මාතර – කොටවිල පිහිටි දිස්ත්‍රික් ක්‍රීඩා සංකීර්ණයේ අඩුපාඩු හා එහි තිබෙන ගැටලු පිළිබඳව සොයා බැලීම සඳහා වූ නිරීක්ෂණ චාරිකාවකට මාතර දිස්ත්‍රික් සම්බන්ධීකරණ කමිටුවේ සභාපති, කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතා ඉකුත් 6 වැනි දින සහභාගි විය.
මෙහි දී කොටවිල පිහිනුම් තටාකය, ගෘහස්ථ ක්‍රීඩාගාරය, ශරීර සුවතා මධ්‍යස්ථානය, ක්‍රීඩා පිටිය හා ක්‍රීඩාගාරය ඇතුළු අංග අමාත්‍යවරයාගේ නිරීක්ෂණයට ලක්වූ අතර ඒවායේ තිබෙන අඩුපාඩු හා ගැටලු කෙරෙහි අවධානය යොමු කරමින් කඩිනමින් අවශ්‍ය විසඳුම් ලබාදීමට මැදිහත් වන බව පැමිණ සිටි ක්‍රීඩා නිලධාරීන් හා පුහුණුකරුවන් හමුවේ පැවසීය.
මෙම අවස්ථාවට වැලිගම ප්‍රාදේශීය සම්බන්ධීකරණ කමිටු සභාපති පාර්ලිමේන්තු මන්ත්‍රී අර්කම් ඉල්ලාස් මහතා ඇතුළු ප්‍රදේශයේ මහජන නියෝජිතයින්, මාතර දිස්ත්‍රික් ලේකම් / දිසාපති චන්දන තිලකරත්න මහතා ඇතුළු දිස්ත්‍රික් ලේකම් කාර්යාලයේ නිලධාරීන්, මාතර මහා නගර සභාව, වැලිගම ප්‍රාදේශීය ලේකම් කාර්යාලය ඇතුළු රාජ්‍ය ආයතන රැසක නිලධාරීන්, ක්‍රීඩා නිලධාරීන් හා පුහුණුකරුවෝ පිරිසක් සහභාගි වී සිටියහ.
