බාලදක්ෂ ව්‍යාපාරයේ නිර්මාතෘ රොබට් ස්ටීවන්සන් බේඩ්න් පවල් සාමිවරයාගේ 168 වන ජන්ම දින සැමරුමට සමගාමීව කුරුණෑගල දිස්ත්‍රික් බාලදක්ෂ සංගමයේ මානවක බාලදක්ෂ සමූහය විසින් අක්ෂි පටක සහ රුධිර ජනක සෛල පරිත්‍යාග කිරීම සම්බන්ධයෙන් ප්‍රජාව දැනුම්වත් කිරීම සහ ඒ සඳහා පොරොන්දු පත්‍ර අත්සන් කිරීමේ වැඩසටහනක් කුරුණෑගල දිස්ත්‍රික් බාලදක්ෂ සංගම් ශාලාවේදී පැවැත්විණි.
ශ්‍රී ලංකා ජාතික අක්ෂි බැංකුව සහ ජාතික රුධිර පාරවිලයන මධ්‍යස්ථානයේ දායකත්වයෙන් දියත් කෙරුණු මෙම වැඩසටහනේදී ජාතික අක්ෂි බැංකු සංචිතයට ප්‍රථම වතාවට වාර්තාගත ලෙස නව පරිත්‍යාගශීලින් 1685ක් සහ රුධිර ජනක සෛල පරිත්‍යාගශීලින් 146ක් ලියාපදිංචි කිරීමට හැකියාව ලැබී ඇත.
පරිත්‍යාගශීලින්ගෙන් ලැබෙන අක්ෂි පටක ලොව පුරා බෙදාහරින ලොව එකම අක්ෂි බැංකුව ලෙස ශ්‍රී ලංකා ජාතික අක්ෂි බැංකුව වාර්තාගතවී ඇත.
