කොළඹ කුරුණෑගල මාර්ග අංක පහ මාර්ගයේ නාල්ල මංචිකඩේ හන්දිය ආසන්නයේදී ඊයේ (10) සවස සිදු වූ අනතුරකින් පාසල් සිසුන් තිදෙනකු ඇතුළු දොළොස් දෙනකු තුවාල ලබා දඹදෙණිය හා කුරුණෑගල රෝහල් වෙත ඇතුළත් කර ඇතැයි නාල්ල පොලීසිය කියයි.
මෙසේ අනතුරට පත්ව ඇත්තේ කුරුණෑගල සිට කොළඹ දෙසට ගමන් ගත් ලංගම බස් රථයක් හා වැලි සෝදන මැෂින් යන්ත්‍රයක් පටවාගෙන ගමන් ගත් භූම් ට්‍රක් රථයකි.
බස් රථය මංච් කඩේ හන්දිය පසුකර ඉදිරියට ගමන් කරන අවස්ථාවේ ඉදිරිපසින් පැමිණි රථයේ කෙළවරක් බස් රථයේ ගැටී ඇතැයිද අවස්ථාවේදී එහි පටවා තිබූ යන්ත්‍රය හැරී ගොස් බස් රථය ඉදිරිපස වැදීම හේතුවෙන් බස් රථය ඒ අසලම වූ ඇළට වැටී ඇතැයි ද මූලික පොලිස් පරීක්ෂණවලදී හෙළි වී ඇත.
රියදුරන් දෙදෙනා බස් රථයේ ගමන් ගත් පාසල් සිසුන් තිදෙනකු ඇතුළු දොළොස් දෙනකු සිද්ධියෙන් තුවාල ලබා දඹදෙණිය මූලික රෝහලට ඇතුළත් කර ඇති අතර එක් පාසල් සිසුවකු වැඩිදුර ප්‍රතිකාර සඳහා කුරුණෑගල මහ රෝහලට මාරු කර යැවූ බව දඹදෙණිය රෝහලේ ප්‍රකාශකයෙක් සඳහන් කළේය.
නාල්ල පොලිස් ස්ථානාධිපති ප්‍රධාන පොලිස් පරීක්ෂක රාජපක්ෂ මහතාගේ මෙහෙයවීම යටතේ පරීක්ෂණ පැවැත්වේ.
