කොළඹ සෞන්දර්ය කලා විශ්වවිද්‍යාලයේ රූමත් සිසුවියක බස් රථයකින් ගමන් කරමින් සිටියදී ජංගම දුරකතනයෙන් වීඩියෝ ගත කර ලිංගික අතවර සිදු කල පුද්ගලයකු සිසුවියගේ කෑගැසීමත් සමඟ බස් රථයෙන් බැස පලායාමට තැත් කිරීමේදී අවට පිරිස් විසින් අල්ලා කුරුඳුවත්ත පොලීසියට භාරදීමට කටයුතු කර ඇත.
අත්අඩංගුවට ගත් සැකකරුගේ ජංගම දුරකතනයේ ඔහු ඒ ආකාරයෙන් ලබාගත් වෙනත් තරුණියන්ගේ ලිංගික දර්ශන තිහකට අධික ප්‍රමාණයක් ද ඇතුළත්ව තිබූ බවද පොලීසිය සඳහන් කරයි.
රාජගිරිය සෞන්දර්ය කලා විශ්වවිද්‍යාලයට අයත් නේවාසිකාගාරයේ රැඳී සිටින පැමිණිලිකාර සිසුවිය මාර්ග අංක 177 කඩුවෙල- කොල්ලුපිටිය බස් රථයෙන් සෞන්දර්ය කලා විශ්වවිද්‍යාලය වෙත පැමිණෙමින් සිටියදී එම බස් රථයේම පැමිණෙමින් සිටි සැකකරු ඇය අසුන්ගෙන සිටින ස්ථානයේ රැඳී සිට ජංගම දුරකතනය අතදරාගෙන මෙම ලිංගික අතවරය සිදු කර තිබූ බව පොලිස් විමර්ශනවලදී අනාවරණය වී ඇත.
බස් රථයේ හිඳ ගැනීමට අසුන් ඕන තරම් තිබියදී සැකකරු අසුන් නොගෙන සිසුවිය සිටි ස්ථානයේ රැඳී සිටිමින් අත රැඳී ජංගම දුරකතනය ඇයගේ හිසට ඉහළින් බස් රථයේ භාණ්ඩ රඳවනය අසල තබාගෙන මෙම අපරාධය සිදු කර ඇති බව පොලීසිය කියයි.
බස් රථයේ අසුන් තිබියදී එම පුද්ගලයා අසුන් නොගැනීම සම්බන්ධයෙන් විමසිලිමත් වූ සිසුවිය නෙළුම් කුලුන අසලින් බැසීමට සූදානම්ව තවදුරටත් විමසිලිමත්වීමේදී එම පුද්ගලයාගේ ජංගම දුරකතනය ක්‍රියාත්මක වෙමින් තමන් අසුන්ගෙන සිටි ස්ථානයටට ඉහළින් රඳවාගෙන සිටින අයුරු දැක ඒ බව බස් රථ රියැදුරුට දැනුම් දීමත් සමඟම එම පුද්ගලයා ජංගම දුරකතනයේ සටහන් දර්ශන මකාදමා බස් රථයෙන් බැස පලායාමට උත්සාහ දරා ඇතැයි පොලිසිය කියයි.
ඒ සමගම බස් රථයෙන් බැස ඇති සිසුවියන් එම පුද්ගලයා පසුපස හඹා යමින් කෑ ගසා ඇති අතර රැස්වූ පිරිස් එම පුද්ගලයා රඳවාගෙන 119 පොලිස් හදිසි ඇමතුම් අංශය හරහා කුරුඳුවත්ත පොලිසියට කරන ලද දැනුම් දීමක් අනුව සැකකරු අත්අඩංගුවට ගෙන ඇත.
එම පුද්ගලයා පොලිසියට රැගෙන ඒමෙන් අනතුරුව ඔහු සතුව තිබූ ජංගම දුරකථනය පරික්ෂා කිරීමේදී එම අවස්ථාවේදී සිසුවියගෙන් ලබාගෙන තිබූ දර්ශන ඔහු විසින් මකා දමා තිබූ බවත් ඔහු මීට පෙර වෙනත් බස් රථ වලින් ගමන් කරමින් සිටියදී ඒ ආකාරයෙන් ලබා ගත් තරුණියන්ගේ ලිංගික දර්ශන ජංගම දුරකථනයේ සටහන්ව තිබූ බවත් පොලිස් විමර්ශනවලදී වැඩිදුරටත් හෙළි වී ඇත. අත්අඩංගුවට ගත් සැකකරු රාජගිරිය ප්‍රදේශයේ පදිංචි 46 හැවිරිදි පුද්ගලයෙකු බවත් මීට පෙර පුද්ගලික සමාගමක අධ්‍යක්ෂවරයෙකු වශයෙන් කටයුතුකර තිබෙන එම පුද්ගලයා මේ වනවිට බ්‍රෝකර්වරයකු වශයෙන් රැකියාව කරන බවත් පොලීසිය කියයි. ඔහුගේ බිරිය පිළිකා රෝගයෙන් පෙළෙන තැනැත්තියක බවත් ඒ හේතුවෙන් ශරීරයේ අවයව ඉවත් කළ තැනැත්තියක බවත් වැඩිදුරටත් අනාවරණය වූ බව පොලිසිය කියයි.
