‘ගෝල්ඩන් කී’ පුද්ගලික සමාගම නොගෙවා පැහැර හරින ලදැයි කියන රුපියල් කෝටි පහකට අධික බදු මුදල් සමාගමේ අධ්‍යක්ෂවරුන්ගෙන් අයකර ගැනීමට කටයුතු කරනවාද?, නැද්ද? යන්න පිළිබඳ නීතිපතිවරයාගේ ස්ථාවරය ජූලි 29 වැනිදා අධිකරණයට දැනුම් දෙන ලෙස කොළඹ අතිරේක මහේස්ත්‍රාත් තරංගා මහවත්ත මහත්මිය දේශීය ආදායම් දෙපාර්තමේන්තුවට නියෝග කළාය.
‘ගෝල්ඩන් කී’ සමාගමේ අධ්‍යක්ෂකවරයකු වශයෙන් සිටියදී මියගිය ලලිත් කොතලාවල, සිසිලියා කොතලාවල, කාවන් පෙරේරා ඇතුළු අධ්‍යක්ෂකවරුන් අට දෙනකුට එරෙහිව දේශීය ආදායම් කොමසාරිස්වරයා පවරා තිබූ නඩු තුනක් කැඳවීමෙන් පසුව මහේස්ත්‍රාත්වරිය මෙම නියෝග සිදු කළාය.
2002 වසරේ සිට 2009 වසර දක්වා නොගෙවා පැහැර හරින ලද වැට් බද්ද වන රුපියල් 16966816.83ක්, ජාතිය ගොඩනැඟීමේ බදු වන රුපියල් 38679770.80ක් ද 2018 වසර සඳහා නොගෙවා පැහැර හැර ඇති රුපියල් 2242097ක වැට් බදු මුදල් අයකර ගැනීම සඳහා මෙම නඩු තුන 2021 වසරේදී පවරා තිබුණි.
නඩුව කැඳවූ අවස්ථාවේදී වගඋත්තරකරුවන් වෙනුවෙන් පෙනී සිටි ජනාධීපති නීතිඥ මොහොමඩ් ආදම් අලී මහතා කරුණු දක්වමින් කියා සිටියේ ශ්‍රේෂ්ඨාධිකරණය නිකුත් කළ නියෝගය ප්‍රකාරව ගෝල්ඩන් කී සමාගමේ වගකීම් නිරවුල් කිරීමට නීතිපතිවරයාගේ මෙහෙයවීම සිදු කළ යුතු බවය.
ශ්‍රේෂ්ඨාධිකරණ නියෝග අනුව මෙම නඩුව සම්බන්ධයෙන් දේශීය ආදායම් දෙපාර්තමේන්තුව තීරණයක් ගත යුතු බව ද ජනාධිපති නීතිඥවරයා අවධාරණය කළේය.
දේශීය ආදායම් කොමසාරිස්වරයා වෙනුවෙන් කරුණු දැක්වූ නීතිඥ දිනේෂ් පෙරේරා මහතා කරුණු දක්වමින් නීතිපතිවරයාගේ උපදෙස් සඳහා අදාළ ලිපි නීතිපති දෙපාර්තමේන්තුවට යොමුකර ඇති බව පැවසීය.
දෙපාර්ශ්වයේ කරුණු සලකා බැලීමෙන් අනතුරුව නීතිපතිවරයාගේ ස්ථාවරය ජූලි 29 වැනිදා අධිකරණයට දැනුම් දීමට නියෝග කළ මහේස්ත්‍රාත්වරිය මෙම නඩු එදින යළි කැඳවීමට ද දින නියම කළාය.
