ශ්‍රී ලංකාවේ ප්‍රමුඛතම බලශක්ති සමාගමක් වන එල්.ටී.එල්. හෝල්ඩින්ග්ස් සමාගම, සියලු පුරවැසියන්ගේ ජීවන තත්ත්වයන් උසස් කිරීම අරමුණු කරගෙන සමාජයීය, ආර්ථික සහ පාරිසරික වශයෙන් ක්‍රියාත්මක “ක්ලීන් ශ්‍රී ලංකා” ජාතික වැඩසටහන සමඟ එක්ව “දස දහසක් මී තුරු” – මී පැළ 10,000ක් සිටුවීමේ දීපව්‍යාප්ත රුක් රෝපණ වැඩසටහනක් දියත් කිරීමට පියවර ගෙන තිබේ.
මෙම වැඩසටහනේ සමාරම්භය සනිටුහන් කරමින් එහි පළමු පියවර වශයෙන් මොනරාගල දිස්ත්‍රික්කයේ, බුත්තල ප්‍රාදේශීය ලේකම් කොට්ඨාසයට අයත් ගලපිට ආර වැව කෘෂිකාර්මික කලාපයේ මී පැළ පන්සියයක් රෝපණය කිරීම පසුගියදා සිදුකෙරිණි.
මේ අවස්ථාවට බුත්තල ප්‍රාදේශීය ලේකම් ආර්.එම්.ආර්.එස්. තිලකරත්න, ඌව පළාත් ආණ්ඩුකාර නියෝජනය කරමින් ඒ මහතාගේ ලේකම්, මොනරාගල දිසාව භාර වැඩබලන නියෝජ්‍ය පොලිස්පති සුජිත් වෙදමුල්ල, වැල්ලවාය කලාප අධ්‍යාපන අධ්‍යක්ෂ, ප්‍රාදේශීය සම්බන්ධීකරණ කමිටු සභාපති නියෝජනය කරමින් වසන්ත හරිස්චන්ද්‍ර, ගලපිට ආර ගොවි සමිතියේ සභාපති එන්.ජී. නිකවෙල සහ එල්.ටී.එල්. සමූහ ව්‍යාපාරයේ නිර්මාතෘ යූ.ඩී. ජයවර්ධන සහ එල්.ටී.එල්. සමූහ ව්‍යාපාරයේ නියෝජ්‍ය ප්‍රධාන විධායක නිලධාරී නුහුමාන් මරික්කාර් මහත්වරු එක්වූහ. ඊට අමතරව රාජ්‍ය නිලධාරීන්, ප්‍රදේශයේ ගොවි මහත්ම මහත්මීන් සහ එල්.ටී.එල්. සමාගම් සමූහයේ නිලධාරීන් මෙන්ම පාසල් සිසුන් රැසක් ද මීට එක්ව සිටියහ.
2025 – 2028 කාලසීමාව තුළදී දිවයිනේ දිස්ත්‍රික්ක ගණනාවක් ආවරණය වන පරිදි මී පැළ 10,000ක් රෝපණය කිරීම සඳහා එල්.ටී.එල්. හෝල්ඩින්ග්ස් සමාගම සැලසුම් කර ඇති අතර එම ශාඛ පරිසර පද්ධතියට සම්පූර්ණයෙන් අනුගත වනතෙක් වසර තුනක කාලයක් රැක බලා ගැනීම සඳහා ද තිරසර සැලසුමක් සමාගම මඟින් සකස් කර ඇත.
ඒ අනුව මෙම ව්‍යාපෘතියේ පළමු පියවර යටතේ රෝපණය කරන ලද මී පැළ ඉදිරි වසර තුනක කාලයක් පුරා රැක බලා ගැනීමේ වගකීම ගලපිට ආර වැව ගොවි සමිතිය වෙත පැවරෙන අතර ඒ වෙනුවෙන් මූල්‍ය පිරිවැය දරනුයේ එල්.ටී.එල්. හෝල්ඩින්ග්ස් සමාගම මඟිනි.
මෙම “දස දහසක් මී තුරු” – මී පැළ 10,000ක් සිටුවීමේ දීපව්‍යාප්ත රුක් රෝපණ වැඩසටහනේ සමාරම්භක උත්සවය ඇමතූ බුත්තල ප්‍රාදේශීය ලේකම් ආර්.එම්.ආර්.එස්. තිලකරත්න මහතා සඳහන් කළේ, පරිසර විනාශය ශීඝ්‍රයෙන් සිදුවෙමින් පවතින කාලසීමාවක “දස දහසක් මී තුරු” වැඩසටහන ඉතාමත් වැදගත් සමාජ සත්කාරයක් බවයි. ජල පෝෂක ප්‍රදේශ, වන රක්ෂිත ආශ්‍රිතව මෙම වන රෝපණය තුළින් පරිසරයට මහඟු මෙහෙවරක් සිදුවනවා සේම ජනතාවගේ චර්යාත්මක වෙනස්කමක් ඇති කර ගැනීමට හැකියාව ලැබෙන බව ද ඒ මහතා සඳහන් කළේය.
LTL සමූහ ව්‍යාපාරයේ නියෝජ්‍ය ප්‍රධාන විධායක නිලධාරී නුහුමාන් මරික්කාර් මහතා පැවසුවේ මෙම කර්තව්‍යයට මුලපිරීමේදී රජයේ ක්‍රියාත්මක ‘ක්ලීන් ශ්‍රී ලංකා‘ වැඩසටහනට සම්බන්ධව ක්‍රියාත්මක කිරීම වඩාත් යහපත් බව කල්පනා කළ බවයි.
