ශ්‍රී ලංකා මහ බැංකුවේ ලියාපදිංචි ප්‍රාථමික ගැනුම්කාර සමාගමක් ලෙස පෙනී සිට භාණ්ඩාගාර බිල්පත්වල ආයෝජනය කරන බව පවසා නැඟෙනහිර හේවාගම කෝරළ විවිධ සේවා සමුපකාර සමිතියට අයත් රුපියල් කෝටි 50ක මුදලක් සාවද්‍ය පරිහරණය කිරීමේ චෝදනාවට ඇප මත මුදාහැර සිටින චනුක උපේන්ද්‍ර රත්වත්තට පනවා ඇති විදේශ ගමන් තහනම ඉවත් කරන ලෙස කළ ඉල්ලීමක් කොළඹ මහාධිකරණය ප්‍රතික්ෂේප කළේය.
විත්තියේ නීතිඥයන් ගොනුකළ මෝසමක් අනුව කොළඹ මහාධිකරණ විනිසුරු නවරත්න මාරසිංහ මහතා ඉදිරියේ ඊයේ (10දා) නඩුව කැඳවන ලදි.
මැයි මස 8 වැනිදා ඩුබායිහිදී පැවැත්වීමට දින නියම කර ඇති ව්‍යාපාරික හමුවකට යෑම සඳහා විදේශ ගමන් තහනම තාවකාලිකව ඉවත් කරන ලෙස විත්තිය ඉල්ලා සිටියේය. එහිදී නියෝජ්‍ය සොලිසිටර් ජනරාල් සුදර්ශනී සෙනෙවිරත්න මහත්මිය පැමිණිල්ල වෙනුවෙන් කරුණු දක්වමින් විත්තිකරු මූලික විමර්ශනයේදී දෙන ලද කට උත්තරයේ රැකියාව ලෙස එන්ට්‍රස් සිකියුරිටි ප්‍රයිවේට් ලිමිටඩ් ආයතනයේ අධ්‍යක්ෂවරයකු ලෙස දක්වා ඇති බව කියා සිටියාය. එහෙත් විදේශ ගතවීම සඳහා ඉදිරිපත් කර ඇති ලේඛනවල පරිගණක උපාංග ගෙන්වා බෙදාහැරීමේ ව්‍යාපාරික කටයුත්තක් සඳහා ඩුබායි රාජ්‍යයට යන බව දක්වා තිබේ.
එයට අමතරව විදේශගතවන දිනයක්, වේලාවක් හෝ ඔහු එහිදී පදිංචිව සිටින ස්ථාන දක්වා නැති බව පෙන්වා දුන් නීතිපති දෙපාර්තමේන්තුව විදේශ ගමන් තහනම ඉවත් කිරීමට විරෝධය දක්වා සිටියේය.
දෙපාර්ශ්වය ඉදිරිපත් කළ කරුණු සලකා බැලූ විනිසුරුවරයා අධිකරණයට ඉදිරිපත් කළ ලේඛනවල නිසි තොරතුරු ඉදිරිපත් කර නොමැති බව දක්වා ඉල්ලීම ප්‍රතික්ෂේප කළේය.
2015 වසරේ මාර්තු 13 වැනිදා සහ ජූනි 5 වැනිදා අතර කාලය තුළදී ප්‍රාථමික ගැනුම්කාර සමාගමක් වන කොල්ලුපිටියේ පිහිටි එන්ට්‍රස් සිකියුරිටි ප්‍රයිවේට් ලිමිටඩ් සමාගම භාණ්ඩාගාර බිල්පත්වල ආයෝජනය කරන බව පවසා නැඟෙනහිර හේවාගම කෝරළ විවිධ සේවා සමුපකාර සමිතිය භාරදුන් රුපියල් 507,5,88,640.11ක පොදු දේපොළක් සාවද්‍ය පරිහරණය කිරීමේ චෝදනාව යටතේ එම සමාගමට හා එහි අධ්‍යක්ෂවරුන්ට එරෙහිව නඩු පැවරීම සිදුව තිබේ.
අදාළ සමාගම පොරොන්දු වූ පරිදි මුදල් නොගෙවීම නිසා තැන්පත්කරුවන්ට ආපසු මුදල් ගෙවීමට නොහැකි වීමෙන් නැඟෙනහිර හේවාගම කෝරළ විවිධ සේවා සමුපකාර සමිතිය මූල්‍ය අර්බුදයකට මුහුණදී ඇත. එවිට සමිතියේ පාලක මණ්ඩලය මේ සිද්ධිය ගැන මූල්‍ය අපරාධ විමර්ශන ඒකකයට හා අල්ලස් හෝ දූෂණ චෝදනා විමර්ශන කොමිෂන් සභාවට පැමිණිලි කර ඇත. එම විමර්ශනවලින් පසු නීතිපතිවරයා 2023 වසරේ නොවැම්බර් 09 වැනිදා විත්තිකරුවන්ට එරෙහිව අධිචෝදනා 7ක් යටතේ නඩු පවරා තිබේ.
චූදිතයන්ට එරෙහිව දණ්ඩ නීති සංග්‍රහයේ 102, 113 සහ 389 යන වගන්ති යටතේ පොදු දේපොළ සාවද්‍ය පරිහරණය කිරීමේ චෝදනාව යටතේ චෝදනා ගොනුකර ඇත.
ශ්‍රී ලංකා මහ බැංකුව මහ බැංකුවේ අවසරය නොමැතිව මූල්‍ය ආයතනයක් පවත්වාගෙන යෑම සම්බන්ධයෙන් එන්ට්‍රස්ට් ලිමිටඩ් සමාගමේ අධ්‍යක්ෂවරුන් හා එහි නිලධාරින්ට විරුද්ධව නඩු පැවරීමක් සිදුකර ඇත.
ඉසිර ධර්මප්‍රිය බණ්ඩාර දිසානායක, චනුක උපේන්ද්‍ර රත්වත්ත, රොමේෂා දුෂ්මන්ති සේනාරත්න, නදීක සංජීව දයාරත්න, රොම්ලෝ මෙන්ඩිස් සහ එන්ට්‍රස් සිකියුරිටි ප්‍රයිවේට් ලිමිටඩ් යන තැනැත්තන් මෙම නඩුවේ විත්තිකරුවෝ වෙති.
