ආයුධ සන්නද්ධව නාඳුනන පුද්ගලයකු ධවල මන්දිරයට පිටත රැඳී සිටියදී රහස් ඔත්තු සේවා නිලධාරීන් විසින් වෙඩි තබා ඇතැයි විදෙස් මාධ්‍ය වාර්තා කරයි. එම පුද්ගලයා ධවල මන්දිරයට පිටතින් රැඳී සිටි බවත්, ඔහු ආයුධ සන්නද්ධව සිටි බවත් අමෙරිකානු රහස් ඔත්තු සේවා ඒජන්සිය නිවේදනය කර ඇතැයි විදෙස් මාධ්‍ය වැඩිදුරටත් වාර්තා කරයි. එම සිදුවීම වන අවස්ථාවේදී ජනාධිපති ඩොනල්ඩ් ට්‍රම්ප් ධවල මන්දිරයේ නොසිටි බව ද වාර්තා වේ.
රහස් ඔත්තු සේවා ඒජන්සියේ සන්නිවේදන ප්‍රධානියා වන ඇන්තනී ගුගිලයිල්මි ප්‍රකාශ කර ඇත්තේ ඉන්ඩියානා ප්‍රාන්තයේ සිට වොෂින්ටනය බලා පැමිණ සිටින පුද්ගලයකු ධවල මන්දිරය ඉදිරිපිටදී සිය දිවි හානි කරගැනීමේ උත්සාහයක නිරතවන බවට තොරතුරක් ලැබුණු බවය. ඒ අනුව කඩිනමින් සිය නිලධාරින් එම ස්ථානයට පිටත් කළ බවද ඔහු සඳහන් කර තිබේ.
ඔත්තු සේවා නිලධාරින් ධවල මන්දිරය අසල රථ ගාල වෙත ගොස් ඇති අතර, නාඳුනන පුද්ගලයා පැමිණි මෝටර් රථය සොයා ගෙන ඇතැයි ද වාර්තා වේ. ඒ මොහොතේ නිලධාරීන් ඉදිරියට පැමිණි එම පුද්ගලයා ඔහු සතු ගිනිඅවියක් ඔසවා ගැටුමක් ඇති කරගැනීමට උත්සාහ කළ බවත්, නිලධාරින් වෙඩි තබා ඔහු මෙල්ල කර ගත් බවත් රහස් ඔත්තු සේවා ඒජන්සියේ නිවේදනයේ සඳහන් වන බව වාර්තා වේ. තුවාල ලැබූ පුද්ගලයා රෝහල්ගත කර ඇති අතර, ඔහුගේ තත්ත්වය පිළිබඳ තොරතුරු වාර්තා වී නැති බව විදෙස් මාධ්‍ය සඳහන් කරයි. නාඳුනන පුද්ගලයා 27 හැවිරිදි වියෙහි පසුවන අයකු බව මූලික විමර්ශනයේදී හෙළි වී තිබේ.
