අධිවේගී මාර්ගයේ සිදුවන අනතුරුවලදී ජීවිත ගලවා ගැනීම් සහ ගිනි නිවීමේ සේවා ඇතුළු සුවිශේෂී ආරක්ෂක කටයුතු සඳහා නැවතත් පොලිස් විශේෂ කාර්ය බළකායේ සේවාව ලබාගැනීමට මහාමාර්ග අමාත්‍යාංශය පියවර ගෙන තිබේ.
මුල සිටම අධිවේගී මාර්ගයේ මෙම සේවා කටයුතු පොලිස් විශේෂ කාර්ය බළකාය විසින් සිදු කළද දේශබන්දු තෙන්නකෝන් මහතා පොලිස්පති ලෙස පත්වීමෙන් පසු එය ඉවත් කරනු ලැබීය. ඒ මත්ද්‍රව්‍ය හා අපරාධ මෙහෙයුම් සඳහා නිලධාරීන් හිඟ බව පවසමිනි.
මේ තත්ත්වය මත අධිවේගී මාර්ගවල මෙම සේවා කටයුතු පුද්ගලික ආරක්ෂක සමාගමක ආරක්ෂකයින් මඟින් සපුරා ගැනීමට පියවර ගෙන තිබුණි. එම සමාගම හා පැවති අවබෝධතා ගිවිසුම පෙරේදා (10) මධ්‍යම රාත්‍රීයෙන් අවසන්වීමෙන් පසු පොලිස් විශේෂ කාර්ය බළකාය නැවත එම සේවා කටයුතු සඳහා යෙදවීමට කළ ඉල්ලීමට පොලිස් දෙපාර්තමේන්තුව පාර්ශ්වයෙන් යහපත් ප්‍රතිචාරයක් ලැබී තිබේ. ඒ අනුව පෙරේදා (10) මධ්‍යම රාත්‍රීයේ සිට පොලිස් විශේෂ කාර්ය බළකා නිලධාරීන් අධිවේගී මාර්ගයේ සේවා කටයුතු සඳහා යෙදවූ බව විශේෂ කාර්ය බළකායේ උසස් නිලධාරියෙක් පැවසීය.
විධිමත් ආරක්ෂාවක් ලබාදීම, සිදුවන හදිසි අනතුරුවලදී ජීවිත ගලවා ගැනීම් සහ ගිනි නිවීම් සේවා කටයුතු සඳහා සහාය ලබා ගැනීමට මේ පියවර ගත් බව මාර්ග සංවර්ධන අධිකාරියේ අධ්‍යක්ෂ ජනරාල් එෆ්. එම්. පී. සූරියබණ්ඩාර මහතා ‘දිනමිණ’ ඒ සම්බන්ධයෙන් කළ විමසුමකදී පැවැසීය.
දක්ෂිණ අධිවේගී මාර්ගය, දක්ෂිණ අධිවේගී මාර්ග දිගුව, කොළඹ පිටත වටරවුම් මාර්ගය, නව කැලණි පාලම සහ කොළඹ කටුනායක මාර්ගයන්හී වන හදිසි අනතුරුවලදී ජීවිත ගලවා ගැනීම් සහ ගිනි නිවීම් සේවා කටයුතු සඳහා මෙම නිලධාරීන් යෙදවීමට පියවර ගෙන තිබේ.
මීට අමතරව විශේෂයෙන් හඳුනාගෙන ඇති කොළඹ කටුනායක මාර්ගයේ නව කැලණි පාළම, කොළඹ පිටත වටරවුම් මාර්ගයෙහි විවිධ මත්ද්‍රව්‍යවලට ඇබ්බැහි වූවන් ඉකුත් කාලය පුරා අධිවේගී මාර්ගයේ දේපොළ සොරා ගැනීම් සම්බන්ධයෙන් ද අවධානය යොමු කර එම දේපොළ ආරක්ෂා කිරීම සඳහා නිලධාරීන් 20 දෙනෙකුගෙන් සමන්විත කණ්ඩායමක් යෙදවීමට නියමිතව ඇත.
