මධ්‍යම කඳුකරයේ බටහිර බෑවුම් ප්‍රදේශයට මේ දිනවල පවතින දැඩි වියළි කාලගුණය හේතුවෙන් හැටන් නගරය හා ඒ ආශ්‍රිත ගම්මාන රැසක් සඳහා පානීය ජලය සැපයීම විශාල ගැටලුවක් බවට පත්ව ඇති බවත්, බෙදාහරින ජලය වඩාත් අරපිරිමැස්මෙන් පරිහරණය කරන ලෙසත් ජාතික ජලසම්පාදන හා ජලාපවහන මණ්ඩලයේ හැටන් මධ්‍යස්ථානයේ ස්ථන භාර නිලධාරීවරයා පැවසීය.
හැටන් නගරයේ ජල පාරිභෝගික පවුල් 4,100ක් පමණ වන අතර, දෛනිකව බෙදාහරින ජල ප්‍රමාණය ජල ඝන මීටර් 3,400ක් පමණ වේ.
එම ජල ප්‍රමාණය සපුරා ගනු ලබන්නේ සිංගිමලේ රක්ෂිතයේ පිහිටි ස්වාභාවික ජල උල්පත්වලින් ජල තටාකය වෙත රැස් කර ගන්නා හා ඉන්වරි ජල මූලාශ්‍රයෙන් ලබා ගන්නා ජලයෙනි. සිංගිමලේ රක්ෂිත ජල මූලාශ්‍ර වියළී යෑමත් සමඟ එම තටාකයේ ජලය ශීඝ්‍රයෙන් පහත බැස තිබේ. එහි ජල ප්‍රමාණය අඩි 4ක් දක්වා පහත බැස ඇති අතර, ඉන්වරි ජල මූලාශ්‍රයෙන් ලැබෙන ජල ප්‍රමාණය ද හීන වී තිබේ. එම තත්ත්වය හමුවේ ජලය බෙදා හැරීම ගැටලුකාරී බැවින් හැකි තරම් අරපිරිමැස්මෙන් ජලය පරිහරණය කරන ලෙසත්, ජලය ලැබෙන කාලවකවානුවලදී එක්රැස් කර ගැනීමට කටයුතු කරන ලෙසත් ජල පාරිභෝගික ජනතාවගෙන් ඉල්ලා සිටියි.
පවතින වියළි කාලගුණය ඉදිරියටත් පැවතියහොත් හැටන්, දික්ඔය හා කොටගල යන හැටන් පාරිභෝගික මධ්‍යස්ථානයට අයත් ප්‍රදේශයේ වූ ගම්මාන කලාප වශයෙන් වෙන් කර දිනක් හැර දිනක් ජලය බෙදා හැරීමට කටයුතු කරන බවද එම නිලධාරියා සඳහන් කළේය.
