මෙරට සංචාරයක් සඳහා පැමිණි විදේශිකයන් පිරිසක් ගමන් ගත් බස් රථයකට ඉදිරියට ගමන් ගැනීමට නොහැකි වන සේ මහනුවර රජපිහිල්ල මාවතේදී ත්‍රිරෝද රථයක් හරස් කර එහි රියැදුරුට හා සංචාරක මඟ පෙන්වන්නාට පරුෂ වචනයෙන් බැණ වැදී තර්ජනය කළ පුද්ගලයකු මහනුවර පොලීසිය මඟින් ඊයේ (11) සැකපිට අත්අඩංගුවට ගනු ලැබ තිබේ.
ත්‍රිරෝද රථ රියැදුරකු වන සැකකරු රජපිහිල්ල මාවතේම පදිංචිකරුවකු බව පොලීසිය පවසයි.
බස් රථයේ ගමන් ගත් විදේශිකයන් සහ සංචාරක මඟ පෙන්වන්නා අදාළ දර්ශන වීඩියෝ ගත කර සමාජ මාධ්‍යයට මුදාහැර තිබියදී ඒ ඔස්සේ පරීක්ෂණ කළ පොලීසිය සැකකරු අත්අඩංගුවට ගෙන ඇත.
සිද්ධිය සම්බන්ධයෙන් බස් රථයේ රියැදුරුගෙන් ද ප්‍රකාශයක් ලබා ගැනීමට පොලීසිය පියවර ගෙන තිබේ.
අයුතු අවහිරය සහ සාපරාධී බලහත්කාරය යන චෝදනා යටතේ සැකකරු අධිකරණයට ඉදිරිපත් කරන බව පොලීසිය පවසයි.
සිද්ධිය සම්බන්ධයෙන් මහනුවර පොලිස් මූලස්ථානාධිපති ප්‍රධාන පොලිස් පරීක්ෂක රසික සම්පත් මහතාගේ මෙහෙයවීමෙන් පරීක්ෂණ පැවැත්වෙයි.
