මුතුපන්තිය ධීවර ගම්මානයේ මාදැලකට ලක්ෂ 350කට අධික වටිනාකමකින් යුත් වෙම්බරු පරව් මත්ස්‍ය අස්වැන්නක් ඉකුත් 7 වැනිදා හා 8 වැනිදා ලැබී ඇති බව ධීවරයෝ පවසති. මුතුපන්තිය ධීවර ගම්මානයේ පදිංචි මාදැල් හිමිකරුවෙකුට මෙලෙස 7 හා 8 දින දෙක තුළ ඔහුගේ මාදැලට මෑත කාලයේ ලැබුණ දැවැන්තම වෙම්බරු පරව් මත්ස්‍ය තොගය ලැබී තිබේ.
එක් වෙම්බරු පරව් මත්ස්‍යයකු කිලෝ 6කට අධික බවත් මාදැල ඇදීමට එක්වූ පිරිසට අමතරව මුතුපන්තිය ගම්මානයේ විශාල පිරිසක් ද මාදැලට කොටුවී සිටි මත්ස්‍යයින් ට්‍රැක්ටර්වලට පැටවීමට එක්වී ඇත.
දින දෙකක ලැබී ඇති මෙම මත්ස්‍ය අස්වැන්න කිලෝ 50,000 (පනස් දහසකට) අධික බවද පවසයි. එක් කිලෝවක් රුපියල් 700 හා 750 බැගින් අලෙවි කර ඇති බවද ධීවරයෝ පවසති.
කෙසේ වෙතත් මෙතරම් විශාල මත්ස්‍ය අස්වැන්නක් මෑත කාලයේ මාදැලකට ලැබුණ පළමු අවස්ථාව බව ද ධීවරයෝ පවසති.
මෙම මාදැල් හිමිකරුට පසුගිය වසරවලද සැලකිය යුතු මත්ස්‍ය අස්වැන්නක් ලැබී ඇත.
මාදැලට කොටු වූ මත්ස්‍යයින් ට්‍රැක්ටර් රථ 20කට අධික සංඛ්‍යාවක් යොදා ගනිමින් උඩප්පුවට රැගෙන ගොස් අලෙවි කර ඇත.
