කතරගම මැණික් ගඟට යාබදව ඇති රජයේ රක්ෂිතයකට අයත් ඉඩම් කොටසක නීති විරෝධි ලෙස ඉදිකර ඇති කාමර 12ක් පමණ වූ ගොඩනැඟිල්ල සම්බන්ධයෙන් කෙරෙන විමර්ශනයට අදාළව කතරගම කිරිවෙහෙර රජමහා විහාරාධිපති කොබවක ධම්මින්ද හිමියන්ගෙන් අපරාධ පරීක්ෂණ දෙපාර්තමේන්තුව ඊයේ (11) පැය හතක පමණ කාලයක් ප්‍රකාශයක් සටහන් කරගෙන තිබේ.
මේ සම්බන්ධයෙන් කතරගම බස්නායක නිලමේ ඩිෂාන් ගුණසේකර මහතාගෙන් අපරාධ පරීක්ෂණ දෙපාර්තමේන්තුව පෙරේදා (10) පැය තුනහමාරක කාලයක් ප්‍රකාශයක් සටහන් කරගෙන තිබුණි.
මෙතෙක් කලක් හිමිකරුවකු හඳුනාගැනීමට නොහැකිව තිබුණු මෙම නි‍ෙවස ඉදිකරනු ලැබුවේ කවුරුන්දැයි එහි දී වාචික සාක්ෂියකින් හෙළිකරනු ලබන්නේ ඩිෂාන් ගුණසේකර මහතා විසිනි. ඊට අනුව එම නි‍ෙවස ඉදිකර ඇත්තේ කතරගම කිරිවෙහෙර විහාරාධිපතිව වැඩ සිටි අපවත්වී වදාළ සෝරත හිමියන් විසිනි. මහින්ද රාජපක්ෂ මහතා වෙනුවෙන් එම නි‍ෙවස ඉදිකර ඇත්තේ යුද්ධය අවසන්වීමෙන් අනතුරුවය.
ඒ සම්බන්ධයෙන් නිලමේවරයා විසින් ලබාදුන් ප්‍රකාශවල ඇත්ත නැත්ත ගැන දීර්ඝ ලෙස විමර්ශනයකට ලක්කරන බවත් කතරගම කිරිවෙහෙර රජමහා විහාරයේ වත්මන් නායක හිමියන්ගෙන් ප්‍රකාශයක් සටහන් කර ගැනීමට සිදුවූයේ ඒ නිසා බවත් උසස් පොලිස් නිලධාරියකු පැවසීය. ප්‍රශ්නගත නි‍ෙවස සම්බන්ධයෙන් නිලමේවරයා විසින් පවසන පුද්ගලයන් මියගොස් සහ රෝගීව සිටින අය බව ද එම නිලධාරියා කීය. මෙම නි‍ෙවසට විදුලිය සහ ජලය ලබාගෙන ඇත්තේ ජී. රාජපක්ෂ නමැති අයකුගේ නමිනි. එවකට කිරිවෙහෙර විහාරාධිපති විසින් මෙම නි‍ෙවස මහින්ද රාජපක්ෂ මහතා වෙනුවෙන් ඉදිකළේ නම් විදුලිය හා ජලය ලබාගැනීමට තිබුණේ විහාරස්ථානයේ නමින් හෝ උන්වහන්සේගේ නමින් බවත් මේ කියන ජී. රාජපක්ෂ යනු කවුරුන්දැයි පැහැදිලිව අනාවරණය වී නැති බවත් එම නිලධාරියා පැවසීය. මේ නි‍ෙවස සම්බන්ධයෙන් හිටපු ජනාධිපති ගෝඨාභය රාජපක්ෂ මහතාගෙන් ද අපරාධ පරීක්ෂණ දෙපාර්තමේන්තුව විසින් මෙයට පෙර ප්‍රශ්න කරනු ලැබීය.
මෙම ඉදිකිරීම සිදුකර ඇත්තේ 2010 වසරට පෙරදීය. අපරාධ පරීක්ෂණ දෙපාර්තමේන්තුව විසින් කර ඇති විමර්ශනවලින් අනාවරණය වී ඇත්තේ එම ඉදිකිරීම් හමුදාවේ කණ්ඩායමකගේ ශ්‍රමදායකත්වයෙන් සිදුකර ඇති බවය. ඉදිකිරීම්වලින් පසු එම ගොඩනැඟිල්ල බලාකියාගෙන සිට ඇතැයි පැවසෙන්නේ නාවික හමුදාවේ සාමාජිකයෙකි. හිටපු ජනාධිපති මහින්ද රාජපක්ෂ මහතාගේ පුතකු වන යෝෂිත රාජපක්ෂ මහතාගේ ආරක්ෂාවට යොදවා සිට ඇතැයි පැවසෙන්නේ එම නාවික හමුදා සාමාජිකයාය. ඒ සම්බන්ධයෙන් යෝෂිත රාජපක්ෂ මහතාගෙන් ද අපරාධ පරීක්ෂණ දෙපාර්තමේන්තුව විසින් ප්‍රශ්න කර තිබුණි. යෝෂිත රාජපක්ෂ මහතාගෙන් ප්‍රශ්න කිරීමට පෙර හිටපු ජනාධිපති මහින්ද රාජපක්ෂ මහතාගේ පෞද්ගලික ආරක්ෂක නිලධාරියා වූ මේජර් නෙවිල් වන්නිආරච්චි මහතාගෙන් ද අපරාධ පරීක්ෂණ දෙපාර්තමේන්තුව ප්‍රශ්න කළේය.
ප්‍රශ්න කිරීමට ලක්වූ සෑම අයකුම පවසා තිබුණේ එම ගොඩනැඟිල්ල සම්බන්ධයෙන් තමන් කිසිවක් නොදන්නා බවකි. මහින්ද රාජපක්ෂ මහතා වෙනුවෙන් මෙම නි‍ෙවස ඉදිකර ඇති බව සඳහන් කරන බැවින් ඔහුගෙන් ද ඉදිරියේ දී මේ සම්බන්ධයෙන් ප්‍රකාශයක් ලබාගැනීමට අපරාධ පරීක්ෂණ දෙපාර්තමේන්තුව සූදානමින් සිටියි.
