කෝටි දෙකහමාරක සැප වාහනය පොලීසියෙන් නවත්වද්දී, පොලීසියෙන් වාහන රියැදුරු බලපත්‍රය ඉල්ලා සිටි රියැදුරෙක් පිළිබඳ පුවතක් ගලේවෙල, දඹුල්ල සහ ගල්කිරියාගම, පොලිස් බලප්‍රදේශ තුනක අතර මැදි ප්‍රදේශයකදී වාර්තා විය.
පසුගියදා රථවාහන පොලිස් කණ්ඩායමක් රථවාහන පරීක්ෂාවක් කරමින් සිට තිබේ. අධික වේගයෙන් සැප වාහනයක් ගමන් කරනු දැක පොලිස් නිලධාරියකු එය නවත්වන ලෙස සංඥා කොට තිබේ.
එ අනුව රථය පොලිස් නිලධාරීන් ආසන්නයේම නවතා වීදුරුව පහත් කරනවාත් සමඟම පොලිස් නිලධාරීන්ට මත්වතුර ගඳ වහනය වී තිබේ. වහාම ක්‍රියාත්මක වූ පොලිස් නිලධාරින් දෙදෙනා තමන් මත් වතුර පානය කර තිබේදැයි ප්‍රශ්න කිරීමත් සමඟ රියැදුරු එකවරම “ඔව්, මම ටිකක් බිව්වා ඒත් ගොඩක් බීලා නෑ, හැබැයි මට වාහනය පදවාගෙන යන්න පුළුවන්” රියැදුරු එසේ පිළිතුරු දී තිබේ.
“හැබැයි මහත්තයෝ වාහනේ පදවාගෙන යන්න ඔබට පුළුවන් වුණාට නීතියෙන් කිසිදු අවසරයක් නැහැ. මත් වතුර පානය කරලා රිය පදවන්න, බැරි වෙලාවත් තවත් කවුරු හරි අනතුරකට පත්වුණොත් ඔබත් අනතුරට ලක්වෙනවා. වහාම වාහනයෙන් බහින්න. බලපත්‍ර ටික ලබා දෙන්න” පොලිස් නිලධාරියාගේ ප්‍රකාශය විය.
“හරි මම බහින්නම් එතකොට කවුද මේ මගේ වාහනය පදවගෙන යන්නේ” රියැදුරු පොලීසියෙන් පෙරළා අසා ඇත. ඊට පිළිතුරු ලබා දුන් පොලිස් නිලධාරියා ” මෙතැන වෙන රියැදුරෙක් නැහැ. ඔබට වාහනය පදවන්නත් බැහැ. ඒ නිසා අපේ පොලිස් නිලධාරියෙක් තමයි ඔබේ වාහනය පොලීසියට රැගෙන යන්නේ.”
“හරි එහෙමනම් මට පෙන්වන්න මගේ වාහනය පදවන පොලිස් නිලධාරී මහත්තයාගේ රියැදුරු බලපත්‍රය. මගේ වාහනය කෝටි දෙකහමාරකට වැඩිය වටිනවා. මේ වගේ වාහනයක් පදවන්න යතුරුපැදි බලපත්‍රයක් තිබිලා බෑ. වහාම මට බලපත්‍රය පෙන්වන්න එහෙම නැතුව මගේ වාහනේ පදවන්න පොලීසියට දෙන්නේ නෑහැ. මම බීල ඉන්න එක ඇත්ත. හැබැයි මට මෙන්න බලපත්‍රයක් තියෙනවා.”
කෙසේ වෙතත් පැය කිහිපයක් ගතවෙනතුරුත් පොලීසිය සහ රියැදුරු අතර විවිධ මතවාදයන් ඇතිවෙද්දී අනෙකුත් වාහන රැසක් පරීක්ෂා කිරීමකින් තොරව පිටත්ව ගොස් තිබිණි.
ඉහළ පොලිස් නිලධාරියෙකුගෙන්ම උපදෙස් ලබාගෙන ඉදිරි විමර්ශන කටයුතු සිදු කළ බව පසුව සිදුකරන ලද සොයා බැලීමකදී අනාවරණය විය.
