කාන්තාවන් සවිබලගන්වා, ඔවුන්ගේ හැකියාව සහ දක්ෂතාව අනුව රටේ ආර්ථිකයට සුවිශාල දායකත්වයක් ලබාගත හැකි බව කම්කරු ඇමැති සහ ආර්ථික සංවර්ධන නියෝජ්‍ය ඇමැති ආචාර්ය අනිල් ජයන්ත ප්‍රනාන්දු මහතා පැවසීය.
මෙරට ආර්ථික සංවර්ධන ක්‍රියාවලියට ඍජුවම කාන්තා දායකත්වය ලබාදිය හැකි මංපෙත් විවර කිරීම නව රජයේ අරමුණ බවද කීවේය.
ඇමැතිවරයා මේ බව සඳහන් කළේ පසුගිය 8 වැනිදාට යෙදී තිබූ ජාත්‍යන්තර කාන්තා දිනයට සමගාමීව, වැඩ කරන කාන්තාවන් සවිබලගැන්වීමේ අරමුණින්, කම්කරු දෙපාර්තමේන්තුවේ පැවති වැඩසටහනට සහභාගී වෙමිනි.
එහිදි ඒ මහතා මෙසේද කීවේය.
“අතීතයේ සිට මේ දක්වා කාන්තාවන් සහ දරුවන් පිළිබඳ විවිධ සැමරුම් පැවතුණ ද එමඟින් ඔවුන්ගේ ජීවිත ප්‍රමාණාත්මකව වෙනසකට ලක්ව නැහැ. එබැවින් මෙවර “තැනුමට තිරසර හෙටක් – සවිමත් ඇය වේ මඟක්” ජාතික තේමාවෙන් කාන්තා දින උත්සවය සමරමින් ශ්‍රී ලංකාව නව ගමන් මඟකට අවතීර්ණ වී සිටිනවා.
රාජ්‍ය සේවකයන් විදිහට විවිධ ආණ්ඩු යටතේ රාජකාරි කටයුතු සිදුකර තිබෙන බව දන්නා කරුණක්. ඒ නිසා මේ අලුත් ආණ්ඩුවක තවත් එක් සටන් පාඨයක් පමණක් බව ඔබට සිතෙන්නට පුළුවන්, නමුත් එය එසේ නොවන බවට මම මතක් කළ යුතුයි.
කාන්තාවන්ගේ ශ්‍රම දායකත්වය අංශ කිහිපයකට සීමා වී තිබූ බැවින් විශාල වපසරියක වගකීම් දැරිය හැකි කාන්තාවන්ට නිසි අවස්ථාව නොලැබීමේ තත්ත්වයක් දක්නට තිබෙන අතර එවැනි බාධා ඉවත් කිරීම රජයේ අපේක්ෂාව බවයි.
වර්තමානය වනවිට සියල්ල සංකීර්ණ වෙලා තියෙන්නේ. ආර්ථිකය ඇතුළේ එක භාණ්ඩයක් වෙනුවට ලක්ෂ සංඛ්‍යාත ප්‍රමාණයක් භාණ්ඩ හැදෙනවා. සේවා නිර්මාණය වෙනවා. එවැනි වටපිටාවක අර සහයෝගය වැදගත් වෙනවා. දැනුවත්ව හෝ නොදැනුවත්ව අපි හදාගත් සම්බන්ධතා ගැලවිලා ගිහිල්ලා අපි වෙන වෙන විදිහට නිෂ්පාදනයට සම්බන්ධ වෙනවා.
වෙන වෙන විදිහට නීතිරීති සකස් කරගන්නවා. හොඳ නරක සාධාරණ අසාධාරණකම් ගොඩාක් තියෙනවා. දැන් අපි උත්සාහ කරනවා. ඒ නීතිරීති ඇතුළේ සාධාරණ අසාධාරණ ඇතුළේ, අපි විතරක් තේරුම් ගත්ත ඒ කාරණා තුළ, මේකට උත්තර හොයාගන්න.
ඒ උත්තර හොයාගන්න ගියාම සමස්ත නිෂ්පාදන ක්‍රියාවලිය බිඳෙනවා. වසර දෙකක් වැනි කාලයක් තුළ පැවති ආර්ථික කරුණු හේතුවෙන් වැටුපෙහි මුහුර්ත අගය 40%කින් පහළ ගොස් තිබුණා. මෙවර වැටුප් වැඩිවීම සිදු කරන්නේ ඒ සහනය ලබාදීම සඳහායි. මේ සියල්ල සිදුවන්නේ බිඳ වැටුණ ආර්ථිකයක් තුළයි.
අපේ රටේ ආර්ථිකය ප්‍රසාරණය කිරීමට තියෙන හැකියාවන්, දක්ෂතාවන් අනුව විශාල වටිනාකමක්‌ එකතු කරන්න පුළුවන් කියලා දැඩි විශ්වාසයක අපි ඉන්නවා.
ඉදිරියේදීත් අමාත්‍යාංශය පැත්තෙන්, ඒ වගේම අපේ ආණ්ඩුවේ අනෙක් අමාත්‍යාංශ එක්ව මැදිහත් වෙලා එක ගමනක් යෑම අපේ හීනයයි, බලාපොරොත්තුවයි. අපේ ජීවිත කාලයේ දී අපට ඒ ඔක්කොම ළං කරගන්න බැරිවෙයි, හැබැයි දැඩිව මම කියා සිටිනවා. මේ අවුරුද්ද, දෙක, තුන, හතර, පහ යනකොට මේ පරිවර්තනීය වෙනස ඔබට දැනේවි කියලා” යැයි පැවසීය.
කම්කරු අමාත්‍යාංශ ලේකම් එස්.එම්. පියතිස්ස, කම්කරු කොමසාරිස් ජනරාල් එච්.කේ.කේ.ඒ. ජයසුන්දර, කාන්තා හා ළමා කටයුතු අංශ කම්කරු කොමසාරිස් එන්.ආර්. රණවක මහත්ම මහත්මීහු ද මෙම අවස්ථාවට එක්ව සිටියහ.
