අධ්‍යාපන සමුපකාර නිලවරණයට ඉදිරිපත් වූ සභිකයන් 384න් 370ක් ජය ගනිමින් ලංකා ගුරු සේවා සංගමය මෙවර සුවිශේෂී ජයක් වාර්තා කරගෙන තිබේ.
පෙරේදා (08) පැවති මෙම නිලවරණයෙන් ලංකා ගුරු සේවා සංගමය ලද ජයග්‍රහණය ප්‍රතිශතයක් ලෙස සියයට 95.35ක් වේ.
දූෂිත පන්තියක් මෙතෙක් කල් බලහත්කාරයෙන් බලය අල්ලාගෙන සිටි අධ්‍යාපන සමුපකාර ජාලය එම දූෂිතයන්ගෙන් බේරාගෙන අදූෂිත කණ්ඩායමකට භාරදීමට හැකිවීම සමස්ත ගුරු පරපුරම ලද ජයග්‍රහණයක් බව කම්කරු නියෝජ්‍ය අමාත්‍ය මහින්ද ජයසිංහ මහතා මේ සම්බන්ධයෙන් අදහස් පළ කරමින් කියා සිටියේය. මේ නිලවරණය රටේ අධ්‍යාපන කලාප සියයක පැවති අතර එම අධ්‍යාපන කලාප සියයයෙන් පනස් නවයක් නිතරගයෙන්ම ලංකා ගුරු සේවා සංගමය විසින් ජයගනු ලැබීය. මෙය මේ අධ්‍යාපන සමුපකාර නිලවරණ ඉතිහාසයේ ලබපු සුවිශේෂිතම ජයග්‍රහණයක් යැයි ද හෙතෙම කීවේය.
මෙරට අධ්‍යාපන වෘත්තිකයන්ගේ අභිවෘද්ධිය වෙනුවෙන් ක්‍රියාත්මක වන සමුපකාර ජාලයක් ලෙස අධ්‍යාපන සමුපකාර ජාලය හැඳින්වේ. මසකට රුපියල් මිලියන 1200කට වැඩි මුදලක් සමස්තයක් ලෙස මෙම සමිතිය හරහා සංසරණය වීමත් සමඟ බොහෝ දේශපාලන බලඅධිකාරියන් මෙම සමුපකාර ජාලයේ බලය ඇල්ලීමට විටින්විට උත්සහ කළහ.
ඇතැම් වකවානුවල විධිමත් සාමාජික පිරිස්වලින් සැදුම්ලත් මහ සභාවක් තුළ අධ්‍යක්ෂ මණ්ඩලයක් පත්වීමට ඉඩ නොතබා තමන්ගේ දේශපාලන හිතවතුන් අදාළ සමිතිය වෙත පත්කිරීම සිදු කර තිබුණි. ඒ තුළින් එම සමුපකාර ජාලයේ මූල්‍ය පරිපාලනයට විශාල වශයෙන් අහිතකර බලපෑම් එල්ල කෙරිණි.
