මිද්දෙණිය ත්‍රිත්ව ඝාතනයේ වෙඩික්කරුට ඝාතනය සිදු කිරීම සඳහා රුපියල් 250,000ක අත්තිකාරම් මුදලක් ලබා දුන් බව කියන සැකකරුවකු පෙරේදා (8) අගුණකොළපැලැස්ස පොලීසියේ නිලධාරී කණ්ඩායමක් විසින් අත්අඩංගුවට ගනු ලැබීය.
සැකකරු ඉකුත් පෙබරවාරි 20 වැනි දින මෙම අත්තිකාරම් මුදල ඌරුබොක්ක, බෙරළපනාතර ප්‍රදේශයේ පදිංචි වෙඩික්කරුගේ සොහොයුරියකට අයත් මිද්දෙණිය රාජ්‍ය බැංකුවක තිබෙන බැංකු ගිණුමකට බැර කර තිබූ බවට කරුණු අනාවරණය වූ බව පොලීසිය සඳහන් කළේය. අත්අඩංගුවට ගත් 40 හැවිරිදි සැකකරු ඇඹිලිපිටිය, පදලංගල, පරණ කොළණිගම පාරේ පදිංචිකරුවෙකි. මනුෂ්‍ය ඝාතනය සඳහා සහාය දීම සහ ඒ සඳහා කුමන්ත්‍රණය කිරීම යන චෝදනාවන්ට අත්අඩංගුවට ගත් සැකකරු වැඩිදුර විමර්ශන සඳහා මිද්දෙණිය පොලීසියට බාර දී තිබේ.
අගුණකොළපැලැස්ස පොලිස් ස්ථානාධිපති ප්‍රධාන පොලිස් පරීක්ෂක නිරෝෂන් අබේකෝන් මහතා ඇතුළු නිලධාරීන් කණ්ඩායමක් සැකකරු අත්අඩංගුවට ගෙන ඇත. තංගල්ල කොට්ඨාස භාර ජ්‍යෙෂ්ඨ පොලිස් අධිකාරි උපුල් සෙනෙවිරත්න, තංගල්ල සහකාර පොලිස් අධිකාරි (2) විජය බණ්ඩාර යන මහත්වරුන්ගේ උපදෙස් පරිදි මිද්දෙණිය පොලිස් ස්ථානාධිපති ප්‍රධාන පොලිස් පරීක්ෂක ඒ.ඩී.සී. රොහාන් මහතා ඇතුළු නිලධාරීහු සිද්ධිය සම්බන්ධයෙන් වැඩිදුර පරීක්ෂණ පවත්වති.
