ශ්‍රී ලංකා අමරපුර මහා නිකායේ පස් වැනි උත්තරීතර මහනායක පදවිය ශ්‍රී සන්නස් පත්‍රයකින් බළන්ගොඩ, මිරිස්වත්ත, ශ්‍රී ධර්මානන්ද පිරිවෙන් විහාරාධිපති, අමරපුර රාස්සගල විහාරපාර්ශ්වයේ ශ්‍රීමත් මහානායක ධූරීන, අධ්‍යාපනපති, කරගොඩ උයන්ගොඩ මෛත්‍රී මූර්ති මහානායක හිමිපාණන් වහන්සේ වෙත පිළිගැන්වීමේ රාජ්‍ය මහෝත්සවය අද (10) බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවැත්වේ.
අමරපුර මහා නිකායේ මහා ලේඛකාධිකාරි බළපිටියේ සිරි සීවලී හිමියන් සඳහන් කළේ, ජනාධිපති ලේකම්වරයාගේ උපදෙස් හා මඟපෙන්වීම අනුව මෙම උත්සවය රාජ්‍ය මහෝත්සවයක් වශයෙන් පැවැත්වීමට කටයුතු යොදා ඇති බවයි.
එහිදී වැඩිදුරටත් අදහස් දැක්වූ උන්වහන්සේ මෙසේ ද කීහ.
“ශ්‍රී ලංකා අමරපුර මහා නිකායේ පස් වැනි උත්තරීතර මහානායක පදවියට බළන්ගොඩ, මිරිස්වත්ත, ශ්‍රී ධර්මානන්ද පිරිවෙනේ විහාරාධිපති අමරපුර රාස්සගල විහාර පාර්ශ්වයේ ශ්‍රීමත් මහානායක ධූරීන අධ්‍යාපනපති කරගොඩ උයන්ගොඩ මෛත්‍රී මූර්ති මහා නායක හිමිපාණන් වහන්සේ 2024 නොවැම්බර් 26 වැනි දින ශ්‍රී ගෝතම තපෝවන සංඝ මූලස්ථානයේදී ශ්‍රී ලංකා අමරපුර මහා නිකායේ මහා සංඝ සභාවේ පාලක සංඝ සභාව විසින් තෝරාපත් කරගනු ලැබුවා.
ජනාධිපති ලේකම්තුමාගේ උපදෙස් හා මඟපෙන්වීම අනුව රාජ්‍ය මහෝත්සවයක් පැවැත්වීමට පියවර ගෙන තිබෙනවා. ජනාධිපති ලේකම් කාර්යාලයත් බුද්ධ ශාසන හා සංස්කෘතික කටයුතු අමාත්‍යාංශය වගේම බෞද්ධ කටයුතු දෙපාර්තමේන්තුවත් මූලිකත්වය ගෙන ආරක්ෂක අමාත්‍යාංශය, ජනමාධ්‍ය අමාත්‍යාංශය, ත්‍රිවිධ හමුදාව සහ සිවිල් ආරක්ෂක දෙපාර්තමේන්තුව, ශ්‍රී ලංකා පොලීසිය, කොළඹ මහ නගර සභාව, ශ්‍රී ලංකා රූපවාහිනී සංස්ථාව ඇතුළු රජයේ සහ පෞද්ගලික ආයතන එක්ව මෙම මහෝත්සවය පැවතීමට කටයුතු සංවිධානය කර තිබෙනවා.”
