතා මේ බව පෙන්වා දුන්නේ පෙරේදා (10) කොළඹ දිස්ත්‍රික් ලේකම් කාර්යාලයේ දී දිවයිනේ සියලු ගිනි නිවීම් ඒකකවල ප්‍රධාන නිලධාරින් සමඟ පැවති සාකච්ඡාවකදීය.
එළැඹෙන බක් මාසයේ දී පැවැත්වීමට නියමිත දළදා ප්‍රදර්ශනය වෙනුවෙන් ගිනි නිවීම් සේවා අංශවලින් සිදුවිය යුතු කාර්ය පිළිබඳව ද මෙහිදී සාකච්ඡාවට ලක්විය.
ඇමැතිවරයා පෙන්වා දුන්නේ ඒ වෙනුවෙන් පවතින ගැටලු අවම කරගනිමින් වෙනත් උත්සව අවස්ථාවල දී සැපයූ සේවයට වඩා කාර්යක්ෂම සහ ගුණාත්මක සේවාවක් ලබාදීමට කටයුතු කිරීම වගකීමක් පවතින බවයි. මානව සම්පත් සහ තාක්ෂණික හිඟය හේතුවෙන් කාර්යක්ෂම සේවාවක් සැපයීම විශාල අභියෝගයක්ව ඇතැයි මහනුවර ගිනි නිවීම් සේවා ඒකකයේ නිලධාරීහු සඳහන් කළහ.
ඊට කරුණු දක්වමින් අනෙකුත් දිසා ගිනි නිවීම් ඒකක නිලධාරින් ද පෙන්වා දුන්නේ මානව සම්පත් හිඟය, තාක්ෂණික ගැටලු සහ ජල සැපයුමේ දී ඇතිවන ගැටලු හේතුවෙන් සිය සේවා සිදු කරන්නේ දැඩි දුෂ්කරතා මැද බවයි. 2018 වර්ෂයෙන් පසු සේවා ව්‍යවස්ථාවක් ස්ථාපිත කර නොතිබීම, සේවාවේ ගැටලු පැන නැගීමට හේතු වී ඇති බව මේ සාකච්ඡාවේ දී හඳුනා ගැනිණි.
රාජ්‍ය පරිපාලන, පළාත් සභා සහ පළාත් පාලන අමාත්‍යාංශ ලේකම් එස්. ආලෝක බණ්ඩාර, පළාත් සභා සහ පළාත් පාලන අතිරේක ලේකම් මහේෂිකා කොඩිප්පිලිආරච්චි, පළාත් පාලන සහකාර ලේකම් යසන්ති අබේවික්‍රම මහත්ම මහත්මීන් ඇතුළු අමාත්‍යාංශ නිලධාරිහු පිරිසක් මේ සාකච්ඡාවට සහභාගි වී සිටියහ.
