ව්‍යවසායකත්ව සහ ජෛව තාක්‍ෂණ නවෝත්පාදනය දිරිගැන්වීමට තෙදින නිල සංචාරයකට මෙරටට පැමිණි ලෝක ප්‍රකට අමෙරිකානු ගායක ඇලෝ බ්ලැක් (Aloe Blacc) කටුනායක ගුවන්තොටුපොළ්දී මහත් හරසරින් යුතුව ඊයේ (10) පෙරවරුවේ පිළිගනු ලැබිණි.
කීර්තිමත් ගායකයකු, ගීත රචකයකු සහ ව්‍යවසායකයකු වන ඇලෝ බ්ලැක් මෙහිදී මාධ්‍ය වෙත පැවැසුවේ ආයෝජනවලට ශ්‍රී ලංකාව ආකර්ෂණීය ස්ථානයක් බව ලොවට කියාපෑමේ කොටස්කරුවකු වීම තම අපේක්ෂාව බවයි.
ශ්‍රී ලංකා රජය සහ ජාතික පර්යේෂණ හා සංවර්ධන කටයුතු සඳහා මුලපිරීමේ වැඩසටහන හා සහයෝගයෙන් කටයුතු කිරීමට එය අද්විතීය අවස්ථාවක් වන බවත් ඔහු වැඩිදුරටත් සඳහන් කළේය. දැනට පවතින සහ නව සමාගම් යන කොටස් දෙකම ඇතුළුව ශ්‍රී ලංකාවේ සිදු වන විවිධ ආයෝජන සහ සංවර්ධනය වෙමින් පවතින නව සංකල්ප පිළිබඳ නිරීක්ෂණය කිරීමේ අවස්ථාව ඉතාමත් සුවිශේෂී අවස්ථාවක් වන බව සඳහන් කළ ඇලෝ බ්ලැක් මහතා, එක්සත් ජනපදයේ සහ ලොව පුරා සිටින බොහෝ ආයෝජකයන් සමඟ තමන්ට ඉතාමත් සමීප සම්බන්ධතා පවතින බවත්, ශ්‍රී ලංකාවේ පවත්නා විභවයන් පිළිබඳ ඔවුන් හා කරුණු සාකච්ඡා කිරීමට තමන් අදහස් කරන බවත් ප්‍රකාශ කළේය. ඔහුගේ ‘I Need a Dollar’ (අයි නීඩ් අ ඩොලර්) සහ ‘Wake Me Up’ (වේක් මී අප්) වැනි ගීත ලොව පුරා වඩාත් ජනප්‍රියත්වයට පත් ගීත වන අතර, ඇලෝ බ්ලැක් මහතාගේ මෙරට සංචාරය තුළින් ජෛව තාක්‍ෂණය, සෞඛ්‍ය සේවා නවෝත්පාදනය සහ ව්‍යවසායකත්වය පිළිබඳ ඔහු තුළ වන උනන්දුව පිළිබිඹු කරයි. ශ්‍රී ලංකාවේ රැඳී සිටින දින තුනේදී ඔහු දේශීය ව්‍යවසායකයන්, කලාකරුවන් හමුවෙමින් සංස්කෘතික හා විද්‍යාත්මක ක්ෂේත්‍ර පිළිබඳ සහයෝගිතාවන් වර්ධනය කර ගැනීමට අපේක්ෂා කෙරේ.
