ලොරි රථයක ගැටීමෙන් පසුගියදා අනතුරට පත්වූ සුමේධ ඇතා සොයා වන ජීවී නිලධාරීන්ගෙන් සමන්විත කණ්ඩායම් කිහිපයක් මෙහෙයුම් ක්‍රියාත්මක කර තිබේ.
හබරණ – මරදන්කඩවල මාර්ගයේ ගලපිටගල ප්‍රදේශයේ පසුගිය 7 වැනිදා අලුයම ලොරි රථයක ගැටීමෙන් එම ඇතාගේ දකුණු දළයක් ගැලවී මාර්ගයේ වැටී තිබේ.
මෙම අනතුර සිදුව ඇත්තේ හබරණ හා මරදන්කඩවල මාර්ගයේ ඇති ප්‍රධාන අලිමංකඩකය. රිටිගල රක්ෂිතයේ සිට රාත්‍රී කාලයට මාර්ගය හරහා මාරු
වී කැකිරාව, හොරිවිල, පලුගස්වැව යන ප්‍රදේශවල සැරිසරන වනඅලි මෙම අලිමංකඩ භාවිත කරන බව ජනතාව පවසති.
එම මාර්ගයේ සිට මීටර් 500ක් පමණ දුරකින් රක්ෂිතය ආරම්භවේ. ඇතා අනතුර සිදුවීමෙන් අනතුරුව වේගයෙන් දිවගොස් 30-40m පමණ දුරක නැවතී ඇඟට පස් ගසාගෙන තිබෙන බවත් මෙම මෙහෙයුමට එක්ව සිටින රිටිගල හා ගනේවල්පොළ වනජීවී නිලධාරීහු පැවසූහ. එසේම එම ඇතාගේ බවට සැකකරන ලේ බිංදු තැවරී තිබූ ගස්වල කොළ ද නිලධාරීන්ට හමුවී තිබේ.
පසුව තවදුරටත් රිටිගල රක්ෂිතය තුළ ඇතා සොයා වනජීවි නිලධාරී කණ්ඩායම් දිවා – රාත්‍රී මෙහෙයුම් සිදු කර තිබේ. “ඩ්‍රෝන කැමරා ද” යොදගෙන ඒ අවට ජල මූලාශ්‍ර ආශ්‍රිතව සොයා බැලීම සිදුකළ ද වෙනයම් කිසිදු හෝඩුවාවක් සොයාගැනීමට නොහැකිව තිබේ. රක්ෂිතයේ ඇති ඝන වනාන්තර ස්වභාවයත්, විශාලත්වයත් මෙන්ම පසුගිය දින කිහිපය තුළ ඇදහැලුණු වර්ෂාව හේතුවෙන් රක්ෂිතය තුළ ඇති කුඩා ජලමූලාශ්‍ර පිරී පැවතීමත් යන කාරණා හේතුවෙන් එම ජල මූලශ්‍ර ආසන්නයේ ඇතා හා අනෙකුත් වන අලි දහවල් කාලය ගත කරන්නට ඇති බවට සැකකරන බව ද වන ජීවී නිලධාරීහු පවසති.
වනජීවී නිලධාරීන් විසින් ඒ අවට ඇති ගොවිබිමවල රාත්‍රී කාලයේ පැල් රකින ගොවි මහත්වරුන් දැනුම්වත් කර ඇතා පිළිබඳව අවධානය යොමුකර තිබේ.
