පාකිස්තානයේ බලුකිස්තාන ප්‍රාන්තයේ ක්වේටා නුවර සිට කයිබර් පක්ටුන්ක්වා ප්‍රාන්තයේ පේෂාවර් නුවර දක්වා ධාවනය වූ දුම්රියක් 500කට ආසන්න මගීහු පිරිසක් සමඟ පැහැර ගැනීමට ලක් වී ඇතැයි විදෙස් මාධ්‍ය වාර්තා කරයි. ජෆාර් එක්ස්ප්‍රස් නමැති මැදිරි 9කින් සමන්විත එම මගී දුම්රිය බලුකිස්තානයේ බෝලාන් දිස්ත්‍රික්කයේදී පැහැරගත් බව බලුකිස්තානයේ වෙනම රාජ්‍යයක් සඳහා සටන් වදිමින් සිටින බලුකිස්තාන විමුක්ති හමුදාව නිවේදනය කර ඇතැයි ද විදෙස් මාධ්‍ය වැඩිදුරටත් වාර්තා කරයි.
පැහැර ගැනීමට පෙර ආයුධ සන්නද්ධ බලුකිස්තාන කැරලිකරුවන් වෙඩි ප්‍රහාරයක් එල්ල කර දුම්රිය නවත්වා ගෙන ඇති අතර, දුම්රිය මුදා ගැනීම සඳහා පාකිස්තාන හමුදාව මෙහෙයුම් ආරම්භ කරන්නේ නම් ප්‍රාණ ඇපකරුවන් මරා දමන බවට අනතුරු අඟවා ඇතැයි ද විදෙස් මාධ්‍ය සඳහන් කරයි. තත්ත්වය පාලනය කිරිම සඳහා බලුකිස්තාන ප්‍රාන්ත රජය එම දිස්ත්‍රික්කයට හදිසි තත්ත්වයක් ප්‍රකාශයට පත් කර ඇතැයි ද වාර්තා වේ.
