හම්බන්තොට ප්‍රාදේශීය ලේකම් කාර්යාලයේදී සේවාලාභියකු කලහකාරී ලෙස හැසිරෙමින් නිලධාරින්ට සහ කාර්යාලයීය දේපළවලට හානි කිරීම පිළිබඳ දැඩි විරෝධය සහ අප්‍රසාදය පළකරන බවත් නැවත එවැනි තත්ත්වයන් සිදුනොවන ලෙස ආරක්ෂාව තහවුරු කරන්නැයි ජනාධිපති ඇතුළු රජයෙන් ඉල්ලා සිටින බවත් ඒකාබද්ධ පරිපාලන නිලධාරින්ගේ සංගමය මාධ්‍යයට ලිපියක් ඉදිරිපත් කරමින් පවසයි.
අදාළ සේවාලාභියා ප්‍රමාණවත් තොරතුරු නොමැතිව හම්බන්තොට ප්‍රාදේශීය ලේකම් කාර්යාලයට පියාගේ උප්පැන්න සහතිකය ලබා ගැනීමට පැමිණි බවත් එය ලබාගැනීමට නොහැකිව එම කාර්යාලයීය නිලධාරීන් බිය ගන්වමින් සහ දේපළවලට හානි පැමිණවීම පිළිබඳ සිය සංගමය දැඩි විරෝධය සහ අප්‍රසාදය පළ කරන බවත් ඒකාබද්ධ පරිපාලන නිලධාරින්ගේ සංගමයේ සභාපති ඉන්දික වික්‍රමසිංහ මහතා පැවැසීය. අදාළ නිලධාරිනිය තමන්ට අයත් නොවන කටයුත්තක් වුවද සේවාලාභියා වෙනුවෙන් සහ ඒ සඳහා කිසිදු අමතර ගෙවීමක්ද නොලබමින් රාජකාරිය ඉටුකිරීමට උත්සාහ දැරුව බවත් එහිදී ඇයට මරණ තර්ජනයට ලක්වීමට සිදු වූ බවත් ඔහු එම ලිපියෙන් පෙන්වා දේ. මාධ්‍ය මෙන්ම සමාජ මාධ්‍ය එම නිලධාරිනිය සහ අනිකුත් නිලධාරින් අපහසුතාවට පත්කරමින් කරනු ලබන අසත්‍ය ප්‍රකාශ නිවැරදි කිරීමටත් එම සිද්ධිය පිළිබඳ සාධාරණ පරීක්ෂණයක් කිරීමට කටයුතු කරන ලෙසත් ජනාධිපති ඇතුළු රජයෙන් ඉල්ලා සිටින්නේ යැයි වැඩිදුරටත් දන්වා සිටී.
