මත්ද්‍රව්‍ය සන්තකයේ තබාගෙන සිටීමේ චෝදනාවට අත්අඩංගුවට ගෙන සිටියදී කොළඹ අපරාධ කොට්ඨාසයේ නිලධාරින්ගේ පහර කෑමට ලක්වූ සැකකරුවකු කඩිනමින් රෝහල් ගත කොට ප්‍රතිකාර ලබාදෙන ලෙසට මාලිගාකන්ද මහේස්ත්‍රාත් ලෝචනී අබේවික්‍රම වීරසිංහ මහත්මිය ඊයේ (10) නියෝග කළේය.
කොළඹ අපරාධ කොට්ඨාසය අත්අඩංගුවට ගත් සැකකරු අධිකරණය හමුවේ ඉදිරිපත් කළ අවස්ථාවේදී මෙම නියෝගය කෙරිණි. මත්ද්‍රව්‍ය සන්තකයේ තබාගෙන සිටීමේ චෝදනාට අධිකරණයට ඉදිරිපත් කළ සැකකරු හට කොළඹ අපරාධ කොට්ඨාසය මාංචු දමා එල්ලා පහර දී ඇති බවට එම සැකකරු වෙනුවෙන් පෙනී සිටි නීතිඥවරයා අධිකරණයට ඊයේ (10) පවසා සිටියේය.
එම අවස්ථාවේ අධිකරණය ඉදිරියේ පෙනී සිටි සැකකරු මහේස්ත්‍රාත්වරිය නිරීක්ෂණය කිරීමේදී ඔහුගේ කකුලේ වම් පාදය දැඩි ලෙස පහර දීමට ලක්ව ඇති බවත් පිටේ තැළීම් පහරවල් ද ඇති ආකාරය ද නිරීක්ෂණය වී තිබිණි. පසුව සැකකරු වෙනුවෙන් පෙනී සිටි නීතිඥවරයා අධිකරණයේ පවසා සිටියේ තම සේවාදායකයාට මෙම පහර දීම හේතුවෙන් ඇවිදීමේ අපහසුතාවක්ද හට ගෙන ඇති බවත් ඔහුව කඩිනමින් වෛද්‍ය ප්‍රතිකාර සඳහා රෝහලකට යොමු කරන ලෙස ඉල්ලා සිටියේය. ඉල්ලීම සලකා බැලූ අධිකරණය සැකකරු රෝහල්ගත කරන ලෙසට නියෝග කළේය.
