මෙම 15දා පැවැත්වීමට නියමිත, ‘භෝග සඳහා හානි පමුණුවන වන සතුන් පිළිබඳ ජාතික සංගණනය’ වෙනුවෙන් මහජනතාව වෙත ලබාදෙන සංගණන පත්‍රිකා ලක්ෂ 70ක් රජයේ මුද්‍රණාලය මඟින් මුද්‍රණය කර දිස්ත්‍රික්ක 25ක සියලුම ප්‍රාදේශීය ලේකම් කාර්යාල වෙත බෙදාහැරීම මේ වනවිට අවසන් කර ඇත.
‘වන සතුන්ගෙන් වගාවට සිදුවන හානි වළක්වා ගැනීමට සහ වගාවන්ට හානි කරන සතුන් කළමනාකරණය සඳහා අවශ්‍ය නිර්දේශ ලබා ගැනීම සඳහා වූ කමිටුවේ’ සාමාජික, කෘෂිකර්ම, පශු සම්පත්, ඉඩම් හා වාරිමාර්ග අමාත්‍යාංශයේ අධ්‍යක්ෂ (කෘෂි සංවර්ධන) ජේ. ඒ. තුසිත චන්දන මහතා පැවසුවේ මෙම පත්‍රිකා දිස්ත්‍රික් ලේකම් කාර්යාල වෙත ලබාදීමෙන් පසු උතුරු ප්‍රදේශයේ හැර අනෙක් සියලුම ප්‍රාදේශීය ලේකම් කාර්යාල වෙත ඊයේ (09) වනවිට බෙදා හැරීම අවසන් කළ බවයි.
ප්‍රාදේශීය ලේකම් කාර්යාල මඟින් අදාළ ග්‍රාම නිලධාරින් වෙත මෙම පත්‍රිකා ලබාදීමේ කටයුතු ද අවසන් අදියරේ පවතින බවත් ඒ මහතා කීය.
උතුරු ප්‍රදේශයේ දිස්ත්‍රික්ක 5 තුළ බෙදාහැරීමට නියමිත මෙම සංගණන පත්‍රිකා අද (10) අදාළ ප්‍රාදේශීය ලේකම් කාර්යාල වෙත ලැබෙනු ඇතැයිද තුසිත චන්දන මහතා ප්‍රකාශ කළේය.
මෙම සංගණනය සඳහා මුදල් වැය කිරීම පිළිබඳව විවිධ පාර්ශ්වයන් විවිධ අදහස් පළ කළද අදාළ කමිටුව විසින් මේ නිර්දේශ කර ඇත්තේ ඒ පිළිබඳව වියදම් අඩුවෙන්ම ක්‍රියාත්මක කළ හැකි සංගණන ක්‍රමවේදය බවද ඒ මහතා පෙන්වා දුන්නේය.
පත්‍රිකා මුද්‍රණය හැර සංගණනයේ අනෙක් කිසිදු කටයුත්තක් සඳහා මුදල් වැය නොකරන බවත් රජයේ නිලධාරින් ඒ සඳහා අවශ්‍ය අනෙක් කටයුතු සම්පාදනය කරන බවත් පෙන්වා දෙන අධ්‍යක්ෂවරයා ජනතාවගෙන් ඉල්ලා සිටින්නේ කෘෂිකර්ම, පශු සම්පත්, ඉඩම් හා වාරිමාර්ග අමාත්‍යාංශයේ සැලසුම පරිදි, මෙම 15 දා උදෑසන 8.00-8.05 දක්වා කාල සීමාව තුළ පැවැත්වෙන සංගණනයට සහයෝගය දෙන ලෙසයි.
ජනතාව තම ගෙවත්ත, වගා බිම, පාසල, පුණ්‍යභූමි හා වෙනත් පොදු ස්ථාන නිරීක්ෂණය කර එම අවස්ථාවේ තමාට අදාළ පරිශ්‍රයේ සිටින වඳුරන්, රිළවුන්, දඬු ලේනුන් හා මොනරුන් සංඛ්‍යාව ගණන් කර ග්‍රාම නිලධාරිවරයා විසින් ලබාදී තිබෙන සංගණන පත්‍රිකාවේ සටහන් කිරීම සිදුකරන ලෙසයි.
ආහාර සුරක්ෂිතතාව, අස්වනු හානිය අවම කිරීම පිණිස, වන සත්ත්ව හානි අවම කරගැනීම සඳහා ඉදිරිපත් වන තිරසර විසඳුමකට අවශ්‍ය මූලික දත්ත රැස් කිරීමට මෙම සංගණනය පැවැත්වෙන බවත් මෙය ජාතික වගකීමක් සේ සලකා කටයුතු කරන ලෙසත් ඒ මහතා අවධාරණය කළේය.
අදාළ දිනයේ වෙන්වූ කාලසීමාව තුළ පැන නැඟි යම් ස්වාභාවික බාධා (අධික වැසි ආදි තත්ත්ව) වේ නම් ඒ පිළිබඳව සටහනක් ග්‍රාම නිලධාරින් විසින් ප්‍රාදේශීය ලේකම්වරයා වෙත ලබා දෙනු ඇති බවත් කමිටුවේ සාමාජික, කෘෂිකර්ම, පශු සම්පත්, ඉඩම් හා වාරිමාර්ග අමාත්‍යාංශයේ අධ්‍යක්ෂ (කෘෂි සංවර්ධන) ජේ.ඒ. තුසිත චන්දන මහතා වැඩිදුරටත් පැවසීය.
