කුරුණෑගල ප්‍රදේශයේ පවත්වාගෙන ගිය ‘එරාමිරකල් ජෙනිසික් ‘ නමැති පිරමීඩාකාර මූල්‍ය ආයතනයක් මඟින් තැන්පත්කරුවනන්ගෙන් රුපියල් කෝටි 1000ක මුදල් ප්‍රමාණයක් වංචා කළා යැයි කියන සිද්ධියට අදාළව රක්ෂිත බන්ධනාගාරගතව සිටින එම පෞද්ගලික සමාගමේ සභාපතිවරයා සහ එම සමාගමේ මූල්‍ය අධ්‍යක්ෂිකාව වන ඔහුගේ බිරියගේ බැංකු ගිණුම් 65ක් පිළිබඳව විමර්ශනය කර අධිකරණයට වාර්තාවක් වහාම ඉදිරිපත් කරන ලෙස කොළඹ ප්‍රධාන මහේස්ත්‍රාත් තනුජා ලක්මාලි මහත්මිය ඊයේ (11) අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන කොට්ඨාසයට නියෝග කළේය.
මෙම සිද්ධියට අදාළ මෙම සැකකරුවන් දෙදෙනා බන්ධනාගාර නිලධාරීන් අධිකරණයට ඊයේ ඉදිරිපත් කිරීමෙන් අනතුරුව ඔවුන් දෙදෙනා ලබන 25 වැනි දින දක්වා තවදුරටත් රක්ෂිත බන්ධනාගාරගත කරන ලෙස ද මහේස්ත්‍රාත්වරිය නියෝග කළාය.
මෙලෙස රක්ෂිත බන්ධනාගාරගත කරනු ලැබුවේ කුරුණෑගල ප්‍රදේශයේ පදිංචි එරාමිරකල් පෞද්ගලික සමාගමේ අධ්‍යක්ෂක රණසිංහ ආරච්චිගේ ධම්මික කුමාර රණසිංහ (55) සහ ඔහුගේ බිරිය ගාල්ලේ වඩුගේ සමුද්‍රා සුරංගනී හේමචන්ද්‍ර යන අයවලුන්ය.
මෙම සිද්ධියට අදාළ මෙම සැකකරුවන්ගේ බැංකු ගිණුම් 65 පිළිබඳ විමර්ශන කටයුතු සිදු කිරීමට තිබෙන බැවින් තවදුරටත් රක්ෂිත බන්ධනාගාරගත කරන ලෙසට අපරාධ පරීක්ෂණ දෙපාර්තමේන්තුව අධිකරණයෙන් ඉල්ලූ අවස්ථාවේ මහේස්ත්‍රාත්වරයා මෙලෙස නියෝග කෙරිණි.
මෙම ප්‍රධාන සැකකරුවන් දෙදෙනාට අමතරව මෙම පිරමීඩ ජාවාරම ලංකාවේ සිට මෙහෙයවනු ලැබූ තවත් සැකකරුවන් හැට අටදෙනෙක් සහ නායකයන් තිස් දෙනෙකු මෙම සිද්ධියට සම්බන්ධ බව අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
මෙම සිද්ධියට අදාළව අන්තර්ජාල මෘදුකාංගය නිර්මාණය කළ පුද්ගලයා හට රුපියල් ලක්ෂ 50ක මුදලක් පළවෙනි සැකකරු ලබාදී ඇති බවද විමර්ශන නිලධාරීහු අධිකරණයට කරුණු දැක්වීය.
ඒ අනුව ඉදිරිපත් වූ කරුණු සලකා බැලූ මහේස්ත්‍රාත්වරිය සිද්ධියට අදාළ සැකකරුවන් දෙදෙනා ලබන 25 වැනි දින දක්වා රක්ෂිත බන්ධනාගාරගත කළ අතර ප්‍රගතිය වාර්තාවක් අධිකරණයට ඉදිරිපත් කරන ලෙසද නියෝග කළාය.
