වගකිවයුතු නිලධාරීන්ගේ නිසි අවධානයට ලක් නොවීම නිසා තණමල්විල මහවැලි සංස්කෘතික මධ්‍යස්ථානය දිනෙන් දින අභාවයට යමින් එය අද වන විට මිහිපිට අපායක් බවට පත්ව ඇති බවත් හා එම ගොඩනැඟිලිවල ඇතැම් කොටස් ඉතා අනාරක්ෂිත තත්ත්වයක පවතින බවත් ප්‍රදේශවාසීහු චෝදනා කරති.
එවකට හිටපු ජනාධිපතිනි චන්ද්‍රිකා බණ්ඩාරනායක මහත්මියගේ මාර්ගෝපදේශකත්වයෙන් මහවැලි සංවර්ධන නියෝජ්‍ය අමාත්‍යවරුන් වන ජයතිස්ස රණවීර, ජගත් පුෂ්පකුමාර හා මහවැලි අමාත්‍ය මෛත්‍රීපාල සිරිසේන යන මැති ඇමැතිවරුන්ගේ සහභාගිත්වයෙන් ශ්‍රී ලංකා මහවැලි අධිකාරිය මඟින් ඉදිකරන ලද මෙම සංස්කෘතික මධ්‍යස්ථානය වර්ෂ 2000.08.13 වැනි දින මහජන අයිතියට පත් කර තිබේ.
ප්‍රදේශයේ ජනතාව පවසන්නේ එවකට ප්‍රදේශයේ දුවා දරුවන්ට මෙන්ම සංස්කෘතික උත්සව ආදියේදී විශාල මෙහෙයක් මෙම ස්ථානයෙන් සිදු වූ බවත් වර්තමානය වන විට වගකිවයුතු කිසිවකුගේත් නිසි අවධානයක් මෙම ආයතනයට නොමැති වීම නිසාත් මෙ‍ලෙස දිනෙන් දින විනාශයට ගොස් ඇති බවයි.
ප්‍රදේශවාසීන් පවසන්නේ අද වන විට මෙහි ඇති බොහෝ ගොඩනැඟිලිවල කොටස් දිරාපත්ව කැඩී බිඳී ගොස් තිබියදීත් ළමුන් පවා සහභාගි කරගනිමින් අදටද මෙහි විවිධ උත්සව පවත්වන බවයි. එමෙන්ම මෙම මධ්‍යස්ථානය ඇතුළත තැන තැන ඇති කුණු බක්කිද කුණුවලින් පිරී ජරාජීර්ණ තත්ත්වයට පත්ව ඇති අතර සංස්කෘතික මධ්‍යස්ථානයේ ඉදිරිපිට ඇති මාළු ටැංකියද මේ වනවිට මදුරුවන් හා විවිධ සතුන්ගේ රජ දහනක් බවට පත්ව තිබේ. එමෙන්ම සංස්කෘතික මධ්‍යස්ථානය තුළ ඇති ඩෙස් පුටු ඇතුළු උපකරණද විනාශ වී ගොස් තිබේ. සංස්කෘතික මධ්‍යස්ථානයේ ඇතැම් ගොඩනැඟිලි තුළ මියගිය සතුන්ගේ මළකුණු ද දැකිය හැකිය. එහි ඇති වැසිකිළි කැසිකිළි පද්ධතියට යාමට තියා අහලකින් නහයක් තියාගෙනවත් යා නොහැකි ඒවා බවට පත්ව තිබේ. පුදුමයට කරුණ නම් මෙවැනි තත්ත්වයක් යටතේ තිබියදීත් තවමත් මෙම ආයතනය පිළිබඳව කිසිවකුගේත් අවධානය යොමු නොවීම බවයි ජනතාව පවසන්නේ.
