ගතවූ කාලයේ ශ්‍රී ලාංකිකයන් 6,160කට ඊශ්‍රායලයේ ඉදිකිරීම් ක්ෂේත්‍රයේ රැකියා වරම් හිමිව තිබේ.
ඊශ්‍රායල් රජය හා ශ්‍රී ලංකා රජය අතර ඇතිකර ගත් අවබෝධතා ගිවිසුම අනුව ශ්‍රී ලාංකිකයන් 6,160 දෙනෙකු සඳහා ඊශ්‍රායලයේ ඉදිකිරීම් ක්ෂේත්‍රයේ රැකියා අවස්ථා හිමිව තිබෙන අතර 2025 වසරේ ජනවාරි සිට මේ දක්වා ගතවූ කාලයේ ශ්‍රී ලාංකික තරුණයන් 1,082 දෙනෙකු ඊශ්‍රායලයේ ඉදිකිරීම් රැකියාවලට පිටත්ව ගොස් තිබෙන බව ශ්‍රී ලංකා විදේශ සේවා නියුක්ති කාර්යාංශය පවසයි.
මේ අතර, ඊශ්‍රායලයේ ඉදිකිරීම් ක්ෂේත්‍රයේ රැකියා හිමිවූ රැකියාලාභීන් 41 දෙනෙකු වෙත ගුවන් ටිකට්පත් පිරිනැමීම විදේශ සේවා නියුක්ති කාර්යාංශයේ සභාපති කෝශල වික්‍රමසිංහ මහතාගේ ප්‍රධානත්වයෙන් සිදුවූ අතර මේ පිරිස එදිනම ඊශ්‍රායලය බලා පිටත්ව ගියහ. එසේම තවත් 177 දෙ‍ෙනක් ඊශ්‍රායලයේ ඉදිකිරීම් රැකියාවලට පිටත්ව යෑමට සූදානමින් සිටිති.
නිපුණතා සහිත ශ්‍රමිකයන් ඉහළ වැටුප් සහිත වෘත්තීය රැකියා සඳහා විදේශගත කිරීමට කාර්යාංශය අපේක්ෂා කරන අතර, ඒ අනුව පුහුණු ශ්‍රමිකයන් රැකියා සඳහා විදෙස් රටවලට යොමු කිරීමට මේ වනවිට කටයුතු කරමින් පවතියි.
සාම්ප්‍රදායික රාමුවෙන් බැහැරට යමින් යුරෝපානු හා නැඟෙනහිර ආසියානු රටවලට ශ්‍රමිකයන් යොමුවීමේ ප්‍රවණතාවක් ද පසුගිය වසර කිහිපයේ ඇතිවෙමින් පවතින අතර, ඒ අනුව ඊශ්‍රායලයේ රැකියා සඳහා යොමුවීමට ද ශ්‍රී ලාංකිකයන්ගේ වැඩි උනන්දුවක් පවතින බව විදේශ සේවා නියුක්ති කාර්යාංශය පෙන්වාදෙයි.
